ދިރާގު މޯލްޑިވްސް ރޯޑް ރޭސްގެ (ޑީއެމްއާރްއާރް) ގެ އާ ކެޓަގަރީ އޮފީސް/ރިސޯޓް ފަސް ކިލޯ މީޓަރު ޓީމް އިވެންޓް ކެޓަގަރީއެއް ވަނީ މިއަހަރު ތައާރަފްކޮށްފަ އެވެ.
ދިރާގުން ބުނީ އެ ކެޓަގަރީ ތައާރަފް ކުރުމުގެ މަގްސަދަކީ އެކި ރިސޯޓުތަކާއި އޮފީސްތަކުގައި މަސައްކަތް ކުރާ މުވައްޒަފުންނަށް ޓީމެއްގެ ގޮތުގައި ބައިވެރިވެ، ވާދަވެރި މާހައުލެއްގައި އެކި މުއައްސަސާތައް ތަމްސީލު ކުރުމުގެ ފުރުސަތު ފަހިކޮށްދިން ކަމަށެވެ.
"އަލަށް ތައާރަފްކުރި އޮފީސް/ރިސޯޓް ކެޓަގަރީއާ އެކު އެކި މުއައްސަސާތަކުގެ މުވައްޒަފުންނަށް ހަތަރު މީހުންގެ ޓީމެއްގެ ގޮތުގައި ބައިވެރިވެވޭނެ. މުއައްސަސާއެއް ތަމްސީލުކުރުމަށް ކިތަންމެ ގިނަ ޓީމަކަށްވެސް ޑީއެމްއާރްއާރް 2024 ގައި ރަޖިސްޓްރީވެވޭނެ،" ދިރާގުން ބުންޏެވެ.
ދިރާގުން ބުނީ ކޮންމެ ރިސޯޓު، ސަރުކާރުގެ އިދާރާ، ސަރުކާރުގެ ހިއްސާވާ ކުންފުނި އަދި ޕްރައިވެޓް ސެކްޓަރުގެ މުވައްޒަފުންނަށް ވެސް އެ ފަރާތެއްގެ މުއައްސަސާ ތަމްސީލުކުރުމުގެ ޓީމްތައް އެކުލަވާލާ، ރަޖިސްޓަރކުރެވޭނެ ކަމަށެވެ.
ޓީމެއްގެ ގޮތުގައި ރަޖިސްޓާ ކުރާ ކޮންމެ މެމްބަރެއްގެ ރަޖިސްޓްރޭޝަން ފީއަކީ 250ރ.
ރޯޑް ރޭސްގައި ރަޖިސްޓްރީވާން ޝައުގުވެރިވާ ފަރާތްތަކުންނާއި ދުވުމާ ބެހޭ މައުލޫމާތު ހޯދުމަށް ޑީއެމްއާރްއާރް ޕޯޓަލްއިން ލިބޭނެ އެވެ.
އޮފީސް/ރިސޯޓް ކެޓަގަރީގެ މޮޅުވާ ޓީމުތައް ހޮވާނީ ޓީމުގެ ހުރިހާ މެމްބަރުން ރޭސް ނިންމާ ޖުމްލަ ވަގުތައް ބަލާފަ އެވެ. އަދި ހުރިހާ މެމްބަރުންވެސް 5K ރޭހުގެ ކަޓް-އޮފް ވަގުތުކަމަށްވާ 45 މިނެޓުގެ ތެރޭގައި ރޭސް ނިންމަންވާނެ އެވެ.
އޮފީސް/ރިސޯޓް ކެޓަގަރީގެ އިނާމުތަކަކީ:
• ޗެމްޕިއަން ޓީމް: 10،000ރ.
• ރަނަރަޕް ޓީމް: 8،000ރ.
• ތިންވަނަ ޓީމް: 6،000ރ.
ޓީމްތަކުގައި ހުސް ފިރިހެން، ހުސް އަންހެން ނުވަތަ އަންހެން އަދި ފިރިހެން ބައިވެރިންނަށް ވެސް ދުވެވޭނެ އެވެ. ނަމަވެސް އެ ކެޓެގަރީގައި ބައިވެރިވާ ފަރާތްތަކަށް އެ ނޫން އެހެން ކެޓެގަރީއެއްގައި ބައިވެރިވުމުގެ ފުރުސަތެއް ނުލިބޭނެ އެވެ.
ދިރާގު ރޯޑް ރޭސްއަކީ ވޯލްޑް އެތުލެޓިކްސް ސަޓިފައިޑް ރޭސް ރޫޓަކާއެކު އެސޯސިއޭޝަން އޮފް އިންޓަނޭޝަނަލް މެރަތަންސް އެންޑް ޑިސްޓަންސް ރޭސަސް (އެއިމްސް) ވޯލްޑް ރަނިން ކަލަންޑަރުގައި ލިސްޓުކޮށްފައިވާ ދިވެހިރާއްޖޭގެ ހަމައެކަނި ބައިނަލްއަގްވާމީ ދުވުމެވެ.
އެގޮތުން މިއަހަރު މި ފާހަގަކުރަނީ މި ރޭހުގެ 15 ވަނަ އެޑިޝަން އެވެ. މި ދުވުން މިއަހަރު ބޭއްވުމަށް ހަމަޖެހިފައިވަނީ އޮކްޓޯބަރު، 25 ވާ ހުކުރު ދުވަހު ހުޅުމާލެ ސެންޓްރަލް ޕާކްގަ އެވެ.
ކުޑަކުދިންގެ ރައްކާތެރިކަމަށް ހާއްސަކޮށްފައިވާ އެ ދުވުމުގައި ކުޑަކުދިންގެ ރައްކާތެރިކަމުގެ ދާއިރާގައި ހަރަކާތްތެރިވާ އެންޖީއޯތަކަށް އާންމުން ހޭލުންތެރިކުމާއި ފަންޑްރެއިޒް ކުރުމުގެ ފުރުސަތު ލިބިގެންދާނެ އެވެ.
ޑީއެމްއާރްއާރްގެ ރަޖިސްޓްރޭޝަން ދިރާގުން މިހާރުވަނީ ހުޅުވާލާފައެވެ. އަދި 4،000 ބައިވެރިންގެ ލިމިޓް ހަމަވަންދެކަށް އެ އިވެންޓްގައި ރަޖިސްޓާ ކުރުމުގެ ފުރުސަތު ހުޅުވިފައި އޮންނާނެ އެވެ.
