ފައިނަލުގައި މުބާރާތް ބޭއްވި ގައުމު ނޭޕާލް 4-1 އިން ބަލިކޮށް، ބަަންގްލަދޭޝް އިން ފުރަތަމަ ފަހަރަށް ސާފް 20 އަހަރުން ދަށުގެ ފުޓްބޯޅަ މުބާރާތުގެ ޗެމްޕިއަންކަން ހޯދައިފި އެވެ.
މީގެ ކުރިން ސާފް އިން 19 އަހަރާއި 20 އަހަރުން ދަށަށް މި މުބާރާތް ބޭއްވިއިރު، ނޭޕާލުން ދެ ފަހަރު އަދި އިންޑިއާ އިން ތިން ފަހަރު ވަނީ ކާމިޔާބުކޮށްފަ އެވެ. ބަންގްލަދޭޝް އިން ވަނީ މި ފަހަރުގެ މުބާާރާތުގެ ސެމީ ފައިނަލުގައި، ޕެނަލްޓީ ޖަހައިގެން އިންޑިއާ ބަލިކުރުމަށް ފަހު، ފައިނަލްގައި ނޭޕާލްގެ މައްޗަށް ކުރިހޯދައިފަ އެވެ.
މި މުބާރާތުގެ މެޗުތައް ދަސަރަތު ރަންގްސާލާ ސްޓޭޑިއަމްގައި ކުޅެން އޮތް ނަމަވެސް ފަހުން ބަދަލުކުރީ އަންފާ ކޮމްޕްލެކްސް އަށެވެ. އެއީ ދަސަރަތު ސްޓޭޑިއަމްގެ ހާލަތު އޮތްގޮތުންނެވެ. ފުރަތަމަ ވިސްނީ، ސެމީ ފައިނަލާއި ފައިނަލް ދަސަރަތުގައި ކުޅޭ ގޮތަށެވެ. އެކަމަކު، ފަހުން ހުރިހާ މެޗެއް ކުޅުނީ ވެސް އަންފާ ކޮމްޕްލެކްސްގަ އެވެ.
ނޭޕާލުން ވަނީ މި ފަހަރުގެ މުބާރާތުގެ ގްރޫޕް ސްޓޭޖުގައި 2-1 އިން ބަންގްލަދޭޝް ބަލިކޮށްފަ އެވެ. އެހެންވެ، ފައިނަލުގެ ފޭވަރިޓުންނަކީ ނޭޕާލް ކަމަށް ބެލެވުނެވެ. އެކަމަކު، ފައިނަލްގައި ބަންގްލަދޭޝް ވަނީ ތަފާތު ރޫހެއްގައި ކުޅެ ކާމިޔާބު ހޯދައިފަ އެވެ.
ފުރަތަމަ ހާފުގެ އިތުރު ވަގުތުގައި ބަންގްލަދޭޝްގެ މިރާޖުލް އިސްލާމް ވަނީ ލަނޑު ޖަހައި އެ ޓީމަށް ލީޑުނަގައިދީފަ އެވެ. ދެ ވަނަ ހާފް ފެށިގެން 10 މިނިޓް ތެރޭ މިރާޖުލް އިތުރު ގޯލެއް ޖަހައި، އެ ޓީމަށް ހަމަޖެހުމެއް ހޯދައިދިނެވެ.
މެޗުގެ 71 ވަނަ މިނިޓްގައި ބަންގްލަދޭޝްގެ ރަބީ ހުސެން ރާހުލް ލަނޑެއް ޖަހައި، އެ ޓީމަށް އުންމީދުތައް ބޮޑުކޮށްދީފައިވަނިކޮށް، ނޭޕާލްގެ ސާމިރު ތަމަންގް ގޯލެއް ޖަހައި ހިތްވަރު ކުރެވޭތޯ މަސައްކަތް ކުރި އެވެ. އެކަމަކު، އިތުރު ވަގުތުގައި ބަންގްލަދޭޝް އިން ހަތަރު ވަނަ ލަނޑު ޖަހައި މޮޅުވީ އެވެ. މި ލަނޑު ޖެހީ، އިތުރު ވަގުތުގެ ހަ ވަނަ މިނިޓްގައި ޕައިޝް އަހުމަދު ނޯވާ އެވެ.
