ދިރާގު ފިންޓެކް ޕްރައިވެޓް ލިމިޓެޑަށް ޕޭމަންޓް ހިދުމަތް ދިނުމުގެ ލައިސަންސް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މިއަދު ދޫކޮށްފި އެވެ.
އެމްއެމްއޭއިން ބުނީ ގައުމީ ޕޭމަންޓް ސިސްޓަމުގެ ގާނޫނުގެ ދަށުން ދިރާގު ފިންޓެކަށް ރާއްޖޭގައި އިލެކްޓްރޯނިކް މަނީ އިޝޫ ކުރުމުގެ ހިދުމަތް ދިނުމަށް ބޭނުންވާ ލައިސަންސް ދޫކޮށްފައިވާ ކަމަށެވެ.
މިއާއެކު ދިރާގުން މިހާރު ދެމުން އަންނަ އިލެކްޓްރޯނިކް މަނީ އިޝޫ ކުރުމުގެ ހިދުމަތް ދިރާގު ފިންޓެކުގެ ދަށަށް ވަނީ ބަދަލު ކުރެވިފަ އެވެ.
ދިރާގު ޕޭއި ހިދުމަތް ކުރިއަށް ގެންދިއުމަށް "ދިރާގު ފިންޓެކް" ނަމުގައި ދިރާގުގެ ސަބްސިޑިއަރީ ކުންފުޏެއް އުފެއްދީ މިދިޔަ ޑިސެމްބަރު، 31 ގަ އެވެ. އެ ކުންފުނިން ދޭ މައިގަނޑު ހިދުމަތްތަކަކީ ދިރާގު ޕޭއި މެދުވެރިކޮށް ދޭ އީ ވޮލެޓް ހިދުމަތްތައް ކުރިއަށް ގެންދިއުމެވެ.
