ރާއްޖެއަށް އެހީ ލިބޭނީ ގައުމުތަކުގެ އިތުބާރު ސަރުކާރަށް އޮންނަ މިންވަރަކުން ކަމަށް ކުރީގެ ފޮރިން މިނިސްޓަރު އަދި މިހާރު އެމްޑީޕީގެ ރައިސް އަބްދުﷲ ޝާހިދު މިއަދު ވިދާޅުވެއްޖެ އެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން ޝާހިދު ވިދާޅުވީ ގައުމެއްގައި އޮންނަ ސަރުކާރަކަށް އެހެން ގައުމަކުން އެހީއެއް ދޭނީ އެ ބޭނުންކުރާނެ ރަނގަޅު ގޮތަކާއި އުސޫލެއް ވެސް ދައްކައިގެން ކަމަށެވެ.
"ގައުމެއްގެ އެހީ ލިބޭނީ އަނެއް ގައުމެއްގަ އޮންނަ ސަރުކާރަކުން އެ ދޭ އެހީ ރަނގަޅަށް ބޭނުންކުރާނެ ކަމުގެ އިތުބާރު އޮވެގެން. އެ ގައުމެއްގެ ސަރުކާރުން އަމަލުކުރަމުން ގެންދަނީ އުސޫލުގެ ތެރެއިން،" ޝާހިދު ވިދާޅުވިި އެވެ.
އޭގެ އިތުރުން ޝާހިިދު ވިދާޅުވީ، އެހީ ދިނުމުގެ ކުރިން، ސަރުކާރު ވެރިކަމަށް އައުމަށްޓަކައި ބައިނަލްއަގުވާމީ މުޖުތަމައު އާ ޖެހިގެންފައި އޮތް މިންވަރާއި ބައިނަލްއަގުވާމީ އުސޫލުތައް ގަބޫލުކުރާ މިންވަރަށް ވެސް ގައުމުތަކުން ރިއާޔަތްކުރާނެ ކަމަށެވެ.
ޝާހިދު ވިދާޅުވީ މި ސަރުކާރު ވެރިކަމަށް އައުމުގެ ކުރިން ހުރިހާ ދިމާލަކުން ވެސް ފައިސާ ހަމަޖެހިފައި ހުރި ކަމަށް ވިދާޅުވި ކަމަށާއި ވެރިކަމަށް އައުމަށްފަހު ފެހި ސިގުނަލުތަކެއް ލިބުނު ވާހަކަ ދައްކަމުން ދާ ކަމަށެވެ.
ނުވަ މަސް ދުވަސް ވީއިރު ވެސް އެހީއެއް ނުލިބުމަކީ މި ސަރުކާރަށް ބައިނަލްއަގުވާމީގެ އިތުބާރު ނުލިބުން ކަަމަށް ވެސް ޝާހިދުގެ ވާހަކައިގައި ފާހަގަކުރި އެވެ.
