ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އަކީ އާންމުންގެ ހިއްސާ އޮންނަ ކުންފުންޏަކަށް ބަދަލުކުރަން ރައީސް ޑރ. މުހައްމަދު މުއިއްޒު ވިސްނަވާފައިވާ ކަމަށް ހައުސިން މިނިސްޓަރު ޑރ. އަލީ ހައިދަރު އަހުމަދު މިއަދު ވިދާޅުވެއްޖެ އެވެ.
ހައިދަރު ވިދާޅުވީ ކެބިނެޓު ބައްދަލުވުމުގައި އެޗްޑީސީއަކީ އާންމުންގެ ހިއްސާ އޮންނަ ކުންފުންޏަކަށް ބަދަލު ކުރުމަށް ރައީސް މުއިއްޒުގެ ވިސްނުންފުޅާ އެއްގޮތަށް މަޝްވަރާ ކުރެވުނު ނަމަވެސް، އެކަމަށް ގޮތެއް އަދި ނިންމާފައި ނުވާ ކަމަށެވެ.
"މިއަދު ކެބިނެޓުގައި ނުނިންމެވި ނަމަވެސް، ރައީސް ވިސްނަވާފައި އޮތީ އެޗްޑީސީއަކީ އާންމުންގެ ހިއްސާ ވެސް އޮންނަ ކުންފުންޏަކަށް ހަދަން، ޕަބްލިކް ލިމިޓެޑް ކޮމްޕެނީއެއް ގޮތަށް،" ހައިދަރު ވިދާޅުވި އެވެ.
ހައިދަރު ވިދާޅުވީ އެކަމާ ގުޅިގެން ހަދަން ޖެހޭ ދިރާސާތައް ހެދުމަށްފަހު ކުރިއަށް އޮތް ދުވަސްތަކުގައި އެކަމާ ގުޅޭ މައުލޫމާތުތައް ހިއްސާ ކުރާނެ ކަމަށެވެ.
ސަރުކާރުގެ ސައްތައިން ސައްތަ ހިއްސާ އޮންނަ އެޗްޑީސީއަކީ ހުޅުމާލޭގެ އެކި ތަރައްގީގެ ޕްރޮޖެކްޓްތައް ކުރިއަށް ގެންގޮސް، ޕްލޭން ކުރަމުންދާ ކުންފުންޏެކެވެ.
