ޖަލުގައި ހުކުމް ތަންފީޒު ކުރަމުންދާ ގައިދީންގެ މަސައްކަތުގައި ހަރަކާތްތެރިވާ ގައިދީން އެ މަސައްކަތުގައި ހޭދަކުރާ ކޮންމެ ދުވަހެއް އެ މީހުންގެ ހުކުމުން އުނިކުރަން ނިންމާފައިވާކަން ހޯމް މިނިސްޓަރު އަލީ އިހުސާން މިއަދު ހާމަކުރައްވައިފި އެވެ.
މާފުށީ ޖަލުގައި ގާއިމުކުރި "ދިވެހި ސަގާފީ ގޯތި" އިފްތިތާހު ކުރުމުގެ ޖަލްސާގައި ވާހަކަ ދައްކަވަމުން އިހުސާން ވިދާޅުވީ ޖަލުގައި ކުރާ މަސައްކަތަކީ ދެމެހެއްޓެނިވި ގޮތެއްގައި ކުރާ މަސައްކަތަކަށް ވާނެ ކަމަށެވެ. އަދި, އެ މަސައްކަތުގެ ތެރެއިން އާމްދަނީ ހޯދައި އޭގެއިން ބައެއް ގައިދީންނަށް ލިބޭނެ ގޮތް ހަދާނެ ކަމަށް އޭނާ ވިދާޅުވި އެވެ.
"ގައިދީންގެ ތެރެއިން ރިހެބިލިޓޭޝަންގެ މަސައްކަތުގައި ބައިވެރިވާ ކޮންމެ ގައިދީއަކު, އެއީ އިލެކްޓްރިކަލް އިންޖިނިއަރިން ދާއިރާ ވިޔަސް, ރޭނުގެ ދާއިރާ ވިޔަސް, ސަގާފަތުގެ ދާއިރާ ވިޔަސް, މަސައްކަތް އުނގެނުމަށް ނުވަތަ ޖަލުގައި މަސައްކަތް ކުރާ ކޮންމެ ދުވަހަކީ އޭނާގެ ޖަލު ހުކުމުން އެއް ދުވަސް އިތުރަށް ކެނޑިގެންދާނެ ދުވަހެއްގެ ގޮތުގައި ހަމަޖެއްސުން," އިހުސާން ވިދާޅުވި އެވެ.
ގާނޫނުތަކަށް ގެންނަން ޖެހޭ ބަދަލުތައް ގެނެސް ހަރުދަނާ ގޮތެއްގައި އެކަން ކުރިއަށްގެންދާނެ ކަމަށް އިހުސާން ވިދާޅުވި އެވެ.
ޖަލުގައި ކުރާ މަސައްކަތުން ހުކުމުން އުނިވާ ގޮތަށް ބޭރު ގައުމުތަކުގެ ޖަލުތަކުގައި ވެސް އަމަލުކުރެ އެވެ. މިއީ ކުށް ކުރުން މަދުވެ ގައިދީންނަށް މުޖުތަމައުގެ ތެރެއަށް އަނބުރާ އައިސް އުޅުމަށް ފަސޭހަކޮށްދޭ ކަމެއްކަން އެ ގައުމުތަކުގެ ތަޖުރިބާއިން އެނގެ އެވެ.
