ސިހުރު ހެދިކަމުގެ ތުހުމަތުގައި ހައްޔަރުކޮށް، 20 ދުވަހު ޖަލުގައި ގެންގުޅުމަށްފަހު ދޫކޮށްލި އެންވަޔަރަމެންޓު މިނިސްޓަރީގެ ސްޓޭޓު މިނިސްޓަރު، ޝަމްނާޒު އަލީ ސަލީމްގެ މައްޗަށް ދައުވާ ނުކުރަން ޕްރޮސެކިއުޓާ ޖެނެރަލް (ޕީޖީ) އޮފީހުން ނިންމައިފި އެވެ.
ޝަމްނާޒުގެ މައްޗަށް ދައުވާ ނުކުރަން ނިންމާފައިވާކަން ޕީޖީގެ އޮފިޝަލަކު "އަދަދު" އަށް ކަށަވަރުކޮށްދިނެވެ. ނަމަވެސް ޝަމްނާޒުގެ މައްޗަށް ދައުވާ ނުކުރަން ނިންމި ސަބަބަކީ ކޮބައިކަމެއް ނޭނގެ އެވެ. ޝަމްނާޒު މައްޗަށް ދައުވާ ކުރަން ބޭނުންވާ ހެކި ގަރާނީ އަދި ލިޔެކިޔުންތައް ހަމަ ކުރަން ފުލުހުން ޕީޖީއާ މަޝްވަރާ ވެސް ކުރި އެވެ.
ސިހުރު ހެދިކަމުގެ ތުހުމަތުގައި ޝަމްނާޒް ހައްޔަރު ކުރީ ޖޫން 23، ގަ އެވެ. އޭނާއާ އެކު އޭނާގެ އެއްބަނޑުއެއްބަފާ ކޮއްކޮ، ހައްވާ ސަނާ އަލީ ސަލީމް އާއި ސިހުރު ހެދި ކަމަށް ބުނާ މުލީއާގޭގެ ކުރީގެ ކައްކާ ތ. ކިނބިދޫ، ނިވައިދޮށުގޭ، ހުސައިން ސަމީރު ވެސް ހައްޔަރު ކުރި އެވެ.
ނަމަވެސް އޭގެ ހަތް ދުވަސްފަހުން ޖުލައި 1، ގައި ސިހުރު ހެދި ކަމަށް ތުހުމަތުކޮށް ހައްޔަރު ކުރި ސަމީރު ޝަރުތުތަކަކާ އެކު ދޫކޮށްލި އެވެ. ޝަމްނާޒު އާއި ސަނާ ބަންދުން ދޫކޮށްލީ ޖުލައި 13، ގަ އެވެ.
ޝަމްނާޒު ހައްޔަރު ކުރީ ފުލުހުންގެ އިންޓެލިޖެންސް ރިޕޯޓެއްގެ މައްޗަށް ބިނާކޮށެވެ. އެ މައްސަލައިގައި ޝަމްނާޒުމެން ގެ ބަލައި ފާސްކޮށް ޝަމްނާޒު އާއި ސަނާގެ ފޯނާއި ސީލްކޮށްފައި ފޯނެއް ކެނޑުމަށްފަހު އެ ފޯނުގެ އިތުރުން އައިއޯއައިޖީ [އިންޑިއަން އޯޝަން އައިލެންޑް ގޭމްސް] މުބާރާތެއްގައި ބެހި ތަޅުދަނޑިފުލަކާއި ސަނާގެ ކޮޓަރިން ފެނުނު އިސްތަށިކޮޅެއް އަދި ޝަމްނާޒުގެ ކޮޓަރިން ކަރުގައި އަޅާ ފަށެއް ފުލުހުން ގެންދިޔަ އެވެ.
ފުލުހުން ގެންދިޔަ ތަޅުދަނޑިފުލަކީ ވޫލުން ވިޔެފައިވާ ޑޯލްއެކެވެ. ނަމަވެސް އެ ތަކެތި ބަލައި ފާސް ކުރުމަށްފަހު އެ ޑޯލްގައި ސިހުރުގެ އެއްވެސް ކަމެއް ނެތް ކަމަށް ބަންދާ މެދުގޮތެއް ނިންމުމަށް ބޭއްވި އަޑުއެހުމެއްގައި އިސްލާމިކް މިނިސްޓަރީއާ ހަވާލާދީ ފުލުހުން ބުނެފައިވެ އެވެ.
ޝަމްނާޒުއަކީ ރައީސް އޮފީހުގެ މިނިސްޓަރު އާދަމް ރަމީޒުގެ ކުރީގެ އަންހެނުންނެވެ. ޝަމްނާޒު ހައްޔަރު ކުރީ ރަމީޒު އޭނާ ވަރިކުރިތާ ކުޑަ ދުވަސްކޮޅެއް ފަހުންނެވެ.
ޝަމްނާޒު ހައްޔަރު ކުރިއިރު، އޭނާގެ ތިން ކުދިން ތިއްބެވެ. އެންމެ ހަގުކޮށް ހުރީ ގާތުން ދޭ، އެއް އަހަރާއި ފަސް މަހުގެ ކުއްޖެކެވެ. އެއީ އާދަމް ރަމީޒުއާ ޝަމްނާޒުގެ ކައިވެންޏަށް ލިބިފައި ހުރި ދަރިއެކެވެ.
ޝަމްނާޒު ބަންދުކޮށްފައި ހުރި މުއްދަތުގައި އެ ކުއްޖާއަށް ގާތުން ދިނުމުގެ ފުރުސަތު ވެސް ފުލުހުން ދީފައެއް ނުވެ އެވެ.
ޝަމްނާޒު ހައްޔަރު ކުރިފަހުން އާދަމް ރަމީޒު އާއި ޝަމްނާޒުގެ އިތުރުން ސަނާ ވެސް ސަސްޕެންޑު ކުރި އެވެ. ސަނާއަކީ އެންވަރަމެންޓު މިނިސްޓަރީގެ ޕޮލިޓިކަލް ޑިރެކްޓަރެކެވެ.
