ރައީސް ޑރ. މުހައްމަދު މުއިއްޒު، ބޭންކު އޮފް މޯލްޑިވްސްގެ ނިންމުތައް ނިންމާނެ ގޮތުގެ އަމުރު ކުރައްވަމުން ގެންދަވަނީ ބޭންކިން ގާނޫނަށް ހިލާފަށް ކަމަށް ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެ އެވެ.
އޭނާ އެހެން ވިދާޅުވީ، ރުފިޔާ ކާޑުތަކުން ޑޮލަރުގެ މުއާމަލާތް ނުކުރެވޭ ގޮތަށް މިއަދު ބޭންކް އޮފް މޯލްޑިވްސްއިން ބަދަލު ގެނައީ ރައީސްމުއިއްޒު ސީދާ އަންގަވާފައި އޮތް ގޮތާ ހިލާފަށް ކަމަށް އިކޮނޮމިކް މިނިސްޓަރު، މުހައްމަދު ސައީދު ވިދާޅުމާ ގުޅިގެން ރައްދު ދެއްވަމުންނެވެ.
މިރޭ ކުރިއަށްދިޔަ އިދިކޮޅު އެމްޑީޕީގެ ގައުމީ މަޖިލީހުގެ ކުއްލި ބައްދަލުވުމެއްގައި މާރިޔާ ވިދާޅުވީ، ރައީސްވެސް މަސައްކަތް ކުރައްވަންވާނީ ގާނޫނާ އެއްގޮތަށް ކަމަށެވެ. އަދި، އެމަނިކުފާނު، ބޭންކަށް ކަންކުރަންވީ ގޮތް އެންގެވުމަށް ބޭންކިން ގާނޫނުން ފުރުސަތު ދޭތޯ އޭނާ ސުވާލު އުފެއްދެވި އެވެ.
"މާލީ ނިޒާމާ ދޭތެރޭގަ އަޅުގަނޑުމެންގެ އިތުބާރު ގެއްލެނީ. އަޅުގަނޑުމެންގެ ބޭންކު އެކައުންޓުތައް، މިހާރު މި ރާއްޖޭގެ ބޭންކުތަކުގެ ބަހައްޓައިގެން ތިބެން ބިރުގަންނަ ހިސާބަށް [މި] ދަނީ،"
އަދި، މާދަމާ ރައީސް އެކައުންޓުތަކަށް ގޮތްތަކެއް ހަދަން މާދަމާ އެންގުމުން އެކަން ވުމުގެ ބިރު އޮތްކަމަށްވެސް މާރިޔާ ވިދާޅުވި އެވެ.
"އަނެއްކާ އެންގެވީމަ މުޅި އެތި ބަދަލުވީ. މިވެސް އަޖައިބެއްކަހަލަ ކަމެއް. އަޅުގަނޑަށް މިއަދު ތިން އީމެއިލް ބޭންކް އޮފް މޯލްޑިވްސް އިން ފޮނުވި. ފުރަތަމަ އެތީގަ އޮތީ އެއް ވާހަކައެއް. ދެވަނަ އެތީގަ އޮތީ އެހެން ވާހަކައެއް. ތިންވަނަ އެތީގަ އޮތީ މުޅިން އެހެން ވާހަކައެއް،" މާރިޔާ ވިދާޅުވި އެވެ.
ޑޮލަރު މުއާމަލާތްތަކުގެ ލިމިޓަށް ބީއެމްއެލުން މިއަދު ގެނައި ބަދަލު އުވައިލަން އެ ބޭންކުން ނިންމީ މެންދުރުފަހު އެވެ. ނިންމުން ބަދަލު ކުރީ އެމްއެމްއޭގެ އިރުޝާދުގެ ދަށުން ކަމަށް ވެސް ބީއެމްއެލުން ބުންޏެވެ.
ނިންމުން ބަދަލުކުރުމުގެ ކުރިން ބީއެމްއެލްގެ ސީއީއޯ އާއި އެމްއެމްއޭގެ ގަވަރުނަރާ އެކު ރައީސް މުއިއްޒު ވަނީ ބައްދަލުކުރައްވާފަ އެވެ.
