ޕެރިސް (އޮގަސްޓް 5) - ފްރާންސްގެ ޕެރިހުގައި މިހާރު ކުރިއަށްދާ އޮލިމްޕިކްސްގެ އެންމެ ފޯރިގަދަ އެއް އިވެންޓް ކަމަށްވާ ފިރިހެނުންގެ 100 މީޓަރު ރޭހުން، އެމެެރިކާގެ ނޯއާ ލައިލްސް ރަން މެޑަލް ހޯދައިފި އެވެ.
ލައިލްސް އާއި ދެ ވަނަ އަށް ނިންމި ޖެމެއިކާގެ ކިޝާނޭ ތޮމްޕްސަންގެ ޓައިމިން އަކީ، 9.79 ސިކުންތެވެ. އެކަމަކު، ފޮޓޯ ފިނިޝް އިން އެއް ވަނަ ކަށަވަރުކުރަން ބެލިއިރު، ލައިލްސް ވަނީ 0.005 ސިކުންތުގެ ފަރަގަކުން ކުރިހޯދައިފަ އެވެ.
ލައިލްސް، 27، ރޭހުގެ މެދަކާ ހަމައަށް އައިއިރު، ހަތް ވަނައިގައި ވެސް އޮތެވެ. އެކަމަކު، ފަހު ވަގުތު ދުވެލި ބާރުކޮށް އެއް ވަނަ ހޯދީ އެވެ.
"މިއީ އެންމެ އާދަޔާހިލާފު ރޭސް، މިއީ މި މެޑަލް ހޯދަން އެންމެ ފުރިހަމަ ރޭސް،" ލައިލްސް ބުންޏެވެ.
އޮލިމްޕިކްސްގެ 100 މީޓަރު ރޭހުގެ ތެރެއިން.-- ފޮޓޯ: ގެޓީއިމޭޖަސް
ތިން ވަނަ ހޯދި، އެމެރިކާގެ ފްރެޑް ކާލީގެ ޓައިމިން އަކީ، 9.81 ސިކުންތެވެ.
މި ފަހަރުގެ އޮލިމްޕިކްސްގެ 100 މީޓަރު ރޭހަށް ބަލާއިރު، އަށް އެތުލީޓުންގެ ވެސް ޓައިިމިން އުޅެނީ 10 ސިކުންތަށް ވުރެ އަވަހަށެވެ. އެހެންވެ، ގިނަ ބަޔަކު ފާހަގަކުރާގޮތުގައި، މިއީ އޮލިމްޕިކްސްގެ ތާރީހުގައި ވެސް ފެނިގެންދިޔަ، 100 މީޓަރުގެ އެންމެ ފޯރިގަދަ ރޭހެވެ.
ސަތޭކަ މީޓަރު ދުވުމުގެ ދުނިޔޭގެ ރެކޯޑާއި އޮލިމްޕިކް ރެކޯޑް ވެސް އޮތީ ޖެމެއިކާގެ ލެޖެންޑް، އުސައިން ބޯލްޓް އަތުގަ އެވެ. އެ ގޮތުން، ބޯލްޓް، 2009 ވަނަ އަހަރު، ބާލިންގައި، 9.58 ސިކުންތުން ދުވެގެން ވޯލްޑް ރެކޯޑް ހެދިއިރު، އޮލިމްޕިކްސް ރެކޯޑް ހެދީ، 2012 ވަނަ އަހަރު ލަންޑަން އޮލިމްޕިކްސްގަ އެވެ. އެ ފަހަރު އޭނާގެ ޓައިމިން އަކީ، 9.63 ސިކުންތެވެ.
