މިދިޔަ އަހަރު ކުރީކޮޅު، މާފަންނު މުރަނގަ މަގުގައި ހުންނަ ކްރާސާ ފިހާރަ ތެރޭގައި ސ. ހިތަދޫ، އިޒުމީރު، އަހުމަދު މުހައްމަދު ދީދީ (ނައުޝާދު/ނައުއްޓެ) މަރާލި މައްސަލާގައި ދައުލަތުން ކުރާ ދައުވާއަށް އިބްރާހިމް ފައިހު އަދި ސިރުހާން މިއަދު އިންކާރުކޮށްފި އެވެ.
ސ. މަރަދޫފޭދޫ، ރަށްދެބައިގެ، އިބްރާހީމް ފައިހް ނިޒާމު އާއި ތ. ގާދިއްފުށި، ގުލޭނޫރައްމާގެ، ސިރުހާން އަލީގެ މައްޗަށް ދައުލަތުން ކުރަނީ ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާ އެވެ.
މި މައްސަލަ މަދަނީ މިންގަނޑުން ކުރިއަށް ގެންދެވޭނެ ކަމަށް މައްސަލަ ބައްލަވާ ގާޒީ އައިޝަތު ނުޒުހާ މިއަދުގެ އަޑުއެހުމުގައި ނިންމެވި އެވެ. މިއަދުގެ އަޑުއެހުން ނިންމާލީ ސެޕްޓެމްބަރު 4، ގައި އެ މައްސަލައިގައި އިތުރު އަޑުއެހުމެއް ބާއްވާނެ ކަމަށް އިއުލާނުކޮށްފަ އެވެ.
ކްރާސާ ފިހާރަ ތެރޭގައި ނައުޝާދަށް ވަޅިން ހަމަލާ ދިނީ ފެބްރުއަރީ 24، 2023، ވަނަ ދުވަހު 9:30 ހާއިރެވެ. އޭނާއަށް ލިބުނު އަނިޔާތަކަށް އައިޖީއެމްއެޗްގައި ފަރުވާ ދެނިކޮށް މަރުވީ އޭގެ ތިން ދުވަސް ފަހުންނެވެ.
ފައިހު އާއި ސިރުހާން ވެސް ޝަރީއަތް ނިމެންދެން ބަންދުކޮށްފައިވާއިރު، ފައިހުއަކީ މިދިޔަ އަހަރު ޖެނުއަރީ މަހު އަދި ފެބްރުއަރީ މަހު ކުރީކޮޅު، މާލޭގައި ހިނގި ސިލްސިލާ މާރާމާރީތަކާ ގުޅިގެން ފުލުހުން ހޯދަން އިއުލާން ކުރި މީހެކެވެ.
އޭގެ ކުރިން ވެސް އޭނާއަކީ މާރާމާރީގެ ކުށުގެ ރެކޯޑު އޮތް މީހެކެވެ. އަދި މާރާމާރީގެ އިތުރު ދައުވާތަކެއް ވެސް އޭނާގެ މައްޗަށް އުފުލައިގެން، ޝަރީއަތް ކުރިއަށް އެބަ ދެ އެވެ.
ފުލުހުންނަށް ފިލައިގެން މަހަކަށް ވުރެ ގިނަ ދުވަހު އުޅުމަށް ފަހު، ފައިހު އަތުވީ އޭނާ އަމިއްލައަށް ފުލުހުންނަށް ހަވާލު ވުމުންނެވެ. އޭނާ ފޮރުވައިގެން އުޅުނު ކަމަށް ތުހުމަތުކޮށް ވެސް ދެ މީހެއްގެ މައްޗަށް ދައުވާ ކޮށްފައިވެ އެވެ.
