މޯލްޑިވްސް ޑިމޮކްރަޓިކް ޕާޓީ (އެމްޑީޕީ) އިން ށ. މާއުނގޫދޫގައި ނެގި އެ ޕާޓީގެ ބޮޑު ދިދައެއް ކަނޑައިލި މައްސަލައެއް ފެންމަތިވެއްޖެ އެވެ.
އެމްޑީޕީ މެންބަރުން އެ ރަށުގައި ރޭ ނެގި މި ބޮޑު ދިދަ 24 ގަޑިއިރު ނުވަނީސް ގެއްލުންދީ މޫދަށް އެއްލައިލާފަ އެވެ.
މިކަން ކުށްވެރިކޮށް އެ ޕާޓީގެ ރައީސް އަބްދުﷲ ޝާހިދު "އެކްސް" ކުރެއްވި ޕޯސްޓެއްގައި ވަނީ އިދިކޮޅުގައި އޮންނަ ޕާޓީއަށް ފުރުސަތު ލިބެން ޖެހޭނެ ކަމަށާއި އަދި ސުލްހަވެރި ސިޔާސީ ހަރަކާތްތަކަށް ފަރިތަވާން ޖެހޭ ކަމަށެވެ.
"އެމްޑީޕީގެ މެމްބަރުން ނެގި ބޮޑުދިދަ، ނެގިތާ 24 ގަޑިއިރުވެސް ނުވަނީސް ރޭގެ ވަގުތެއްގައި ދިދައަށް ގެއްލުންދީ މޫދަށް އެއްލާލުން ކުށްވެރިކުރަން. ސުލްހަވެރި ސިޔާސީ ހަރަކާތަށް ފަރިތަވާން އެބަޖެހޭ. އިދިކޮޅު ޕާޓީއަށް ގައުމުގެ ސިޔާސީ ވެށީގައި ޖާގަ ލިބެން ޖެހޭނެ." އެ ޕޯސްޓުގައި ޝާހިދު ވިދާޅުވި އެވެ.
މި އަމަލުކުރި ފަރާތްތައް ހޯދާ އެ ފަރާތްތަކާއި މެދު ފިޔަވަޅު އެޅުމަށް ޝާހިދު ސަރުކާރަށް ގޮވާލައިފައިވެ އެވެ.
މި ކަމާއި ގުޅޭގޮތުން ގިނަ ބަޔަކު ދަނީ ސޯޝަލް މީޑިއާގައި ނުރުހުން ފާޅުކުރަމުންނެވެ. އެގޮތުން ސަރުކާރެއް ފެއިލްވެ ގޮތް ހުސްވީމާ މިފަދަ ކަންތައްތައް ހިނގާނެ ކަމަށާއި އަދި އަޑު ކަނޑުވަން ކިތަންމެ މަސައްކަތެއް ކުރިކަމުގައިވި ނަމަވެސް ފަހަތަށް ނުޖެހޭނެ ކަމަށް އެ ޕާޓީގެ ބައިވެރިން ބުނެ އެވެ.
