މަސްތުވާތަކެތި ބޭނުންކުރުމުގެ ތުހުމަތުގައި ހައްޔަރުކުރި މީހަކު ކުޑަކަމުދާތަކެތި ދިނުމަށް އިންކާރު ކުރި މައްސަލާގައި އެއް އަހަރު ދުވަހަށް ޖަލަށް ލާން ކްރިމިނަލް ކޯޓުން އިއްޔެ ހުކުމްކޮށްފި އެވެ.
މި މައްސަލާގައި އެއް އަހަރު ދުވަހަށް ޖަލަށް ލާން ހުކުމް އިއްވާފައި ވަނީ ސ. ހިތަދޫ، ޔެލޯވިލާ އަދުނާނުގެ މައްޗަށެވެ. އޭނާ ވަނީ ދައުވާއަށް އިންކާރުކޮށްފަ އެވެ. އަދި, ކުޑަކަމުދާ ތަކެތި ދޭން އޭނާ ކައިރީ ބުނެފައިނުވާ ކަމަށާއި އެކަން އޭނާއަށް އަންގާފައި ނުވާ ކަމަށް ކޯޓުގައި އަދުނާން ބުނެފައިވެ އެވެ.
ދައުލަތުން ހުށައެޅި މި ދައުވާ ސާބިތުކުރުމަށް ވަނީ ހަ ފުލުހުންގެ ހެކިބަސް ނަގައިފަ އެވެ. މީގެތެރެއިން ދެ މީހަކު ވަނީ އޭނާ ފުލުހުންގެ ބެލުމުގެ ދަށަށް ގެނެވުނުކަން ސާބިތުކުރުމަށް ހެކިދީފަ އެވެ. އަދި ބާކީ ތިބި ހަތަރު މީހުންނަކީ އޭނާ ކުޑަކަމުދާ ތަކެތި ނުދީފައިވާ ކަން ސާބިތުކުރުމަށް ހެކި ދިން މީހުންނެވެ.
މި މައްސަލާގައި ދައުވާ އުފުލާފައިވާ ކުށް ސާބިތުވާ ކަމަށް މި މައްސަލަ ބެއްލެވި ކްރިމިނަލް ކޯޓުގެ ގާޒީ ސަފްއަތު ހަބީބް ނިންމަވާފައި ވެއެވެ. ކުށުގެ އަދަބެއްގެ ގޮތުގައި އަދުނާން އެއް އަހަރު ދުވަހުގެ މުއްްދަތަށް ޖަލަށް ލުމަށް ވަނީ ހުކުމްކޮށްފަ އެވެ.
