ގާނޫނުތައް ތަންފީޒުކުރުމަށްޓަކައި އާންމު ކަމެއްގެ ގޮތުގައި މިހާރު މުޖުތަމައުގައި ދެކެމުން އަންނަ ކަންތައްތައް ބަދަލުވާން ޖެހޭ ކަމަށް މިނިސްޓަރީ އޮފް ހޯމްލޭންޑް އެންޑް ސެކިއުރިޓީގެ ވަޒީރު އަލީ އިހުސާން ވިދާޅުވެއްޖެ އެވެ.
"ރައްކާ" ރޯޑް ސޭފްޓީ ޕްރޮގްރާމްއަށް 10 އަހަރު ފުރުން ފާހަގަކުރުމަށް ފުވައްމުލައް ސިޓީގައި ބޭއްވި ރަސްމިއްޔާތުގައި ވާހަކަ ދައްކަވަމުން އިހުސާން ވިދާޅުވީ އާންމު ކަމެއްގެ ގޮތުގައާއި "އޮކޭ" ކަމެއްގެ ގޮތުގައި ދެކޭ ކަންތައް ބަދަލުވާން ޖެހޭ ކަމަށެވެ.
"ހުރިހާ ރައްޔިތުން އެއްބާރުލުން މިކަމުގަ ބޭނުންވޭ. މިހާރު އާންމު ކަމެއްގެ ގޮތުގައި ދެކޭ ކަންތައް ބަދަލުވާން ޖެހޭ. މިހާރު މީ އޮކޭ ކަމެއްގެ ގޮތުގައި ދެކޭ ކަންކަން ބަދަލުވާން ޖެހޭ. އަޅުގަނޑުމެން ޓޮލަރޭޓު ކުރަމުން އައި އައުން ކޮންމެސް ވަރަކަށް ޓޮލަރޭޓު ނުކުރަން ފަށަން ޖެހޭ." އޭނާ ވިދާޅުވި އެވެ.
ވަޒީރު މިހެން ވިދާޅުވީ ދާހިލީ ސަލާމަތާއި ރައްކާތެރިކަން ކަށަވަރު ކުރުމަށްޓަކައި ޑުރަގުގެ ވަބާއިންނާއި، ގޭންގު ހަދައިގެން ކުށްކުރުމުގެ މައްސަލަ ހައްލުކުރުމަށާއި އަދި ގަވާއިދާ ހިލާފަށް އުޅޭ ބިދޭސީންގެ މައްސަލައަށް ދާއިމީ ހައްލެއް ހޯދުމަށް މަސައްކަތްކުރާ ވާހަކަ ދެއްކެވުމަށް ފަހެވެ.
އިހުސާންގެ ވާހަކާގައި ފާހަގަކުރީ، ނުކިއްސަރުކޮށް ދާ ކުދިންނަށް ރައްކާތެރިކަން ދިނުމަށްޓަކައި ކުރެވޭ ކަންތައްތަކުން އެ ކުދިން އިތުރަށް ގޯހުގެ ތެރެއަށް ވަންނަ ކަމަށެވެ. އަދި ފުލުހުންގެ އިދާރާއަށް ކުއްޖަކު ހާޒިރުކުރުމުން އެންމެ ފުރަތަމަ ވެސް ބެލެނިވެރިޔާ ދާނީ ކޮންމެވެސް ކޮމިޝަނަކަށް ހައްގު ހޯދަން ކަމަށާއި، އެ ސަގާފަތް މިހާރު ބަދަލުކުރަން ޖެހޭ ކަމެވެ.
"ރައްކާ" ރޯޑް ސޭފްޓީ ޕުރޮގްރާމުގެ ބޭނުމަކީ މަގުމަތީގެ އެކްސިޑެންޓާއި އަދި އެކްސިޑެންޓްގެ ސަބަބުން ވާ ގެއްލުން ކުޑަކުރުމަށެވެ. ގަވާއިދާއި ގާނޫނަށް މީހުން އަހުލުވެރި ކުރުވާ ނަމޫނާ މަގުތަކަކަށް މަގުތައް ހެދުމަކީ ވެސް މި ޕުރޮގުރާމުގެ އަމާޒެކެވެ.
