ނ. ކެނދިކުޅުދޫގައި 50 އެނދުގެ އީކޯ ލަގްޒަރީ ހޮޓަލެއް ތަރައްގީކުރުމަށް އެ ރަށު ކައުންސިލުން ސްޓާކެން ކޮންސަލްޓިންގް ޕްރައިވެޑް ލިމިޓެޑާ އެކު އެއްބަސްވުމެއްގައި މިއަދު ސޮއިކޮށްފި އެވެ.
ކެނދިކުޅުދޫ ކުޅީގައި ބޭއްވި ސޮއިކުރުމުގެ ރަސްމިއްޔާތުގައި ސްޓާކެންގެ ފަރާތުން އެއްބަސްވުމުގައި ސޮއިކުރީ އެ ކުންފުނީގެ ޑިރެކްޓަރު ސާމިހު މުހައްމަދު އެވެ. އަދި ކައުންސިލުގެ ފަރާތުން ސޮއިކުރެއްވީ ކައުންސިލުގެ ރައީސް މުހައްމަދު ރައޫފު އެވެ.
އެ ރަށު ކައުންސިލްގެ ރައީސް ރައޫފު "އަދަދު" އާ ވާހަކަދައްކަމުން ވިދާޅުވީ މިއީ އެ ރަށަށް ޓޫރިޒަމް ގެނައުމަށް ކުރެވޭ މަސައްކަތުގެ ތެރެއިން ވަރަށް ބޮޑު ޕްރޮޖެކްޓެއް ކަމަށެވެ. އަދި ކުރިއަށް އޮތްތަނުގައި ވެސް ބޮޑެތި ޕްރޮޖެކްޓްތައް ކުރެވޭނެ ކަމަށެވެ.
"މީ މިރަށަށް ޓޫރިޒަމް ގެނައުމަށް ހިންގޭ ވަރަށް ބޮޑު ޕްރޮޖެކްޓެއް. ރަށުގައި އަދި އެއްވެސް ވަރަކަށް ފަތުރުވެރިކަން ނެތްއިރު އުންމީދުކުރަނީ މިކަމުން ފަތުރުވެރިކަން ކުރިއަރާ ދިއުން. މިހާރު ވެސް ރަށުގައި އާންމު ފަަރުދަކު ގެސްޓްހައުސްއެއް ހެދުމުގެ މަސައްކަތް ކުރަމުން އެބަދޭ" ރައޫފު ވިދާޅުވި އެވެ.
އެކޯ ހޮޓާ އެޅުމުގެ އެއްބަސްވުމުގެ ދަށުން، ކެނދިކުޅުދޫން އެއް ހެކްޓަރު ބިން 50 އަހަރުގެ މުއްދަތަކަށް 50 އެނދުގެ ލަގްޒަރީ ހޮޓަލެއް އެޅުމަށާއި ފަތުރުވެރިންނަށް ބޭނުންވާނެ ހިދުމަތްތައް ގާއިމުކުރުމަށް ވަނީ ކުއްޔަށް ދީފަ އެވެ.
މި މަޝްރޫއުގެ އަމަލީ މަސައްކަތް ފެށުމަށް މިހާރު ތައްޔާރުވެފައިވާއިރު ސްޓާކެން ކުންފުނިން 80 މިލިއަން ރުފިޔާ މި ކަމަށް ހަރަދުކުރެ އެވެ. އަދި މަސައްކަތް އަންނަ އަހަރުގެ ސެޕްޓެމްބަރު މަހަށް ނިންމާލެވޭނެ ކަމަށް އެކުންފުނިން ލަފާކުރެ އެވެ.
ސަތޭކައަށް ވުރެ ގިނަ މުވައްޒަފުން މަސައްކަތް ކުރާނެ މި ހޮޓަލަށް މުވައްޒަފުން ނެގުމަށް ބޮޑަށް އިސްކަން ދޭނީ ކެނދިކުޅުދޫ ރައްޔިތުންނާއި ނޫނު އަތޮޅުގެ ރައްޔިތުންނަށް ކަމަށް އެ ކުންފުނިން ބުނެ އެވެ.
މާފަރު އިންޓަރނޭޝަނަލް އެއާޕޯޓުން ސްޕީޑް ބޯޓުގައި 10 ވަރަކަށް މިނެޓުން ދެވޭ ހިސާބުގައި އޮތް ކެނދިކުޅުދޫއަކީ، ގުދުރަތީ ގޮތުން ރީތި ކަނޑޫފަލަކާއި ކުޅިއެއް އޮތް ރަށެކެވެ. ކުޅި އާއި ކަނޑޫފަލަކީ ރާއްޖޭގެ ތިމާވެށި ހިމާޔަތްކުރުމާބެހޭ ގާނޫނުގެ ދަށުން ހިމާޔަތްކޮށްފައިވާ ތަންތަނެވެ. އެހެންކަމުން، ސްޓާކެންގެ ފަރާތުން މި ހޮޓާވެސް އަޅާނީ ތިމާވެއްޓަށް ހާއްސަ ސަމާލުކަމެއް ދީގެންނެވެ.
