ލަންޑަން (އޮގަސްޓް 17) - އިނގިރޭސި ޕްރިމިއާ ލީގުގައި މިރޭ ބުކާޔޯ ސަކާ ތަފާތު ދައްކައި، ވުލްވްސްގެ މައްޗަށް 2-0 އިން ކުރިހޯދައި، އާސެނަލަށް މި ފަހަރުގެ ސީޒަނުގެ ފުރަަތަމަ މޮޅު ހޯދައިދީފި އެވެ.
އާސެނަލްގެ ދަނޑު އެމިރޭޓްސް ސްޓޭޑިއަމްގައި ކުޅުނު މެޗު ފަށައިގެން އާސެނަލުން ގިނަ ވަގުތު ބޯޅަ ހިފަަހައްޓައިގެން ކުޅެން މަސައްކަތްކުރި އެވެ. އެ ގޮތުން، އާސެނަލުން ވަނީ ލަނޑު ޖަހާނެ ފުރުސަތުތަކެއް ވެސް ހޯދައިފަ އެވެ.
ލަނޑެއް ޖެހޭތޯ އާސެނަލުން ކުރި މަސައްކަތް ކާމިޔާބުކުރީ، 25 ވަނަ މިނިޓްގަ އެވެ. މި ލަނޑު ޖެހީ ކައި ހަވާޓްޒް އެވެ. އޭނާ މި ލަނޑު ޖެހީ ސަކާ ނަގައިދިން ހުރަހަކުން ބޮލުންނެވެ. ހަވާޓްޒް ވަނީ، ވުލްވްސްގެ ކީޕަރު ހޯސޭ ސާ އަށް ބޯޅަ ލިބުމުގެ ކުރިން ބޮލުން ގޯލަށް ބޯޅަ ފޮނުވާލައިފަ އެވެ.
ފުރަތަމަ ހާފުގައި އާސެނަލަށް ލަނޑު ޖަހަން ލިބުނު ފުރުސަތުތަކެއް އެ ޓީމުގެ ގަބްރިއެލް މާޓިނެލީ އަތުން ވަނީ ގެއްލިފަ އެވެ.
ވުލްވްސް އަށް އެއްވަރުކޮށްދޭން ޖޯގެން ސްޓްރޭންޑް ލާސަން ވަނީ ރަނގަޅު ހަމަލާއެއް ފޮނުވާލައިފަ އެވެ. ފުރަތަމަ ހާފުގައި ސްޓްރޭންޑް ލާސަން ބޮލުން ފޮނުވާލި ބޯޅަ އާސެނަލްގެ ކީޕަރު ޑޭވިޑް ރާޔާ ވަނީ މަތަކޮށްފަ އެވެ. އޭގެ ފަހުން ދެ ވަނަ ހާފުގައި، ވުލްވްސްގެ މަތެއުސް ކޫންޏާ ޖެހި ބޯޅަ އަމާޒުވީ ކީޕަރު ރާޔާ އަތަށެވެ.
އާސެނަލަށް މެޗުގެ ތިން ޕޮއިންޓް ޔަގީންކޮށްދިން ލަނޑު ޖެހީ، ސަކާ އެެވެ. މިއީ އަަވަހަށް ކުޅުނު ހިލޭ ޖެހުމެއްގައި ތަނަވަސްވި ފުރުސަތަކުން ސަކާ ޖެހި ލަނޑެކެވެ. މިއީ، ވުލްވްސްއާ ދެކޮޅަށް ކުޅުނު 11 މެޗުގެ ތެރެއިން ސަކާ ޖެހި ހަތަރު ވަނަ ލަނޑެވެ.
މިދިޔަ ސީޒަނުގައި ލީގުގެ ދެ ވަނަ ހޯދި އާސެނަލް މި ފަހަރުގެ ލީގުގައި ކުޅުނު ފުރަތަމަ މެޗުން ހޯދި ކާމިޔާބަށް ފަހު، އެ ޓީމުގެ ކޯޗު މިކޭލް އާޓެޓާ ވަނީ ފުރަތަމަ މެޗާ ބަަލައި އެ ޓީމުގެ ކުޅުމާ މެދު ހިތްހަމަޖެހޭ ކަމަށް ބުނެފަ އެވެ.
