މެންޗެސްޓާ (އޮގަސްޓް 22) - ބާސެލޯނާއާ އެކު ހަދާފައިވާ ކޮންޓްރެކްޓް އުވާލުމަށް ފަހު، ޖަރުމަނުގެ މިޑްފީލްޑަރު، އިލްކާއި ގުންޑޮގާން، އެނބުރި ކުރީގެ ކްލަބް މެންޗެސްޓާ ސިޓީ އަށް ސޮއިކުރަން އެއްބަސްވެއްޖެ އެވެ.
ސިޓީއާ އެކު، ގުންޑޮގާން، 33، ހަދާފައި އޮތް ކޮންޓްރެކްޓް މިދިޔަ އަހަރު ހަމަވުމުން، އޭނާ ބާސެލޯނާ އަށް ބަދަލުވީ، ދެ އަހަރުގެ ކޮންޓްރެކްޓެއްގަ އެވެ. އެކަމަކު، އެއް އަަހަރު ފަހުން، ގުންޑޮގާން ބާސެލޯނާ ދޫކޮށްލަން ނިންމީ ކޮންޓްރެކްޓްގައި ބާކީ އޮތް އަހަރަށްވާ މުސާރަ ވެސް ނުނަގާ ގޮތަށް އެއްބަސްވުން އުވާލައިފަ އެވެ.
ދާދި ފަހުން، ޖަރުމަނު ގައުމީ ޓީމުން ރިޓަޔާކުރިކަން އިއުލާނުކުރި، ގުންޑޮގާން، ބާސެލޯނާ ދޫކޮށްލަން އެއްބަސްވީ، އެ ކްލަބްގެ ކޯޗު، ޖަރުމަނުގެ ހަންސީ ފްލިކް އާއި ޑިރެކްޓަރު، ޑެކޯއާ އެކު ބޭއްވި ބައްދަލުވުމަކަށް ފަހު އެވެ.
ގުންޑޮގާން އަލުން ސިޓީއާ ގުޅޭނީ އެއް އަހަރުގެ ކޮންޓްރެކްޓެއްގައި ކަމަށް އިނގިރޭސި މީޑިއާތަކުން ވަނީ ރިޕޯޓްކޮށްފަ އެވެ.
ޖަރުމަންގެ ބޮރޫޝިއާ ޑޯޓްމަންޑް އިން 2016 ވަނަ އަހަރު ސިޓީ އަށް ބަދަލުވި ގުންޑޮގާން އަކީ އެ ޓީމުގެ އެންމެ މުހިންމު އެއް ކުޅުންތެރިޔާއެވެ. ގުންޑޮގާން އަކީ ސިޓީގެ ކޯޗުކަމާ ސްޕެއިންގެ ޕެޕް ގާޑިއޯލާ ހަވާލުވެ، އެ ކްލަބަށް ގެނައި ފުރަތަމަ ކުޅުންތެރިޔާ އެވެ. ގުންޑޮގާން ވަނީ ސިޓީ އަށް ކުޅުނު 304 މެޗުގައި 60 ލަނޑު ޖަހައިފަ އެވެ. އަދި އެ ކްލަބާ އެކު ޖުމްލަ 12 ތަށި އޭނާ ހޯދި އެވެ.
