ލަންޑަން (އޮގަސްޓް 19) - އިނގިރޭސި ޕްރިމިއާ ލީގުގެ އާ ސީޒަނުގައި ޗެލްސީން ކުޅުނު ފުރަތަމަ މެޗަށް ނެގި ސްކޮޑަށް އިނގިރޭސި ފޯވާޑް، ރަހީމް ސްޓާލިން ނަގާފައިނުވާތީ އޭނާ އެކަމާ ހިތްހަމަނުޖެހުން ފާޅުކޮށްފި އެވެ.
އަމިއްލަ ދަނޑުގައި ޗެލްސީން މެންޗެސްޓާ ސިޓީ އަތުން 2-0 އިން ބަލިވި މެޗަށް ނެގި ޗެލްސީގެ 20 ކުޅުންތެރިންގެ ސްކޮޑަށް ވެސް ސްޓާލިން ނާރަ އެވެ. މިއީ، 2012 ވަނަ އަހަރުގެ ފަހުން، ޕްރިމިއާ ލީގުގެ ފުރަތަމަ މެޗުތަކުގެ ސްކޮޑުގައި ސްޓާލިން ނެތް ފުރަތަމަ ފަހަރެވެ.
ޗެލްސީން މި ސީޒަނުގައި ސޮއިކުރި 11 ކުޅުންތެރިންނާ އެކު، އެ ކްލަބްގެ ވެބްސައިޓްގައިވާ ގޮތުން، 42 ކުޅުންތެރިން އެ ޓީމުގައި ހިމެނެ އެވެ. އެކަމަކު، ޗެލްސީގެ ކޯޗު، އެންޒޯ މަރެސްކާ ވަނީ އޭނާ ދެކޭ ގޮތުގައި ސްކޮޑަކީ 30 ކުޅުންތެރިން ކަމަށް ބުނެފަ އެވެ.
ޗެލްސީގެ ސްކޮޑުގައި ސްޓާލިން ނެތުމާ ގުޅޭގޮތުން، ސުވާލުކުރުުމުން، މަރެސްކާ ބުނީ، އެއީ ޓެކްނިކަލް ނިންމުމެއް ކަމަށާއި ކުރިއަށް އޮތް ދުވަސްތަކުގައި ކްލަބްގެ އެ ފަދަ ކަންކަން އިތުރަށް ސާފުވެގެންދާނެ ކަމަށެވެ.
މީގެ ދެ އަހަރު ކުރިން، ސިޓީން 60 މިލިއަން ޑޮލަރުގެ ޑީލެއްގައި ޗެލްސީއާ ގުޅުނު ސްޓާލިން އެ ޓީމަށް ކުޅުނު ދެ ސީޒަނުގައި ޖުމްލަ އެކު ޖެހުނީ، 19 ގޯލެވެ. ސްޓާލިން އަށް އެއް ފެންވަރެއްގައި ކުޅުން ދެމެހެއްޓުން އުނދަގޫ ކަމަކަށްވެފައިވާއިރު، ޗެލްސީގެ ސަޕޯޓަރުންގެ ނުރުހުން ވެސް އޭނާ އަށް ވަނީ އަމާޒުވެފަ އެެވެ.
ރިޕޯޓްތައް ބުނާގޮތުން، ސްޓާލިން ވަނީ ޗެލްސީގެ މެނޭޖްމަންޓް ގާތުގައި އޭނާގެ މުސްތަގުބަލާ ގުޅޭގޮތުން، ކްލަބުން ނިންމާ ގޮތެއް އޮޅުންފިލުވައިދޭން އެދިފަ އެވެ.
