ޕެރިސް (އޮގަސްޓް 6) - މިހާރު ކުރިއަށްދާ ދުނިޔޭގެ އެންމެ ބޮޑު ކުޅިވަރު ހަރަކާތް އޮލިމްޕިކްސްގެ ފުޓްބޯޅަ ފައިނަލުގައި، ސްޕެއިނާއި ފްރާންސް ވަނީ ބައްދަލުކުރަން ޖެހިއްޖެ އެވެ.
ފައިނަލާ ހަމައަށް ކުރި ދަތުރުގައި، ފްރާންސް މެޗަކުން ބަލިނުވެ، ފައިނަލަށް ދަތުރުކުރިއިރު، ސްޕެއިން ވަނީ އެއް މެޗުން ބަލިވެފަ އެވެ.
މުބާރާތުގެ ސެމީ ފައިނަލް މެޗުތައް ރޭ ކުޅުނުއިރު، ފުރަތަމަ ސެމީ ގައި ސްޕެއިން ވަނީ ފަހަތުން އަރައި 2-1 އިން މޮރޮކޯ ބަލިކޮށްފަ އެވެ. ދެ ވަނަ ސެމީގައި އިތުރު ވަގުތުގެ ދެ ހާފް ކުޅެގެން ފްރާންސް އިން ވަނީ 3-1 އިން މިސްރު ބަލިކޮށްފަ އެވެ.
މޮރޮކޯ އިން ރޭ ސްޕެއިން ކައިރިން ލީޑުނެގީ، ފުރަތަމަ ހާފުގައި ސޯފިއަން ރަހީމީ ޖެހި ޕެނަލްޓީންނެވެ. އޮލިމްޕިކް ފުޓްބޯޅަ އިވެންޓްގައި މި ފަހަރު އެންމެ ގިނަ ގޯލު ޖެހީ ރަހީމީ ސްޕެއިން ކޮޅަށް ޖެހީ މުބާރާތުގައި އޭނާގެ ހަ ވަނަ ގޯލެވެ.
ސްޕެއިން މޮޅުވީ ދެ ވަނަ ހާފުގައި ދެ ގޯލު ޖަހައިގެންނެވެ. މެޗުގެ 65 ވަނަ މިނިޓްގައި ސްޕެއިނަށް އެއްވަރުކޮށްދިނީ ފާމިން ލޮޕޭޒް އެވެ. މިއީ އޭރިއާތެެރެއިން ލިބުނު ބޯޅައެއް ގޯލަށް ފޮނުވާލައިގެން ލޮޕޭޒް ޖެހި ލަނޑެކެވެ. ސްޕެއިން މޮޅުކޮށްދިން ގޯލު މެޗުގެ ފުރިހަމަ ވަގުތު ހަމަވާން ފަސް މިނިޓަށް ވެފައިވަނިކޮށް ކާމިޔާބުކޮށްދިނީ ޖުއާންލޫ ސަންޗޭޒް އެވެ.
ތިއަރީ އޮންރީގެ ކޯޗުކަމުގައި ކުޅޭ ފްރާންސްގެ އޮލިމްޕިކް ޓީމުން މިސްރު ބަލިކުރީ ވެސް ފަހަތުން އަރަ އެވެ. އެ ގޮތުން މިސްރުގެ މަހުމޫދު ސަބާ ގޯލެއް ޖަހައި އެ ޓީމަށް ލީޑުނަގައިދީފައިވަނިކޮށް، މެޗުގެ ފުރިހަަމަ ވަގުތު ހަމަވާން ހަތް މިނިޓަށް ވެފައި ވަނިކޮށް ޖިއާން ފިލީޕް މަޓޭޓާ ވަނީ ގޯލެއް ޖަހައި، ފްރާންސަށް އެއްވަރުކޮށްދީ މެޗު އިތުރު ވަގުތުގެ ދެ ހާފަށް ގެންގޮސްފަ އެވެ.
އިތުރު ވަގުތުގެ ފުރަތަމަ ހާފުގެ ކުޅުން ފެށުނުތަނާ މިސްރުގެ އުމަރު ފަޔީދު އަށް ދެ ވަނަ ރީނދޫ ކާޑާ އެކު ރަތް ކާޑެއް ދެއްކި އެވެ. މިސްރުގެ ކުޅުންތެރިއަކު މަދުވުމުގެ ފައިދާނަގައި، އިތުރު ވަގުތުގެ ކޮންމެ ހާފެއްގައި ގޯލެއް ޖަހައި، ފްރާންސް އިން 40 އަހަރަށް ފަހު އޮލިމްޕިކްސްގެ ފުޓްބޯޅަ އިން މެޑަލެއް ޔަގީންކުރީ އެވެ. އިތުރުވަގުތުގެ ފުރަތަމަ ހާފުގައި ފްރާންސަށް ލީޑު ހޯދައިދިން ލަނޑު ޖެހީ ވެސް މަޓޭޓާ އެވެ. ފްރާންސަށް މޮޅެއް ކަށަވަރުކޮށްދިން ލަނޑު ޖެހީ މައިކަލް އޮލީސޭ އެވެ.
ލޯ މެޑަލް ހޯދާ ޓީމެއް ކަނޑައަޅަން ކުޅޭ މެޗުގައި، މިސްރާއި މޮރޮކޯ ކުޅޭނީ ބުރާސްފަތި ދުވަހު އެވެ. ފައިނަލް މެޗު އޮންނާނީ ހުކުރު ދުވަހު އެވެ. ސްޕެއިން ވަނީ އެންމެ ފަހުން ބޭއްވި އޮލިމްޕިކްސްގެ ފުޓްބޯޅަ އިވެންޓުގެ ފައިނަލުން ބަލިވެފަ އެވެ.
