ކުރީގެ ރައީސް އަބްދުﷲ ޔާމީންގެ ވެރިކަމުގައި މިހާރުގެ ރައީސް ޑރ. މުހައްމަދު މުއިއްޒުއާ ސިޔާސީ މަޝްވަރާއެއް ވެސް ނުކުރައްވާ ކަމަށާއި އެމަނިކުފާނާއެކު ފައިސާގެ މުއާމަލާތެއް ވެސް ނުހިންގާ ކަމަށް ކުރީގެ ޕޮލިސް ކޮމިޝަނަރު އަބްދުﷲ ރިޔާޒު މިއަދު ވިދާޅުވެއްޖެ އެވެ.
ޔާމީންގެ ޕާޓީ ޕީއެންއެފް އިން ބޭއްވި ޖަލްސާއެއްގަައި ކުރި ތުހުމަތަކަށް މިއަދު ސޯޝަލް މީޑިއާގައި ރައްދު ދައްކަވަމުން ރިޔާޒު ވިދާޅުވީ، އެންމެ ފަހުން ބޭއްވި ރިޔާސީ އިންތިހާބުގެ ކުރިން ރައީސް މުއިއްޒުއާ ސިޔާސީ މަޝްވަރާއެއް ވެސް ކުރައްވާފައި ނޯންނާނެ ކަމަށެވެ.
"ކަނޑައެޅިގެން ބޮޑުދޮގެއް! 2023 ރިޔާސީ އިންތިހާބުގެ ދެ ވަނަ ބުރުގެ ކުރިން ސިޔާސީ އެއްވެސްކަ މެއްގައި ރައީސް ޑރ. މުއިއްޒު އާއި ވާހަކަ ދައްކާ މަޝްވަރާކޮށް ހަދާފައިނުވާނެ. އަދި 14 މިލިޔަންރުފިޔާއެއްގެ އެއްވެސް މުއާމަލާތެއް ފޯނުން، މެސެޖުން ނުވަތަ އަނގަބަހުން ރައީސް ޑރ. މުއިއްޒުއާ ކޮށްފަނުވާނެ،" ރިޔާޒު އެކްސްގައި ކުރެއްވި ޕޯސްޓެއްގައި ވިދާޅުވި އެވެ.
ޕީއެންއެފް އިން ހޯމަ ދުވަހުގެ ރޭ ބޭއްވި ޖަލްސާއެއްގައި ވާހަކަ ދައްކަމުން ސިފައިންގެ ކުރީގެ ކާނަލް އަހުމަދު ފަޔާޒް (ޕާޕާ) ވިދާޅުވީ، ރައީސް މުއިއްޒުއަށް ކުރީގެ ނައިބު ރައީސް އަހުމަދު އަދީބުގެ ފަރާތުން 14 މިލިއަން ރުފިޔާ ލިބިވަޑައިގެންނެވިކަން، ރިޔާޒާއި މުއިއްޒުއާ ދެމެދު ކުރި ފޯނު މުއާމަލާތްތަކުން އެނގޭ ކަމަށެވެ.
ނައިބު ރައީސްއަކަށް އަދީބު ހުންނެވިއިރު އަދި އޭގެ ކުރި ޓުއަރިޒަމް މިނިސްޓަރަކަށް ހުންނެވިއިރު އެމްއެމްޕީއާރްސީގެ ފައިސާއިން ވަރަށް ގިނަ ސިޔާސީ މީހުންނަށް ރިޝްވަތު ދިން ކަމަށްވެ އެވެ. ނަމަވެސް ރައީސް މުއިއްޒު ވަނީ އެމްއެމްޕީއާރްސީގެ އެއްވެސް ފައިސާއެއް އަދީބު އަތުން ލިބިވަޑައިގެންނެވި ވާހަކަ ދޮގު ކުރައްވައިފަ އެވެ.
"އެމްއެމްޕީއާރުސީގެ ފައިސާއިން އަޅުގަނޑަށް 14 މިލިއަން ރުފިޔާ ލިބުނު ވާހަކަ. ތިބޭފުޅުން ބައްލަވާ، އެ ވާހަކަ ވިދާޅުވުމާ ހަމައަަށް އެމްޑީޕީގެ ވެރިކަމުގެ އެކި ފަހަރު މަތިން ބަދަލުކޮށްގެން ނެރުނު ލިސްޓުގައި ވެސް، ސިޔާސީ ބޭފުޅުންގެ ތެރޭގައި ވެސް ވިޔަފާރިކުުރުމާއި ޑޮލަރު މާރު ކުރުމާ އެކި ކަހަލަ ކަންމުގެ ތެރެއިން ވެސް އަޅުގަނޑުގެ ނަމެއް ނެތް. ނޯންނާނެ،" ވެރިކަން ހިންގާ ޕާޓީން ބޭއްވި ޖަލްސާއެއްގައި ހޯމަ ދުވަހު ރައީސް ވިދާޅުވި އެވެ.
