މެންޗެސްޓާ (އޮގަސްޓް 14) - ބަޔާން މިއުނިކަށް ކުޅެމުން އައި ނެދަލެންޑްސްގެ ޑިފެންޑަރު، މަތައިސް ޑި ލިޓް އާއި މޮރޮކޯގެ ފުލްބެކް، ނުސައިރު މަޒްރައޮއީ، މެންޗެސްޓާ ޔުނައިޓެޑަށް ސޮއިކުރި ސަބަބަކީ އެ ޓީމުގެ ކޯޗު އެރިކް ޓެން ހާގް ކަމަށް ބުނެފި އެވެ.
ޑި ލިޓް އާއި މަޒްރައޮއީ ވަނީ، މީގެ ކުރިން ޔުނައިޓެޑްގެ ކޯޗު އެރިކް ޓެން ހާގްއާ އެކު، އަޔަކްސްގައި މަސައްކަތްކޮށްފަ އެވެ. އެ ގޮތުން، ޑި ލިޓް، 25، އަކީ، 2019 ވަނަ އަހަރު އަޔަކްސް އިން ޓެން ހާގާ އެކު، ޗެމްޕިއަންސް ލީގުގެ ސެމީ ފައިނަލުގައި ކުޅުނުއިރު، ޓީމުގެ ކެޕްޓަން އެވެ.
ޔުނައިޓެޑުން ބަޔާނަށް 49 މިލިއަން ޑޮލަރު ދީފައި ޑި ލިޓް ގަތްއިރު، 21 މިލިއަން ޑޮލަރަށް މަޒްރައޮއީގެ ސޮއި ވަނީ ހޯދައިފަ އެވެ.
"އަހަރެންގެ ކެރިއަރުގެ ކުރީކޮޅުގައި ކަންކަން ރަނގަޅަށް ރޭވުނީ ޓެން ހާގާ ހެދި. އެހެންވީމަ އޭނަ (ޓެން ހާގް) އަށް އެނގޭނެ އަހަރެންގެ އެންމެ ރަނގަޅު ކުޅުން ދެއްކޭނެ ގޮތްތައް. އަހަރެން މި ހުރީ އޭނައާ އެކު މަސައްކަތްކުރަން ކެތްމަދުވެފައި،" ޔުނައިޓެޑާ އެކު، ފަސް އަހަރުގެ ކޮންޓްރެކްޓެއްގައި ސޮއިކުރި ޑި ލިޓް ބުންޏެވެ.
މަޒްރައޮއީ ވަނީ ހަތަރު އަހަރުގެ އެއްބަސްވުމެއްގައި ޔުނައިޓެޑާ އެކު ސޮއިކޮށްފަ އެވެ. އޭނާ ބުނީ، ކެރިއަރުގެ އެންމެ މުހިންމު އަހަރުތައް ކުރިއަށް އޮތްއިރު، ޓެން ހާގް ކަހަލަ އޭނާ އަށް ފަރިތަ ކޯޗަކާ އެކު މަސައްކަތް ކުރަން ލިބުމުން ވަރަށް ހިތްހަމަޖެހިފައި ހުރި ކަމަށެވެ.
ޔުނައިޓެޑުން ވަނީ މި ފަހަރުގެ ޓްރާންސްފާ މާކެޓްގައި، ބޮލޯނިއާގެ ފޯވާޑް ޖޯޝުއާ ޒާކްޒީ، 43 މިލިއަން ޑޮލަަރަށް ގަނެފަ އެވެ. އަދި ލިލްގެ ފްރާންސް ޑިފެންޑަރު، ލެނީ ޔޯރޯ، ޔުނައިޓެޑާ ގުޅުނީ، 67 މިލިއަން ޑޮލަރަށެވެ.
