ކ. ތުލުސްދޫގައި މިއަދު ފެށި އޭޝިއަން ސާފިން ޗެމްޕިއަންޝިޕަށް ޖުމްލަކޮށް ބަލާއިރު، ތައްޔާރީތައް ދިޔައީ ރަނގަޅަށް ކަމަށާއި މުބާރާތުގައި ރަނގަޅު ހިސާބަކަށް ދެވޭނެ ކަމުގެ އުންމީދު އެބައޮތް ކަމަށް ގައުމީ ސާފިން ޓީމުގެ ކޯޗު، ހުސެއިން އަރީފް (އިބޫ) ބުނެފި އެވެ.
ވިހި ގައުމުން 100 އަށް ވުރެ ގިނަ އެތުލީޓު އޭޝިއަން ސާފިން ޗެމްޕިއަންޝިޕްގައި މި ފަހަރު ވާދަކުރާއިރު، މިއީ، ގައުމީ ސާފިން ޓީމުގެ ކޯޗެއްގެ ގޮތުގަައި އިބޫ ނުކުންނާނެ އެންމެ ބޮޑު ޗެލެންޖެވެ.
"މި ތަނަށް (ތުލުސްދޫ އަށް) ހަތަރު ދުވަސް ނޫނީ ފަސް ދުވަސް ކުރިން އައިސްގެން މި ހަމަ ކޮންމެ ދުވަހަކުހެން ދެތިން ބުރަށް އެބަ ރާޅަށް އެރެން، އެއީ ހުރިހާ ކޮންޑިޝަނަކަށް ވެސް ޓީމު ކުދިން ހާނުވާލަން ރަނގަޅަށް. ކުދިންކޮޅު ވަރަށް ރަނގަޅަށް މި ވަގުތު އެ ތިބީ." މީގެ ހަ މަސް ކުރިން، ސާފިން ޓީމުގެ ކޯޗަކަށް ހަމަޖެއްސި އިބޫ، 46، "އަދަދު ސްޕޯޓްސް" އަށް ދިން އިންޓަވިއުއެއްގައި ބުންޏެވެ.
މި ފަހަރުގެ އޭޝިއަން ސާފިން ޗެމްޕިއަންޝިޕަކީ، 2026 ވަނަ އަހަރު ޖަޕާނުގައި ބާއްވާ އޭޝިއަން ގޭމްސްގެ ސާފިން އަށް ކޮލިފައިވުމުގެ އިވެންޓެކެވެ. އެހެންކަމުން، މި މުބާރާތުގައި ރަނގަޅު ކާމިޔާބެއް ހޯދައިފިނަމަ، ރާއްޖެ އަށް 2026 ވަނަ އަހަރުގެ އޭޝިއަން ގޭމްސް އިން ފުރުސަތު ލިބޭނެ އެވެ.
"ދެން، އުންމީދުކުރަނީ ވަރަށް ރަނގަޅު ހިސާބަކަށް، އެންމެ ބޮޑު އުންމީދަކީ ކޮލިފިކޭޝަނަށް، އެއީ ސީނިއާ މެންސްގެ، ދެން، ޖޫނިއާސް ވެސް މިހާރު އެ ހުރި ލެވަލް އިން ހަމަ ވަރަށް ދުރަށް ދާނެ ކަމަށް ދާނެ ކަމަށް، އުންމީދަކީ ޕޯޑިއަމް ފިނިޝް އެއް،" އެންމެ ފަހުން ބޭއްވި އޭޝިއާގެ ސާފިން ދެ މުބާރާތުގައި ވެސް މެޑަލް ހޯދި އިބޫ ބުންޏެވެ.
"އެ ކުދިން ޖެހޭނީ ހީޓް ސްޓްރެޓެޖީސް އާއި ހީޓް މެނޭޖްމަންޓް އަށް ވިސްނަން. އަހަރެެމެންގެ ލޯކަލް އެތުލީޓުންނަށް އެޑްވާންޓޭޖް އޮންނަނީ މި ތަން ރަނގަޅަށް ރާޅު ދަސްވުމާއި މި ތަނުގައި އަންނަ ރަނގަޅު ރާޅަށް ރަނގަޅު ޕޮޒިޝަންގައި ތިބުމާއި އެ ކުދިންގެ ސާފިން، ދެން ތިބި ގައުމުތަކުގެ ލެވަލް އަށް ބަލާފައި ވެސް ހަމަ އަޕް ދެއާ ހަމަ. އުންމީދުކުރަނީ ހަމަ، ރަނގަޅު ހިސާބަކަށް ދެވޭނެ ކަމަށް،"
އިބޫ ވަނީ މުބާރާތުގައި ދިވެހި ޓީމަށް ސަޕޯޓް ދޭ ފަރާތްތަކަށް މެސެޖެއް ދީފަ އެވެ.
"ސަޕޯޓަރުންނަށް ދޭން ބޭނުންވާ މެސެޖަކީ، އޮންލައިންކޮށް ބަލާ މީހުންނަށް ވެސް ތުލުސްދޫ އަށް އައިސް ވެސް، އަޅުގަނޑުމެންގެ ރާއްޖެ ޓީމަށް ސަޕޯޓް ކޮށްދޭން ވަޑައިގަންނަވާށޭ. ދެން، އޮންލައިންކޮށް ގިނައިން ހަމަ މި މުބާރާތް ބަލާ ހަމަ އަހަރެެމެންގެ އެތުލީޓުންނަށް ހިތްވަރު ދޭ،" އިބޫ ބުންޏެވެ.
އޭޝިއަން ސާފިން ޗެމްޕިއަންޝިޕުގައި ވާދަކުރާ ރާއްޖޭގެ ގައުމީ ސާފިން ޓީމު:
ސީނިއާ ޓީމު:
އަހުމަދު އާގިލް (ކެޕްޓަން)
ހޫދު އަހުމަދު
އިސްމާއިލް މިގްލާލް
ސީނިއާ ޓީމް ބީ (ޓީމު ތުލުސްދޫ):
ހަސަން ނާސިހް
އިސްމާއިލް ރަޝީދު (ސްމައިލީ)
އަހުމަދު ހިޝާމް ޝަހީމް
އަންހެން ގައުމީ ޓީމު:
އާޔާ ނަސީމް
ޝާޒިޔާ ސައީދު
ޖޫނިއާ ގައުމީ ޓީމު:
ސައްޔިދު ސަލާހުއްދީން (ކެޕްޓަން)
ޔަސިން އަހުމަދު ނާޝިދު
ޔޫސުފް ކަޔާން ހަމްދާން ޒަކީ
ޖޫނިއާ ޓީމް ބީ (ޓީމު ތުލުސްދޫ):
ކަޔާން އަބްދުالله އަރީފް
އަހުމަދު ޒަޔާން
މުހައްމަދު އިނާން އަބްދުލް ހަންނާން
