ލަންޑަން (އޮގަސްޓް 17) - ނެދަލެންޑްސްގެ ކޯޗު އާނާ ސްލޮޓްގެ އިރުޝާދުގެ ދަށުން ލިވަޕޫލް ކުޅުނު ފުރަތަމަ ރަސްމީ މެޗުގައި، މުހައްމަަދު ސަލާހު ޖެހި ރެކޯޑް ގޯލާ އެކު، 2-0 އިން އިޕްސްވިޗް ޓައުން ބަލިކޮށް، ލިވަޕޫލުން އިނގިރޭސި ޕްރިމިއާ ލީގުގެ އާ ސީޒަން މޮޅަކުން ފަށައިފި އެވެ.
ނުވަ އަހަރަށް ފަހު، ލިވަޕޫލް ކޯޗުކަމުން ޖަރުމަނުގެ ކޯޗު ޔާގަން ކްލޮޕް ވަކިވުމުން އެ މަގާމާ ހަވާލުވި، ސްލޮޓް އަކީ އެކާވީސް ވަނަ ގަރުނުގައި މޮޅަކުން ލީގު ފެށި ލިވަޕޫލްގެ ފުރަތަމަ ކޯޗެވެ.
ބާވީސް އަހަރަށް ފަހު، ޕްރިމިއާ ލީގަށް އެނބުރި އައި، އިޕްސްވިޗުން، މިއަދުގެ މެޗުގެ ފުރަތަމަ ހާފުގައި ރަނގަޅު ކުޅުމެއް ދެއްކި އެވެ. އަމިއްލަ ދަނޑުގައި ކުޅުނު، އިޕްސްވިޗަށް މި ހާފުގައި އެންމެ ރަނގަޅު ހަމަލާއެއް އުފެއްދީ އޮމާރް ހަޗިންސަން އެވެ. ކައުންޓަ އެޓޭކުގައި، އިސްޕްވިޗުގެ ހަޗިންސަން ޖެހި ބޯޅަ ލިވަޕޫލްގެ ކީޕަރު، އެލިސަން ބެކާ ވަނީ މަތަކޮށްފަ އެވެ.
ލިވަޕޫލުން ވަނީ ދެ ވަނަ ހާފުގައި މުޅިން ކަހަލަ ގޮތަކަށް ކޮންޓްރޯލް ނަގައިގެން މޮޅަށް ކުޅެފަ އެވެ. މި ހާފުގައި ލިވަޕޫލަށް ލީޑުނަގައިދޭން ލުއިޒް ޑިއާޒް އަށް އޭރިއާތެރެއިން ލިބުނު ފުރުސަތުގައި އޭނާ ޖައްސާލި ބޯޅަ ހުރަސް ދަނޑިމަތިން ދިޔައިރު، އޭރިއާތެރޭގައި ހުސްކޮށް ހުރެފައި، ޑިއޯގޯ ޖޮޓާ ބޮލުން ޖެހި ބޯޅަ ދިޔައީ ދަނޑިކައިރިން ބޭރުންނެވެ.
މެޗުގައި ލިވަޕޫލުް ލީޑުނެގީ ޖޮޓާ ޖެހި ގޯލުންނެވެ. މެޗުގެ، 60 ވަނަ މިނިޓްގައި ޖޮޓާ މި ލަނޑު ޖެހީ ސަލާހު ހުސްކޮށްލާފައި ދިން ބޯޅައަކުންނެވެ. އޭގެ ފަސް މިނިޓް ފަހުން، ސަލާހު ވަނީ ލިވަޕޫލްގެ ދެ ވަނަ ލަނޑު ޖަހައިފަ އެވެ.
މިއީ، ޕްރިމިއާ ލީގުގެ އާ ސީޒަނެއްގެ ފުރަތަމަ މެޗުގައި، ސަލާހު ޖެހި ނުވަ ވަނަ ލަނޑެވެ. މިއާ އެކު، ސަލާހު ވެފައިވަނީ، ޕްރިމިއާ ލީގުގެ ފުރަތަމަ މެޗުތަކުގައި އެންމެ ގިނަ ލަނޑު ޖެހުމުގެ ރެކޯޑް ހަދައިފަ އެވެ.
ލިވަޕޫލަށް ސަލާހު ކުޅެދިން 350 ވަނަ މެޗުގައި އިތުރު ގޯލު ޖަހަން ވެސް އޭނާ އަށް ހުސް ފުރުސަތެއް ލިބި ބޭނުމެއް ނުކުރެވުނެވެ. އޭގެ އިތުރުން، ޑިއާޒް އާއި ކޮނާ ބްރެޑްލީ އަށް ވެސް ހުސް ފުރުސަތުތަކެއް ލިބި ގޯލެއް ޖެހޭގޮތެއްނުވި އެވެ.
