ބާސެލޯނާ (އޮގަސްޓް 20) - ޖަރުމަނު ގައުމީ ޓީމުގެ ކެޕްޓަން، އިލްކާއި ގުންޑޮގާން އެ ޓީމުން ރިޓަޔާކުރަން ނިންމާފައިވާއިރު، އޭނާ ކުޅެމުން އަންނަ ބާސެލޯނާ ދޫކޮށްލަން ވެސް ވާހަކަ ދައްކަމުން އަންނަ ކަމަށް ރިޕޯޓްތައް ބުނެފި އެވެ.
ޖަރުމަނު ގައުމީ ޓީމަށް ކުޅުން ހުއްޓާލަން ނިންމި ނިންމުމާ ބެހޭގޮތުން، ގުންޑޮގާން، 33، ބުނީ މިއީ ގިނަ ދުވަސްތަކެއް ވަންދެން ވިސްނުމަށް ފަހު ނިންމި ނިންމުމެއް ކަމަށެވެ. އަދި ޖަރުމަނު ޓީމަށް 82 މެޗު ކުޅުމުގެ ފުރުސަތު ލިބިގެންދިއުމަކީ ހާއްސަ އުފަލެއް ކަމަށާއި އެންމެ ބޮޑު ފަހުރެއްގެ ގޮތުގައި ދެކެނީ، މި ފަހަރު ޖަރުމަނުގައި ބޭއްވި ޔޫރޯގައި އެ ޓީމުގެ ކެޕްޓަންކަން ކުރުމުގެ ފުރުސަތު ލިބުން ކަމަށް ގުންޑޮގާން ވަނީ ފާހަގަކޮށްފަ އެވެ.
ތުރުކީ ދަރިކޮޅަށް ނިސްބަތްވާ ގުންޑޮގާން އެންމެ ފުުރަތަމަ ޖަރުމަނު ސީނިއާ ޓީމަށް ކުުޅުނީ 2011 ވަނަ އަހަރު އެވެ. ތުރުކީގެ ރައީސް ރަޖަބް ތައްޔިބް އުރުދުގާނާ އެކު، ބޭއްވި ބައްދަލުވުމެއްގެ މައްސަލައިގައި ޖަރުމަނު ފުޓްބޯޅަ ސަޕޯޓަރުންގެ ނުރުހުން ގުންޑޮގާން އާއި މެސުޓް އޮޒިލް އަށް އަމާޒުވި ނަމަވެސް، ގުންޑޮގާން ވަނީ ގައުމީ ޓީމުގެ ކެރިއަރު ކުރިއަށްގެންގޮސްފަ އެވެ. އަދި އޭނާ ރިޓަޔާކުރިއިރު، ޖަރުމަނު ޓީމަށް 19 ލަނޑު ޖަހައިދީފައިވެ އެވެ.
މެންޗެސްޓާ ސިޓީގެ ކޮންޓްރެކްޓް ހަމަވުމުން، މިދިޔަ ސީޒަނުގައި ބާސެލޯނާ އަށް ބަދަލުވި ގުންޑޮގާން، އެއް އަހަރަށް ފަހު އެ ޓީމު ދޫކޮށްލަން ނިންމާފައިވާ ކަމަށް ސްޕެއިނުގެ މީޑިއާ ރިޕޯޓްތައް ބުނެ އެވެ. އިތުރު ދެ އަހަރަށް ބާސެލޯނާއާ އެކު ކޮންޓްރެކްޓް އޮތް ނަމަވެސް، ގުންޑޮގާން ނިންމައިގެން ހުރީ އެހެން ކްލަބަކަށް ދިއުމަށް ކަމަށް އެ ރިޕޯޓްތަކުގައިވެ އެވެ. ގުންޑޮގާން އަށް، ސްޕެއިން، އިންގްލެންޑް އަދި ސައުދީ އަރަބިއްޔާގެ ކްލަބްތަކުން އޮފާ ލިބިފައިވާއިރު، އޭނާގެ ކުރީގެ ޓީމު ސިޓީން ވެސް އަންނަނީ މަޝްވަރާކުރަމުންނެވެ.
