ސިނގިރޭޓަކުން ނަގަމުން އައި އިމްޕޯޓް ޑިއުޓީއިން 2ރ. ބޮޑުކޮށް އިލެކްޓްރޯނިކް ސިނގިރޭޓާއި ވޭޭޕް ކުރުމަށް ބޭނުންކުރާ އާލާތްތަކާއި އޭގެ ބައިބައިން އިމްޕޯޓް ޑިއުޓީ ނަގަމުންދާ ރޭޓު 200 ޕަސެންޓަށް ބޮޑުކުރުމަށް ސަރުކާރުން ނިންމައިފި އެވެ.
ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ފިނޭންސް މިނިސްޓްރީން ހިއްސާކުރި މައުލޫމާތުތަކުން އެނގޭ ގޮތުގައި މި ބަދަލު ގެނައުމަށް ނިންމާފައިވަނީ ޑިސެމްބަރު މަހުގެ ފުރަތަމަ ދުވަހުން ފެށިގެންނެވެ.
ކަސްޓަމްސްގެ ޓެރިފް ތާވަލުގައި އޮތް ގޮތުން، ރާއްޖެ އެތެރެކުރާ ކޮންމެ ސިނގިރޭޓަކުން 3ރ. ޑިއުޓީ މިހާރު ދައްކަން ޖެހެ އެވެ. ޑިއުޓީ މުރާޖާކޮށް ކޮންމެ ސިނގިރޭޓަކުން ނަގާ ޑިއުޓީ 5ރ. އަށް މަތިކުރާނެ ކަމަށް އެ ކަރުދާހުގައި ބުނެފައިވެ އެވެ.
އޭގެ އިތުރުން, އިލެކްޓްރޯނިކް ސިނގިރޭޓާއި ވޭޭޕް ކުރުމަށް ބޭނުންކުރާ އާލާތްތަކާއި އޭގެ ބައިބައިން އިމްޕޯޓް ޑިއުޓީ ނަގަމުންދާ ރޭޓު ވެސް 175 ޕަސެންޓުން ބޮޑުކުރަން ވަނީ ނިންމާފަ އެވެ. އެގޮތުން, މިހާރު 25 ޕަސެންޓުން ނަގަމުންދާ ޑިއުޓީ ޑިސެމްބަރުން ފެށިގެން 200 ޕަސެންޓަށް ބޮޑުކުރާނެ އެވެ.
އެ ކަރުދާހުގައި ސަރުކާރުން ބުނެފައިވާ ގޮތުގައި ވޭޕް ފްލޭވަރުން ނަގާ ޑިއުޓީ ވެސް ބޮޑުކުރަން ވަނީ ނިންމާފަ އެވެ. ދުންފަތުގެ އިސްތިއުމާލު ކުރުމަށް ބޭނުންކުރާ އާލާތްތަކަށް އަޅާ ފްލޭވަރާއި ކެމިކަލްގެ ކޮންމެ މިލިލީޓަރަކުން ނުވަތަ ގްރާމަކުން 5ރ. ގެ ޑިއުޓީއެއް ވެސް ނަގަން ވަނީ ނިންމާފަ އެވެ. މިހާރު ވެސް އެ ބާވަތްތަކަށް 200 ޕަސެންޓުން ޑިއުޓީ ދައްކަން ޖެހެ އެވެ.
ފިނޭންސް މިނިސްޓްރީން އަންދާޒާކޮށްފައިވާ ގޮތުގައި 2025 ވަނަ އަހަރުން ފެށިގެން މި ބަދަލު ގެނައުމާއެކު ދައުލަތުގެ އާމްދަނީއަށް އެވްރެޖުކޮށް 720 މިލިއަން ރުފިޔާ އިތުރުވާނެ އެވެ.
