ޖެންޑާ މިނިސްޓްރީގެ ކުރީގެ ސްޓޭޓް މިނިސްޓަރު ޒިފްލީނާ ހަސަން 3.5 މިލިއަން ރުފިޔާއަށް ފުލެޓެއް ބައްލަވައިގެން މައްސަލައިގެ ތަހުގީގު އަދި ނުނިމޭ ކަމަށާއި ޕްރޮސެކިއުޓަ ޖެނެރަލް އޮފީހާ އެކު މިހާރު މަޝްވަރާ ކުރަން ފަށާފައިވާ ކަމަށް އެންޓި ކޮރަޕްޝަން ކޮމިޝަން (އޭސީސީ) އިން ބުނެފި އެވެ.
އޭސީސީގެ މީޑިއާ އޮފިޝަލް "އަދަދު" ނޫހަށް ބުނީ ޕްރޮސެކިއުޓަ ޖެނެރަލް (ޕީޖީ) އަށް ފޮނުވީ ޑިއުޓީ ޕްރޮސެކިއުޝަނަށް ކަމަށެވެ. އެއީ އެ މައްސަލައިގެ ތަހުގީގު ގެންދާއިރު އެ އޮފީހުގެ ލަފާ ހޯދަމުން ކުރިއަށް ގެންދަން ވެގެން ފޮނުވީ ކަމަށް އޭނާ ބުންޏެވެ.
ޕީޖީ އޮފީހަށް ޑިއުޓީ ޕްރޮސެކިއުޝަނަށް މައްސަލަ ފޮނުވިކަން އެނގުމުން އެ މައްސަލާގައި އަދި ސުވާލު ވެސް ނުކުރާތީ ޒިފްލީނާ ކަންބޮޑުވުން ވެސް ފާޅުކުރައްވާފައިވެ އެވެ.
"އެއްވެސް ސުވާލެއް ނުކުރޭ. މިހާތަނަށް އެއްވެސް މުއާމަލާތެއް ނުކުރޭ" ޒިފްލީނާ ވިދާޅުވެފައިވެ އެވެ.
އެ ކަމާ ގުޅޭ ގޮތުން ސުވާލުކުރުމުން އޭސީސީގެ އޮފިޝަލް ބުނީ މައްސަލައިގެ ތަހުގީގު އަދި ނުނިމޭ ކަމަށެވެ. އަދި މައްސަލަ ކުރިއަށްދާ ވަރަކުން ސުވާލު ކުރަން ޖެހިއްޖެ ނަމަ އެކަން ވެސް ކުރާނެ ކަމަށް އޭނާ ބުންޏެވެ.
ޕަބްލިކް ޕްރޮސެކިއުޓަރު އަދި ޕީޖީން މީޑިއާތަކަށް މައުލޫމާތު ދެއްވުމަށް ހުންނަވާ އަހުމަދު ޝަފީއު ވެސް ވިދާޅުވީ ޒިފްލީނާ ފްލެޓް ގަތް މައްސަލަ ޑިއުޓީ ޕްރޮސެކިއުޝަނަށް އިއްޔެ އޭސީސީން ހުށަހަޅާފައިވާ ކަމަށެވެ.
މި މައްސަލަ ފެންމަތިވީ ފައިސާ ދެއްކުމުން ފުލެޓުގެ މިލްކުވެރިކަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ޒިފްލީނާގެ ނަން މައްޗަށް ބަދަލުކުރަން ސިވިލް ކޯޓުން ކުރި ހުކުމާ ގުޅިގެންނެވެ. އެއާއެކު މި ސަރުކާރާ ގުޅުން އޮތް މީހުންނާއި އާންމުން ދިޔައީ މި މައްސަލަ ބަލަން ގޮވާލަމުންނެވެ.
ސިވިލް ކޯޓުގެ ހުކުމުން އެނގޭ ގޮތުން ޒިފްލީނާ ފްލެޓު ބައްލަވައިގަތީ، ހުޅުމާލޭގައި ހުންނަ އެފްޑަބްލިއު ރެސިޑެންސްއިން 3.5 މިލިއަން ރުފިޔާއަށެވެ.
