ރާއްޖޭގައި ބާއްވާ އެންމެ ބޮޑު ދުވުން ކަމަށްވާ ދިރާގު މޯލްޑިވްސް ރޯޑް ރޭސް (ޑީއެމްއާރްއާރް) 2024 ގެ 14 ވަނަ އެޑިޝަންގައި ސެޕްޓެމްބަރު، 10 ގެ ކުރިން ރަޖިސްޓާ ކުރެވޭނެ ކަމަށް ދިރާގުން ބުނެފި އެވެ.
ދުރާގުން ބުނީ ރޯޑްރޭސްގައި ބައިވެރިވާން ބޭނުންވާ ފަރާތްތަކުން ޕޯޓަލް މެދުވެރިކޮށް ފަސޭހައިން ދުވުމާ ބެހޭ މައުލޫމާތު ހޯދައި، ރަޖިސްޓްރޭޝަން ޕްރޮސެސް ކުރިއަށް ގެންދެވޭނެ ކަމަށެވެ. ފުރުސަތު ހުޅުވާލާފައި ވަނީ ސެޕްޓެމްބަރު، 10 ވާ އަންގާރަ ދުވަހުގެ ރޭ 23:59 ގެ ނިޔަލަށެވެ.
މި އަހަރުގެ ރޯޑްރޭސްގައި ދިރާގުން ވަނީ މުޅިން އައު އޮފީސް އަދި ރިސޯޓް 5K ޓީމް އިވެންޓު ހިމަނާފަ އެވެ. އެ ކެޓެގަރީގައި އޮފީސްތަކުގެ މުވައްޒަފުންނަށް ހަތަރު މީހުންގެ ޓީމެއްގެ ގޮތުގައި ބައިވެރިވެވެ އެވެ.
އެ ޓީމުތަކުގައި ހުސް ފިރިހެން، ހުސް އަންހެން ނުވަތަ އަންހެން އަދި ފިރިހެން ބައިވެރިންނަށް ވެސް ދުވެވޭނެ އެވެ. އަދި ހާފް މެރެތަން، 10K އަދި 5K ގެ އިތުރުން ސްކޫލް 13 އަހަރުން ދަށުގެ 5K އަދި ސްކޫލް 13 އަހަރުން މަތީގެ 5K އަށް ވެސް ރަޖިސްޓްރީވުމުގެ ފުރުސަތު ވަނީ ހުޅުވާލެވިފަ އެވެ.
އެހެން އަހަރުތަކެކޭ އެއްފަދައިން، މިފަހަރުގެ ރޯޑްރޭސްއަކީ ވެސް ދިރާގުގެ ސީއެސްއާރް ޕްރޮގްރާމްގެ މައިގަނޑު އެއް ދާއިރާ ކަމަށްވާ ކުޑަކުދިންގެ ރައްކާތެރިކަމަށް ހާއްސަކޮށްފައިވާ ދުވުމެކެވެ.
މި އިވެންޓްގައި ކުޑަކުދިންގެ ރައްކާތެރިކަމުގެ ދާއިރާގައި ހަރަކާތްތެރިވާ އެންޖީއޯތަކަށް އާންމުން ހޭލުންތެރިކުރުވުމަށާއި ފަންޑްރެއިޒް ކުރުމުގެ ފުރުސަތު ލިބިގެންދާނެ އެވެ.
އެގޮތުން ދިރާގުން މި އަހަރުގެ އިވެންޓުގައި އެންޑޯސްކޮށްފައިވާ 12 އެންޖީއޯތަކުގެ ތެރެއިން ބައިވެރިވެރިންގެ އެންމެ ގިނަ ނޮމިނޭޝަން ލިބޭ ޖަމިއްޔާއަކަށް އެ ފަރާތްތަށް ރޭވިފައިވާ ޕްރޮގްރާމްތައް ފެށުމަށް އެހީތެރިވުމުގެ ގޮތުން ޖުމްލަ ދެލައްކަ ރުފިޔާގެ ފައިސާގެ އެހީތެރިކަން ދިރާގުން ދޭނެ އެވެ.
އޭގެ އިތުރުން ކޮންމެ ބައިވެރިއެއްގެ ރަޖިސްޓްރޭޝަނުން 100ރ. އާއި ސްޕެޝަލް ބިބް ނަމްބަރު ވިއްކައިގެން ލިބޭ ހުރިހާ ފައިސާއެއްވެސް ހަމަހަމަކޮށް އެންޑޯސްކޮށްފައިވާ ޖަމިއްޔާތަކަށް ހަދިޔާ ކުރުމަށްވެސް އެކުންފުނިން ވަނީ ނިންމާފަ އެވެ.
މި ދުވުމަކީ ކޮންމެ އަހަރަކުވެސް ވަނަ ވަނައަށް އަންނަ ފަރާތްތަކަށް ބޮޑެތި ފައިސާގެ އިނާމްތަކެއް ދެވިގެންދާ ރޭހެކެވެ. މި އަހަރުގެ ރޭހުގެ ވަނަތަކަށް ހޮވޭ ފަރާތްތަކަށް ޖުމްލަ 256،000ރ. ދިނުމަށް ދިރާގުންވަނީ ނިންމާފަ އެވެ.
ދިރާގު ރޯޑްރޭސްއަކީ ވޯލްޑް އެތުލެޓިކްސް ސަޓިފައިޑް ރޭސް ރޫޓަކާއެކު އެސޯސިއޭޝަން އޮފް އިންޓަނޭޝަނަލް މެރަތަންސް އެންޑް ޑިސްޓަންސް ރޭސަސް (އެއިމްސް) ވޯލްޑް ރަނިން ކަލަންޑަރުގައި ލިސްޓުކޮށްފައިވާ ދިވެހިރާއްޖޭގެ ހަމައެކަނި ބައިނަލްއަގްވާމީ ދުވުމެވެ.
މި ދުވުން މި އަހަރު ބޭއްވުމަށް ހަމަޖެހިފައިވަނީ އޮކްޓޯބަރު، 25 ވާ ހުކުރު ދުވަހު ހުޅުމާލެ ސެންޓްރަލް ޕާކުގަ އެވެ.
