ދުބާއީ، ޔުނައިޓެޑް އަރަބް އެމިރޭޓްސް (އޮގަސްޓް 13) - އިނގިރޭސި ޕްރިމިއާ ލީގުގެ ގިނަ ކްލަބްތަކަށް ކުޅެފައިވާ ފްރާންސްގެ ޑިފެންޑަރު، ކާޓް ޒޫމާ، ޔޫއޭއީގެ އަލް ޝަބާބް އަށް ބަދަލުވާން ހެދި މެޑިކަލް ޓެސްޓުން ފެއިލްވެއްޖެ އެވެ.
ވެސްޓް ހޭމް ޔުނައިޓެޑާ އެކު ޒޫމާ، 29، ހަދާފައި އޮތް ކޮންޓްރެކްޓް ހަމަވާން އަހަރެއް އޮތްއިރު، އެ ކްލަބުން ވަނީ އޭނާ ދޫކޮށްލަން ނިންމައިފަ އެވެ. އެހެންވެ، ޒޫމާ، ފުރަތަމަ ނިންމީ އަލް ޝަބާބް އަށް ސޮއިކުރާށެވެ. ބޮޑު މުސާރަ ލިބޭ ގޮތަށް، ހަދަން އުޅުނު ކޮންޓްރެކްޓްގެ ކުރިން، މެޑިކަލް ޓެސްޓްތައް ހެދިއިރު، އެކަށީގެންވާ މިންވަރަށް ފިޓްނަސްއާ އެހެނިހެން ކަންކަން ނެތުމުން ޓެސްޓުން ފެއިލްވީ އެވެ.
ޒޫމާގެ އޭޖެންޓް އަންނަނީ އެހެން ކްލަބެއް ހޯދުމުގެ މަސައްކަތް ކުރަމުންނެވެ.
ޖުލެން ލޮޕެޓެގީގެ ކޯޗުކަމުން މި ސީޒަނުގައި ކުޅެން ނިންމާފައިވާ ވެސްޓް ހޭމް އިން ވަނީ ޑިފެންޑަރުންތަކެއްގެ ޑީލް ނިންމައިފަ އެވެ. އެ ގޮތުން، ވުލްވްސްގެ މެކްސިމިލިއަން ކިލްމަން އާއި މެންޗެސްޓާ ޔުނައިޓެޑްގެ އާރޮން ވަން ބިސާކާގެ ސޮއި ހޯދައިފައިވާއިރު، ނީސް އަށް ކުޅެމުން އަންނަ ޑިފެންޑަރު، ޖިއަން ކްލިއޭ ޓޮޑީބޯ ވެސް ވެސްޓް ހޭމަށް ބަދަލުވާނެ ކަމަށް ބެލެވެ އެވެ.
ޒޫމާ ވަނީ ޗެލްސީ އާއި އެވަޓަން އަދި ސްޓޯކް ސިޓީ އަށް ވެސް ޕްރިމިއާ ލީގުގައި ކުޅެފަ އެވެ.
