މެންޗެސްޓާ (އޮގަސްޓް 13) - މެންޗެސްޓާ ސިޓީން ފައިނޭންޝިއަލް ފެއާޕްލޭ (އެފްއެފްޕީ)އާ ގުޅޭ ކަންކަމާ ހިލާފުވެފައިވާ 115 މައްސަލައެއް ބަލަމުން އަންނައިރު، އޭގެ އަޑުއެހުންތައް އަވަސްކުރަން ޕްރިމިއާ ލީގުން ނިންމާފައިވާ ކަމަށް މީޑިއާ ރިޕޯޓްތައް ބުނެފި އެވެ.
ސިޓީން 2009-2018 އާ ދެމެދު އެފްއެފްޕީ ގަވާއިދާ ހިލާފަށް ކޮށްފައިވާ ކަންތައްތަކާ ގުޅޭ 115 މައްސަލައިގެ ސަބަބުން ސިޓީ އަށް ދައުވާކުރުމުގެ ކަންކަން ފެށިގެން ދިޔައީ، މިދިޔަ އަހަރުގެ ފެބްރުއަރީ މަަހުގަ އެވެ.
އެކަމަކު، އެ ފަހުން އަހަަރަކަށް ވުރެ ގިނަ ދުވަސްވެފައިވާއިރު، އަދިވެސް ސިޓީގެ މައްސަލަ ތާވަލުކޮށް ބަލަން ފަށާފައިނުވެ އެވެ. އެންމެ ފަހުން ވާހަކަ ދެކެވުނީ މި އަހަރުގެ ނޮވެމްބަރު މަހު ސިޓީގެ މައްސަލައިގެ އަޑުއެހުންތައް ފަށާނެ ކަމުގެ ވާހަކަ އެވެ.
އެކަަމަކު، ދި ޓައިމްސް އިން ރިޕޯޓްކުރާގޮތުގައި، އަންނަ މަހުގެ މެދުތެރޭގައި މި މައްސަލަތަކުގެ އަޑުއެހުންތައް ފަށައި، އަންނަ އަހަރުގެ ކުރީކޮޅުގައި، ސިޓީއާ މެދު ފިޔަވަޅެއް އަޅާނަމަ އެކަން ކުރާނެ އެވެ.
ސިޓީގެ ތަހުގީގުގެ އަޑުއެހުންތައް، 10 ހަފްތާ އަށް ދިގުދެމިގެންދާނެ ކަމަށް ރިޕޯޓްތައް ބުނެ އެވެ.
ސިޓީގެ 115 މައްސަލައިގެ ތަފްސީލް
- 2009-2010 ސީޒަނުން ފެށިގެން 2017-2018 ވަނަ ސީޒަނުގެ ނިޔަލަށް ސައްހަ މާލީ ލިޔުންތައް ހުށަނޭޅުމުގެ 54 މައްސަަލަ.
- 2009-2010 އިން 2017-2018 ވަނަ ސީޒަނުގެ ނިޔަލަށް ކުޅުންތެރިންނާއި ކޯޗުންނަށް ދިން މުސާރަތަކުގެ ސީދާ ތަފްސީލް ނުދޭ 14 މައްސަލަ.
- 2013-2014 އިން 2017-2018 އަށް ފައިނޭންޝިއަލް ފެއާޕްލޭގެ ޔުއެފާގެ މިންގަނޑާ ހިލާފުވެފައިވާ 5 މައްސަލަ.
- 2015-2016 އިން 2017-2018 ޕްރިމިއާ ލީގުގެ ޕީއެސްއާރް ގަވާއިދާ ހިލާފުވެފައިވާ ކަމުގެ 7 މައްސަލަ.
- ޕްރިމިއާ ލީގުން ހިންގި ތަހުގީގަށް ޑިސެމްބަރު 2018 އިން ފެބްރުއަރީ 2023 އާ ހަމައަށް އެއްބާރުލުން ނުދީ މާލީ ކަންކަން ހާމަނުކުރި 35 މައްސަލަ.
މެންޗެސްޓާ ސިޓީ ހިންގުމާ ޔުނައިޓެޑް އަރަބް އެމިރޭޓްސް (ޔޫއޭއީ)ގެ މަހުޖަނު، ޝެއިހް މަންސޫރު، ސިޓީ ގަތީ 2008 ވަނަ އަހަރުގެ ސެޕްޓެމްބަރު މަހުގަ އެވެ. އެއީ, ތައިލެންޑްގެ ކުރީގެ ބޮޑުވަޒީރު, ތަކްޝިން ޝިނަވަޓްރާ އަތުންނެވެ. އޭގެ ފަހުން، މަންސޫރުގެ ލީޑަޝިޕްގެ ދަށުން، ސިޓީ ފުޓްބޯލް ގްރޫޕްގެ ނަމުުގައި، ކުންފުންޏެއް ހަދައި، އެ ކުންފުނިން ދުނިޔޭގެ އެކި ބައްރުތަކުގައި އަންނަނީ ޓީމު ހިންގަމުންނެވެ.
