މިހާރު ވެރިކަން ކުރާ ޕީއެންސީގެ އިސްވެރިން އިންޑިއާ އާ ދެކޮޅަށް ކުރިއަށް ގެންދިޔަ ހަރަކާތުން ރެކިގަތުމުން ޓޫރިޒަމް މިނިސްޓަރު، އިބްރާހިމް ފައިސަލް އިންޑިއާ އަ ދެކޮޅަށް ކޮށްފައި ހުރި ޕޯސްޓުތަކުން ސޯޝަލްމީޑިއާ ފުރާލައިފި އެވެ.
އިންޑިއާއިން ރާއްޖެއަށް އަންނަ ފަތުރުވެރިންގެ އަދަދު އިތުރު ކުރުމަށް މިދިޔަ މަހުގެ 31 އިން މިމަހުގެ ތިންވަނަ ދުވަހާ ހަމައަށް ކުރިއަށް ގެންދިޔަ "ވެލްކަމް އިންޑިއާ" ރޯޑްޝޯތައް ނިންމައިލުމަށް ފަހު އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ފައިސަލް ވިދާޅުވީ އިންޑިއާ އާ ދެކޮޅުވުމަކީ "އެއީ އަޅުގަނޑުމެންގެ ސްޓޭންޑެއް ނޫން،" ކަމަށާއި "އެއީ ކުރިން އަޅުގަނޑުމެން ތެރޭގައި ހުންނެވި ރައީސްއެއްގެ ވިސްނުން،" ކަމަށެވެ.
އަދި، "މިއަދު އަޅުގަނޑުމެން މިތިބީކީއެއް އެގޮތަކަށް ނޫން،" ކަމަށާއި "މިއަދުގެ ސަރުކާރުގެ ވިސްނުމަކީ އެކަހެރިވުމެއް ނޫން،" ކަމަށް ވެސް ފައިސަލް ވިދާޅުވި އެވެ.
ފައިސަލްގެ އެ ވާހަކަތަކާ އެކު މިހާރުގެ ވެރިކަން ކުރާ ޕީއެންސީ އިދިކޮޅު ޕާޓީއެއްގެ ގޮތުގައި އޮތްއިރު، ކުރިއަށް ގެންދިޔަ "އިންޑިއާ އައުޓް" ކެމްޕޭނުގައި ބައިވެރިވެވަޑައިގެން ފައިސަލް ކޮށްފައި ހުރި ޕޯސްޓުތައް ސޯޝަލް މީޑިއާއަށް އެކި މީހުން ވަނީ ބަންޑުން ކޮށްލައިފަ އެވެ.
އެގޮތުން 2020 ވަނަ އަހަރުން ފެށިގެން އިންޑިއާ އައުޓް ހޭޝްޓެގު ޖަހައި، ފައިސަލް އެކްސްގައި ޕޯސްޓުކޮށްފައިވާ އެތައް ޕޯސްޓެއް ސޯޝަލްމީޑިއާގައި އަލުން ދައުރު ވާން ވަނީ ފަށައިފަ އެެވެ.
އޭގެތެރެއިން ބައެއް ޕޯސްޓުތައް މިނިސްޓަރު ފައިސަލް މިހާރު ވަނީ ޑިލީޓުކޮށްފަ އެވެ.
ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަތުމަށް ވެސް އެންމެ ބޮޑު އެއް ވައުދެއްގެ ގޮތުގައި އޮތީ ރާއްޖޭގައި ތިބި ކަމަށް ބުނި އިންޑިއާ ސިފައިން ބޭލުމެވެ. އިންޑިއާ އާއި ރާއްޖޭގެ އޭރުގެ ސަރުކާރާ ދެމެދު ސިއްރު އެތައް އެއްބަސްވުމެއްގައި ސޮއި ކޮށްފައި ހުރި ވާހަކަތައް ފަދަ އެތައް ވާހަކައެއް އޭރު އެ ބޭފުޅުން ދެއްކެވި އެވެ.
ވެރިކަމަށް ވަޑައިގަތުމަށް ފަހު އިންޑިއާ އާއި ރާއްޖެ އާ ދެމެދު އޮތް ގުޅުން އިތުރަށް ގޯސްވީ ސަރުކާރުގެ ނައިބު ވަޒީރުންތަކެއް އިންޑިއާގެ ބޮޑުވަޒީރު، ނަރެންދުރަ މޯދީއަށް ކުޑައިމީސްކޮށް ފުރައްސާރަ ކުރުމުން ހިލުނު މައްސަލަގަނޑުގަ އެވެ.
އެކަމާ ގުޅިގެން އިންޑިއާގެ މަޝްހޫރު ކުޅިވަރު ކުޅުންތެރިންނާއި ބޮލީވުޑު ފަންނާނުން އިސްނަގައިގެން ރާއްޖެއާ ދެކޮޅަށް ކެމްޕޭނެއް ވެސް ކުރި އެވެ. ނަތީޖާއެއްގެ ގޮތުން އިންޑިއާ ޓްރެވެލް އޭޖެންސީތަކުން ރާއްޖެ ބޮއިކޮޓު ވެސް ކުރި އެވެ.
އެ މައްސަލަގަނޑުގެ ތެރެއިން ދެ ގައުމުގެ ޒަމާންވީ ގުޅުމުގައި ލީ ރެނދު ބެއްދުމުގެ މަސައްކަތް ސަރުކާރުން މިހާރު ކުރަމުން ދަނީ ރާއްޖޭގެ އިގުތިސާދު ހީނަރުވެ، އިންޑިއާއިން ރާއްޖެއަށް އަންނަ ފަތުރުވެރިންގެ އަދަދު އިންތިހާއަށް މަދުވުމުންނެވެ.
އިންޑިއާ އަކީ މިދިޔަ ދެ އަހަރު ވެސް ރާއްޖެއަށް އެންމެ ގިނަ ފަތުރުވެރިން ޒިޔާރަތް ކުރި ގައުމެވެ. ނަމަވެސް މިއަހަރުގެ މިހައިތަނަށް ރާއްޖެއަށް ޒިޔާރަތް ކުރި ފަތުރުވެރިންގެ އަދަދަށް ބަލާއިރު، އިންޑިއާ އޮތީ އެންމެ ގިނައިން ރާއްޖެއަށް ފަތުރުވެރިން ޒިޔާރަތް ކުރާ ގައުމުތަކުގެ ލިސްޓުގެ ހަ ވަނައިގަ އެވެ.
