ރޯޑް ޑިވެލޮޕްމެންޓް ކޯޕަރޭޝަން (އާރްޑީސީ) ގެ ކުރީގެ މެނޭޖްމަންޓަށް، މިހާރުގެ މެނޭޖްމަންޓުން ކުރި ބޮޑެތި ތުހުމަތުތައް ދޮގުކުރައްވައި، އެ ތުހުމަތުތަކަށް މަޖިލީހުގެ ކަމާ ބެހޭ ކޮމިޓީގައި ޖަވާބުދާރީ ވެވަޑައިގަންނަވަން އެ ކޯޕަރޭޝަނުގެ ކުރީގެ މެނޭޖިން ޑިރެކްޓަރު މޫސާ އަލިމަނިކު (މޫކޭ) އެދިވަޑައިގެންފި އެވެ.
އާރްޑީސީގެ މިހާރުގެ އިސްވެރިން، ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒް ކޮމިޓީ (އެސްއޯއީ ކޮމިޓީ) ގެ ބައްދަލުވުމެއްގައި މިދިޔަ ހޯމަ ދުވަހު ކުރި އެއް ތުހުމަތަކީ އާރްޑީސީގެ ކުރީގެ މެނޭޖްމަންޓުން، ލިޔެކިޔުން ނެތި ގިނަ އަދަދެއްގެ ފައިސާ ޓްރާންސްފާކޮށްފައިވާ ކަމަށް ކުރި ތުހުމަތެވެ.
އާރްޑީސީގެ ޑެޕިއުޓީ މެނޭޖިން ޑިރެކްޓަރު އަސްބާހު އަލީ ނަސީރު، އެ ބައްދަލުވުމުގައި ވިދާޅުވީ 2022 ވަނަ އަހަރު ޓްރާންސްފާކުރި 66 މިލިޔަން ރުފިޔާ އާއި މިދިޔަ އަހަރު ޓްރާންސްފާ ކުރި 95 މިލިޔަން ރުފިޔާއާ އެކު ޖުމްލަ 161 މިލިޔަން ރުފިޔާ، ލިޔެކިއުން ނެތި، އާރްޑީސީން ޓްރާންސްފާކޮށްފައިވާ ކަަމަށެވެ.
އެ ކޯޕަރޭޝަނުގެ ދަރަނި 800 މިލިޔަނަށް ވުރެ ބޮޑުވެފައިވާ ކަމަށް ވެސް އާރްޑީސީގެ މިހާރުގެ މެނޭޖްމަންޓުން ކޮމިޓީ ބައްދަލުވުމުގައި ތުހުމަތު ކުރި އެވެ.
އެ ތުހުމަތުތައް ދޮގު ކުރައްވައި، ކުރީގެ އެމްޑީ މޫކޭ އެސްއޯއީ ކޮމިޓީއަަށް ފޮނުއްވި ސިޓީގައި ވިދާޅުވީ އެ ވާހަކަތަކަކީ އެކަށީގެންވާ ވަރަށް ކަންތައްތައް ނުބަލައި ދެއްކި ވާހަކަތަކެއް ކަމަށެވެ. އާރްޑީސީގެ ދަރަންޏާ ބެހޭ ގޮތުން މިހާރުގެ މެނޭޖްމަންޓުން ދެއްކި ވާހަކަތަކަކީ އޮޑިޓްކުރުމަކާ ނުލައި ދެއްކި ވާހަކަ ތަކެއް ކަމަށް ވެސް އޭނާ ވިދާޅުވި އެވެ.
"އިސްވެ ދެންނެވުނު ކަންކަން އެހެން ހުރުމާ އެކު ރޯޑް ޑިވެލޮޕްމެންޓް ކޯޕަރޭޝަން ހިންގަން އޭރު އިސްކޮށް ތިބި ބައެއްގެ ހައިސިއްޔަތުން ކޮމިޓީއަށް ހާޒިރުވެ، އަޅުގަނޑުމެންގެ ތެރެއިން ކޮންމެ މީހަކާ ކޮމިޓީން ކުރާ ކޮންމެ ސުވާލަކަށްމެ، އެމީހަކަށް އެނގިހުރި އެންމެ ރަނގަޅަކަށް، ތެދުބަހުން ޖަވާބުދީ، އެކަންކަމުގެ ރަނގަޅު މައުލޫމާތާއި ކަން ހިނގާފައިވާ ގޮތް ކޮމިޓީއަށް ކިޔައިދިނުމަށް އަޅުގަނޑުމެން ބޭނުންވާތީ އެފަދަ ފުރުސަތެއް ވީ އެންމެ އަވަހަަކަށް ހަމަޖައްސަވައިދެއްވުން އެދި ދެންނެވިން،" އެސްއޯއީ ކޮމިޓީގެ މުގައްރިރަށް އެޑްރެސްކޮށް، މޫކޭ ފޮނުއްވި ސިޓީގައި ވިދާޅުވި އެވެ.
ތުހުމަތުތައް ކުރި ބައްދަލުވުމަކީ ލައިވްކޮށް ދުރަށް ދެއްކި ބައްދަލުވުމަކަށް ވާތީ، ޖަވާބުދާރީވާ ބައްދަލުވުން ވެސް އެގޮތަށް ކުރިއަށް ގެންދަން ވެސް އޭނާ އެދިވަޑައިގެންނެވި އެވެ.
