މިދިޔަ 24 ގަޑިއިރު ތެރޭގައި ހއ. ކެލާއަށް 231.5 މިލިމީޓަރުގެ ވާރޭ ވެހުނު ކަމަށް މޯލްޑިވްސް މީޓިއޮރޮލޮޖިކަލް ސާވިސް (މެޓް) އިން ބުނެފި އެވެ.
މެޓް އޮފީހުން ބުނީ ފާއިތުވި 24 ގަޑިއިރު ތެރޭގައި ހދ. ހަނިމާދޫއަށް 177.5 މިލިލީޓަރުގެ ވާރޭ، ރ. އިފުރަށް 102 މިލިމީޓަރުގެ ވާރޭ، ހދ. ކުޅުދުއްފުއްޓަށް 77.8 މިލިމީޓަރުގެ ވާރޭ ވެހިފައިވާ ކަމަށެވެ.
ކ. ކާށިދޫއަށް 69.6 މިލިލީޓަރުގެ ވާރޭ، ކ. ގާފަރަށް 59.6 މިލިލީޓަރުގެ ވާރޭ، ބ. ގޮއިދޫއަށް 53.6 މިލިލީޓަރުގެ ވާރޭ އަދި ރ. އަލިފުއްޓަށް 50.5 މިލިލީޓަރުގެ ވާރޭ ވެހުނު ކަމަށް ވެސް މެޓް އިން ބުނެ އެވެ.
އޭގެއިތުރުން ވެސް ރާއްޖޭގެ އެކި ސަރަހައްދުތަކަށް ވާރޭ ވެހިފައިވާއިރު 35 މިލިލީޓަރަށް ވުރެ އިތުރަށް ހދ. މަކުނުދޫ، ނ. މާފަރު، ކ. ދިއްފުށި، އދ. މާމިގިލި އަދި ލ. ކައްދޫއަށް ވެހުނެވެ.
މެޓް އޮފީހުން އުތުރުގެ އަތޮޅުތަކަށް ބޯކޮށް ވާރޭ ވެހުމާއެކު ގުގުރުން އަދި ގަޑިއަކު 25 މޭލާއި 30 މޭލާ ދެމެދުގެ ބާރު މިނުގައި ވައި ޖެހި، ވިލާގަނޑުގައި ގަޑިއަކު 50 މޭލަށް ވައިދަވެ ކަނޑުތައް ވަރަށް ގަދަވާނެ ކަމަށް ލަފާކޮށް ވަނީ ޔެލޯ އެލާޓް ނެރެފަ އެވެ.
ހުޅަނގު މޫސުމުގެ ބާރު ގަދަވެ، ރާއްޖެއަށް ކުރަމުންދާ ވިއްސާރައާ ގުޅިގެން ރައްކާތެރިކަމުގެ ފިޔަވަޅުތައް އެޅުމަށް ނެޝަނަލް ޑިޒާސްޓާ މެނޭޖްމަންޓް (އެންޑީއެމްއޭ) އިން ވަނީ ބުނެފަ އެވެ.
