މެންޗެސްޓާ (އޮގަސްޓް 16) - އިނގިރޭސި ޕްރިމިއާ ލީގުގެ ފުރަތަމަ މެޗުގައި ފުލަމްއާ ދެކޮޅަށް މެންޗެސްޓާ ޔުނައިޓެޑުން ކުޅެން ޖެހޭއިރު، އެ މެޗަށް ތައްޔާރެއް ނޫން ކަމަށް ޔުނައިޓެޑްގެ ކޯޗު އެރިކް ޓެން ހާގް ބުނެފި އެވެ.
އިނގިރޭސި ފުޓްބޯޅަ ސީޒަން ފަށަން ކުޅޭ ކޮމިއުނިޓީ ޝީލްޑް މެޗުން ޔުނައިޓެޑް ވަނީ ޕެނަލްޓީ ޖަހައިގެން ވާދަވެރި މެންޗެސްޓާ ސިޓީ އަތުން ބަލިވެފަ އެވެ. ޔުނައިޓެޑުން ޕްރިމިއާ ލީގުގެ އާ ސީޒަން ފަށާ މެޗުގައި މިރޭ ފުލަމްއާ ކުޅޭނެ އެވެ.
ޔުނައިޓެޑުގެ ޑިފެންޑަރުން ކަމަށްވާ ލެނީ ޔޯރޯ އާއި ލޫކް ޝޯ، ޓައިރެލް މަލާސިއާގެ އިތުރުން، ފޯވާޑް، ރަސްމުސް ހޮއިލުންޑް ހުރީ އަނިޔާގަ އެވެ. އަނެއްކޮޅުން، ދާދި ފަހުން ބަޔާން މިއުނިކުން ޔުނައިޓެޑާ ގުޅުނު، ނުސައިރު މަޒްރައޮއީ އާއި މަތައިސް ޑި ލިޓް އަށް އެކަށީގެންވާ ވަރަށް އަދި ޓީމާ އެކު ފަރިތަކުރެވޭ ގޮތެއްނުވެ އެވެ.
މި ހުރިހާ ކަމަކަށް ބަލައި، ޓެން ހާގް ދެކޭގޮތުގައި ޔުނައިޓެޑްގެ ހާލަތު އަދި އޮތީ ސީޒަނަކަށް ތައްޔާރުވާން ބަލާއިރު އެންމެ ރަނގަޅަކަށް ނޫނެވެ.
"ތެދެއް، ލީގު ފަށަން ޖެހިފައި މި އޮތީ. އަހަރެމެން ތައްޔާރެއް ނޫން. މިއީ ހަގީގަތް، ދެން، ފުރަތަމަ މެޗު މިއޮތީ ޖެހިފައި، މި ކަމާ ކުރިމަތިލުން ނޫން ގޮތެއް ނެތް،" ޓެން ހާގް ބުންޏެވެ.
ޔުނައިޓެޑާ އެކު، ތިން ވަނަ ސީޒަނަކަށް ތައްޔާރުވަމުން އަންނަ ޓެން ހާގް ބުނީ، މި ވަގުތަށް ބަލާއިރު، އެންމެ މުހިންމު ކަމެއްގެ ގޮތުގައި އޮތީ ކުރިން ސީޒަންތަކުން ފިލާވަޅު ނަގައި، އެ ވަގުތެއްގައި ބޭނުންކުރެވެން ހުރި ހުރިހާ ކަމެއް އެންމެ ރަނގަޅަށް ބޭނުންހިފުން ކަމަށެވެ.
"އެ ގޮތުން، އަހަރެމެންނަށް އެބައޮތް ވަރަށް ވަރުގަދަ ޓީމެއް މި ވަގުުތު ވެސް ނެރެވެން،" ޓެން ހާގް ބުންޏެވެ.
ފުލަމްގެ ކޯޗު މާކޯސް ސިލްވާ ބުނީ، ޔުނައިޓެޑަކީ މި ފަހަރުގެ ޓްރާންސްފާގައި އެންމެ ރަނގަޅަށް މަސައްކަތްކުރި އެއް ޓީމު ކަމަށެވެ.
އަނެއްކޮޅުން، އޭނާގެ ޓީމު ފުލަމް އަކީ މި ފަހަރުގެ ޓްރާންސްފާގައި ސީނިއާ ހަތަރު ކުޅުންތެރިއަކު ގެއްލުނު ހަމައެކަނި ޓީމު ކަމަށާއި މި ފަރަގު ތަކަކީ މެޗުގެ ކުރިން އޮތް ކަމެއް ކަމަށްވާއިރު، މެޗުގައި މަސައްކަތްކޮށްގެން މޮޅުވާން ބޭނުންވާ ކަމަށް ސިލްވާ ވަނީ ބުނެފަ އެވެ.
ފުލަމް އާއި ޔުނައިޓެޑް ކުޅޭ މެޗު ފަށާނީ މިރޭ 12 ޖަހާއިރު އެވެ.
