މެންޗެސްޓާ (ސެޕްޓެމްބަރު 1) - މެންޗެސްޓާ ޔުނައިޓެޑް ދަނޑުގައި އެ ޓީމު 3-0 އިން ބަލިކޮށް، އާ ކޯޗު އާނާ ސްލޮޓްގެ ކޯޗުކަމުގައި ލިވަޕޫލުން ވަރުގަދަ ފެށުން ކުރިއަށް ގެންގޮސްފި އެވެ.
ލިވަޕޫލާއި ސިޓީ އަކީ މި ފަަހަރުގެ ލީގުގައި ފުރަތަަމަ ތިން މެޗުން މޮޅުވި ދެ ޓީމެވެ. ލިވަޕޫލަކީ، ފުރަތަމަ ތިން މެޗު ނިމުނުއިރު، ގޯލެއް ނުވަދެ ނިންމާލި ހަމައެކަނި ޓީމެވެ. ލިވަޕޫލްގެ ކޯޗު ސްލޮޓަކީ، ޕްރިމިއާ ލީގުގެ ޓީމަކާ ހަވާލުވެ ފުރަތަމަ ތިން މެޗުން ގޯލެއް ނުވަދެ، 2007 ވަނަ އަހަރު ސްވެން ގޯރަން އެރިކްސަން ކޯޗުކޮށްދިން މެންޗެސްޓާ ސިޓީ އަށް ފަހު މި ރެކޯޑް ހެދި ޓީމެވެ.
ޔުނައިޓެޑްގެ އޯލްޑް ޓްރެފޯޑްގައި މިރޭ ކުޅުނު މެޗުގައި، ލިވަޕޫލްގެ ޓްރެންޓް އަލެކްސަންޑާ-އާނޯލްޑް ގޯލެއް ޖެހި ނަމަވެސް، އޮފްސައިޑްގައި ހުރި މުހައްމަދު ސަލާހު ފައިގައި ބޯޅަ ޖެހުމުން، ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު، ނިންމީ އެ ގޯލެއް ނޫން ކަމަށެވެ.
އެހެން ނަމަވެސް، ލިވަޕޫލުން ވަނީ ފުރަތަމަ ހާފުގައި ދެ ގޯލު ޖަހައިފަ އެވެ. ޔުނައިޓެޑްގެ ބްރެޒިލް މިޑްފީލްޑަރު، ކަސެމީރޯ އަށް ހެދުނު ގޯސްތަކެއްގެ ފައިދާނަގައި، ލިވަޕޫލްގެ ދެ ގޯލު ވެސް ޖެހީ، ލުއިސް ޑިއާޒް އެވެ. ދެ ގޯލަށް ވެސް ފުރުސަތު ތަނަވަސްކޮށްދިނީ ސަލާހު އެވެ.
ޔުނައިޓެޑުން ދެ ވަނަ ހާފް ފެށީ، ކަސެމީރޯ ބަދަލުކޮށްގެންނެވެ.
ދެ ވަނަ ހާފުގައި ލިވަޕޫލްގެ ލަނޑު ޖެހީ ސަލާހު އެވެ. މިއީ، ޑޮމިނިކް ސޮބޯސްލާއި ދިން ބޯޅައަކުން ސަލާހު ޖެހި ގޯލެކެވެ. އިތުރު ގޯލުތަކެއް ޖަހަން ސަލާހު އާއި ސޮބޯސްލާއި އަށް ހުސް ފުރުސަތުތަކެއް ލިބުނުއިރު، ބޭނުމެއް ނުކުރެވުނެވެ.
ޔުނައިޓެޑަށް ލަނޑެއް ޖަހައިދޭން، ޖޯޝުއާ ޒާކްޒީ ފޮނުވާލި ދެ ބޯޅަ ވެސް ލިވަޕޫލްގެ ކީޕަރު އަލިސަން ބެކާ ވަނީ މަތަކޮށްފަ އެވެ.
ލީގުގައި ފުރަތަމަ ކުޅުނު ތިން މެޗުގެ ތެރެއިން ދެ މެޗުން ޔުނައިޓެޑް މި ވަނީ ބަލިވެފަ އެެވެ. ޔުނައިޓެޑްގެ ކޯޗު އެރިކް ޓެން ހާގް ބުނީ އޭނާގެ ޓީމަށް ވުރެ ރަނގަޅަށް މި މެޗުގައި ޖުމްލަކޮށް ލިވަޕޫލުން ކުރި މަސައްކަތް ރަނގަޅުކަމަށާއި މޮޅެއް ހައްގުވަނީ ވެސް ލިވަޕޫލަށް ކަމަށެވެ.
ސްލޮޓް މި ވަނީ ލިވަޕޫލާ ހަވާލުވުމަށް ފަހު، ފުރަތަމަ މެޗުގައި ޔުނައިޓެޑް އަތުން މޮޅުވެ، މި ގަރުނުގައި އެކަން ހާސިލްކުރި ފުރަތަމަ ކޯޗުގެ ޝަރަފް ހޯދައިފަ އެވެ. އެންމެ ފަހުން އެކަން ހާސިލްކުރީ، 1975 ވަނަ އަހަރު ލިވަޕޫލަށް ކޯޗުކޮށްދިން ބޮބް ޕޭސްލީ އެވެ.
ލީގުގައި މިރޭ ޗެލްސީން އަމިއްލަ ދަނޑުގައި 1-1 އިން ކްރިސްޓަލް ޕެލަސްއާ ވީ އެއްވަރެވެ. ނިކޮލަސް ޖެކްސަން ޗެލްސީ އަށް ލީޑުނަގައިދީފައިވަނިކޮށް، އެބްރެޗީ އެޒޭ ވަނީ ޕެލަސް އަށް އެއްވަރުކޮށްދީފަ އެވެ. ނިއުކާސަލް ޔުނައިޓެޑުން ވަނީ އަމިއްލަ ދަނޑުގައި 2-1 އިން ޓޮޓެންހަމް ހޮޓްސްޕާސް ބަލިކޮށްފަ އެވެ. ނިއުކާސަލްގެ ހާވީ ބާންސް ލަނޑެއް ޖަހާފައި އޮއްވައި، ޓޮޓެންހަމް އިން އެއްވަރުކުރީ، ނިއުކާސަލްގެ ޑެން ބާންސް އަތުން ބައިކޮޅަށް ވަން ގޯލުންނެވެ. އެކަމަކު، އަލެކްސަންޑަ އިސާކް ވަނީ ލަނޑެއް ޖަހައި، ނިއުކާސަލް މޮޅުކޮށްދީފަ އެވެ.
