ހުޅުމާލޭ ދެވަނަ ފިޔަވަހީގައި މިދިޔަ ޖުލައި 31، ގައި ހިނގި ނުރައްކާތެރި އެކްސިޑެންޓުގައި ކާރު ދުއްވަން އިން އިބްރާހިމް އިކްރާމު ތިން ދުވަހަށް ބަންދުކުރަން ކްރިމިނަލް ކޯޓުން އަމުރުކޮށްފި އެވެ.
އެ މައްސަލައިގައި އިކްރާމު ހިމެނޭހެން ތިން މީހަކު ފުލުހުން ހައްޔަރު ކުރި އެވެ. އޭރު ކްރިމިނަލް ކޯޓުން އަމުރުކުރީ ޝަރީއަތް ނިމެންދެން އިކުރާމު ބަންދު ކުރާށެވެ.
ނަމަވެސް، މި މައްސަލައިގައި ފުލުހުން އަމަލުކުރީ ގާނޫނާ ހިލާފަށް ކަމަށް ބުނެ އިކުރާމު ވަނީ އޭނާ ޝަރީއަތް ނިމެންދެން ބަންދު ކުރުމަށް ކްރިމިނަލް ކޯޓުން ކުރި އަމުރު ހައިކޯޓުގައި އިސްތިއުނާފުކޮށްފަ އެވެ.
ހައި ކޯޓުން މި މައްސަލަ ބެލުމަށް ފަހު، އިކްރާމުގެ ބަންދު މަޖިލީހުގައި އޭނާގެ ވަކީލަށް ފުރުސަތު ނުލިބޭ ގޮތަށް ކަންކަން ހިނގާފައި އޮތުމުން ކްރިމިނަލް ކޯޓުން ނެރުނު އަމުރު ހައި ކޯޓުން ބާތިލު ކުރުމާ އެކު އޭނާ ވަނީ މިނިވަންވެފަ އެވެ.
ހަމަ އެ ދުވަހު ކްރިމިނަލް ކޯޓު އަމުރެއްގެ ދަށުން އޭނާ އަލުން ހައްޔަރުކުރި އެވެ.
