ކުރީގެ މަޝްހޫރު ވިޔަފާރިވެރިޔާ، އަދި ރާއްޖެ އަށް ޑިމޮކްރެޓިކް ބަދަލު ގެނައުމުގެ ހަރަކާތުގައި އެކްޓިވިސްޓެއްގެ ގޮތުގައި އުޅުއްވި މުހައްމަދު ޒާހިރު (އޯކޭ ޒާހިރު)، އުމުރުން 76 އަހަރުގައި ނިޔާވެއްޖެ އެވެ.
ސްރީ ލަންކާގައި ދިރިއުޅުއްވާ ޒާހިރު ނިޔާވީ އާސިރީ ހޮސްޕިޓަލްގައި ފަރުވާ ދެމުން ދަނިކޮށް ރޭ ފަތިހު 4:30 ހާއިރު ކަމަށެވެ. އެކަން އާއިލާއިން ކަށަވަރުކޮށް ދިނެވެ.
ނިޔާވިއިރު ޒާހިރުގެ އަންބަކާއި ނުވަ ދަރިން ދުނިޔޭގައި އެބަ ތިއްބެވެ.
ފޮރިން މިނިސްޓަރު މޫސާ ޒަމީރު ފުރަތަމަ ކައިވެނި ބައްލަވައިގަތީ ޒާހިރުގެ ދަރިޔަކާ އެވެ.
އެމްޑީޕީގެ ފުރަތަމަ ވެރިކަމުގައި ޒާހިރަކީ ތިލަފުށީ ކޯޕަރޭޝަންގެ ބޯޑު މެންބަރެކެވެ. އަދި އެމްޑީޕީގެ ފޮނަދޫ ދާއިރާގެ ރައީސްކަން އޭނާ ކުރެއްވި އެވެ.
ޒާހިރަކީ އިޖާދީ، އަދި އުފެއްދުންތެރި މަސައްކަތްތަކެއް ކުރެއްވި ވިޔަފާރިވެރި އެކެވެ. އެގޮތުން، ހާޕިކް ލިކުއިޑް (ސާފް ލިކުއިޑް)، ވިމް ޕައުޑަރު (ތިރުނަ ޕައުޑަރު)، މޫނުގައިޖަހާ ފުށް (ރެހެންދި ޓެލްކަމް ޕައުޑަރު)، ބްލީޗިން ލިކުއިޑް (ފަސޭހަ ލިކުއިޑް)، އުއްބައްތި (ރީތިއަލި) ޒާހިރުގެ ވިޔަފާރީގެ އުފެއްދުންތަކެވެ. އެތަކެތި ޒާހިރު އުފެއްދީ ރާއްޖޭގަ އެވެ.
އޭގެ އިތުރުން މަހުގެ ބާވަތްތަކާއި ހުއިފިލަނޑާ އޭނާ އެކްސްޕޯޓުކުރި އެވެ. މިކަންކަން ފާހަގަކޮށް، އިގުތިސާދީ މަސައްކަތް ކުރިއެރުވުމުގެ ރޮނގުން، ހިތްވަރު ދިނުމުގެ ގައުމީ އިނާމު 1993 ގައި ޒާހިރަށް ދީފައިވެ އެވެ.
ޒާހިރު ފާހަގަ ވެފައިވަނީ އިސްލާހީ މަސައްކަތުގައި ކެރިގެން ބަސް ވިދާޅުވި ބޭފުޅެއްގެ ގޮތުގަ އެވެ.
