ލަންޑަން (އޮގަސްޓް 8) - ހުސްވެފައިވާ އިންގްލެންޑްގެ ކޯޗުގެ މަގާމުގެ ޒިންމާ ވަގުތީގޮތުން، އިންގްލެންޑްގެ 21 އަހަރުން ދަށުގެ ޓީމާ ހަވާލުވެހުރި ލީ ކާސްލީއާ ހަވާލުކޮށްފި އެވެ.
މި ފަހަރުގެ ޔޫރޯ ފުޓްބޯޅަ މުބާރާތުގެ ފައިނަލް މެޗުން ސްޕެއިން އަތުން އިންގްލެންޑް ބަލިވިއިރު، އިންގްލެންޑް މި ވަނީ ޖެހިޖެހިގެން ދެ ޔޫރޯގެ ފައިނަލުން ބަލިވެފަ އެވެ. މިއާ އެކު، އަށް އަހަރު އިންގްލެންޑް ކޯޗަށް ހުރި ގަރެތު ސައުތުގޭޓް ވަނީ އަމިއްލަ އަށް އިސްތިއުފާދީފަ އެވެ. އަށް އަހަރަށް ފަހު، ސައުތުގޭޓް، އަމިއްލަ އަށް ޓީމުގެ ކޯޗުކަން ދޫކޮށްލިއިރު، ކޮންޓްރެކްޓް އޮތީ މި އަހަރުގެ ނިޔަލަށެވެ.
އިނގިރޭސި އެފްއޭ އިން އާ ކޯޗެއް ހޯދުމުގެ މަސައްކަތް ކުރަމުން އަންނައިރު، އެކަމަށް އަދި އެކަށީގެންވާ ކުރިއެރުމެއް ނުލިބި، އިންގްލެންޑް ދެން ކުޅެން ޖެހޭ މެޗުތައް މި ވަނީ ބޯމަތިވެފަ އެވެ. އެހެންވެ، އިނގިރޭސި އެފްއޭ އިން ވަނީ ވަގުތީ ގޮތުން ހެޑް ކޯޗުގެ ޒިންމާ ކާސްލީއާ ހަވާލުކޮށްފަ އެވެ.
ޕްރޮފެޝަނަލް ލެވަލްގައި 17 އަހަރު ފުޓްބޯޅަ ކުޅެފައިވާ ކާސްލީގެ 12 އަހަރުވީ ކޯޗިން ކެރިއަރުގައި އޭނާ ފުލްޓައިމް ހެޑް ކޯޗަކަށް މަސައްކަތްކުރި ހަމައެކަނި ކްލަބަކީ ބްރެންޓްފޯޑް އެވެ. ކަވެންޓްރީ ސިޓީ އާއި ބާމިންހަމް ސިޓީގެ ކެއާޓޭކާ ކޯޗަކަށް މަސައްކަތްކުރި ކާސްލީ ބްރެންޓްފޯޑަށް ކޯޗުކޮށްދިނީ 2015-2017 އަށެވެ.
ކާސްލީ، އިނގިރޭސި އެފްއޭގެ ކޯޗިން ޕޫލާ ގުޅުނީ ވެސް ކްލަބް ކޯޗިންގައި އުޅެމުންނެވެ. އެއީ، 2015 ވަނަ އަހަރުން ފެށިގެންނެވެ. އެ ގޮތުން، އިންގްލެންޑްގެ 18، 19، 20 އަދި 21 އަހަރުން ދަށުގެ ގައުމީ ޓީމާ އެކު މަސައްކަތްކޮށްފައިވެ އެވެ.
އިންގްލެންޑް ސީނިއާ ޓީމުތަކުގެ ވަގުތީ ކޯޗަކަށް މީގެ ކުރިން ހަވާލުވި ބައެއް ކޯޗުން ވަނީ ފުލްޓައިމްކޮށް ސީނިއާ ޓީމާ ގުޅިފަ އެވެ. އެ ގޮތުން، ކޯޗުން ކަމަށްވާ ހޮވާޑް ވިލްކިންސަން އާއި ސްޓުއާޓް ޕިއަސް އަދި ސައުތުގޭޓަކީ ވެސް، 21 އަހަރުން ދަށުގެ ޓީމުގައި މަސައްކަތްކޮށްފައި ސީނިއާ ޓީމަށް ދިޔަ ކޯޗުންނެވެ.
ކާސްލީއާ އިންގްލެންޑް ސީނިއާ ޓީމު ހަވާލުކުރި އެންމެ ބޮޑު ސަބަބަކީ އޭނާގެ އިރުޝާދުގެ ދަށުން އިންގްލެންޑުން މިދިޔަ އަހަރު 21 އަހަރުން ދަށުގެ ޔޫރޯ ކާމިޔާބުކޮށްފައިވުމުންނެވެ. މިއީ، 39 އަހަރުތެރޭ ލިބުނު ފުރަތަމަ ކާމިޔާބީ އެވެ.
އިންގްލެންޑުން ކާސްލީގެ ކޯޗުކަމުގައި ކުޅޭނެ މެޗުތަކަކީ، އަންނަ މަހު ނޭޝަންސް ލީގުގައި އަޔަލެންޑާއި ފިންލެންޑާ ބައްދަލުކުރާ މެޗުތަކެވެ.
