ބާލިން (އޮގަސްޓް 3) - ބޮރޫޝިއާ ޑޯޓްމަންޑަށް ކުޅެމުން އަންނަ ޖަރުމަނު ގައުމީ ފުޓްބޯޅަ ޓީމުގެ ފޯވާޑް، ނިކްލަސް ފުލްކްރޫގް ބޮޑު އަގުގައި، އިނގިރޭސި ޕްރިމިއާ ލީގުގެ ވެސްޓް ހޭމް ޔުނައިޓެޑަށް ސޮއިކުރަން ހަމަޖެހިފައިވާ ކަމަށް މީޑިއާ ރިޕޯޓްތައް ބުނެފި އެވެ.
މިދިޔަ އަހަރު 14 މިިލިއަން ޑޮލަރަށް، ވާޑާ ބްރެމެން އިން ޑޯޓްމަންޑަށް ބަދަލުވި ފުލްކްރޫގް، 31، ވެސްޓް ހޭމް އަށް ވިއްކާލަން އެއްބަސްވެފައިވާ އަގަކީ، 35 މިލިއަން ޑޮލަރު ކަމަށް ރިޕޯޓްތައް ބުނެ އެވެ.
ޑޯޓްމަންޑަށް މިދިޔަ ސީޒަނުގައި، 46 މެޗުން 15 ގޯލު ޖަހައިދިން ފުލްކްރޫގް ވަނީ ޖަރުމަނު ގައުމީ ޓީމަށް މިހާތަނަށް ކުޅުނު، 21 މެޗުން 13 ލަނޑު ޖަހައިފަ އެވެ. ގޯލާ ރަށްޓެހި ކުޅުންތެރިއެއްގެ ގޮތުގައި މި ފަހުން ފެންނަ ފުލްކްރޫގް ހޯދަން ވެސްޓް ހޭމް ވެރިންނަށް އެންގީ އެ ޓީމާ ހަވާލުވި ސްޕެއިންގެ ކޯޗު ހުލެން ލޮޕެޓެގީ އެވެ.
ލޮޕެޓެގީ ފުރަތަމަ ބޭނުންވީ، އެސްޓަން ވިލާ އަށް ކުޅޭ ކޮލަމްބިއާ ފޯވާޑް، ޖޯން ޑުރާން އެވެ. އެކަމަކު، އެ ކްލަބުން ކިޔާ އަގުބޮޑުވުމުން އެ ޑީލް ކުރިއަށް ނުގެންދިޔަ އެވެ.
ވެސްޓް ހޭމް އަކީ މި ފަހަރުގެ ޓްރާންސްފާގައި އެކްޓިވްކޮށް ފެންނަ ކްލަބެކެވެ. އެ ޓީމުން ވަނީ ވުލްވްސް އަށް ކުޅެމުން އައި ޑިފެންޑަރު، މެކްސް ކިލްމަން، 55 މިލިއަން ޑޮލަރަށް ގަތުމުގެ އިތުރުން، ބްރެޒިލްގެ ޕަލްމެއިރާސް އަށް 30 މިލިއަން ޑޮލަރު ދެއްކުމަށް ފަހު ލުއިސް ގިލެރްމޭގެ ސޮއި ހޯދައި، ޝެފީލްޑް ޔުނައިޓެޑްގެ ކީޕަރު ވެސް ފޮޑެރިންހަމް ހޯދައިފަ އެވެ.
ދެން، ވެސްޓް ހަމް އިން ސޮއިކުރާނެ ކަމަށް ބެލެވޭ ކުޅުންތެރިންނަކީ، ހިލޭ ޓްރާންސްފާއެއްގައި ރެއާލް ބެޓިސްގެ މިޑްފީލްޑަރު، ގީޑޯ ރޮޑްރީގޭޒް އާއި ލީޑްސް ޔުނައިޓެޑްގެ ކްރައިސެންސިއޯ ސަމާވިލް އަދި މެންޗެސްޓާ ޔުނައިޓެޑްގެ އާރޮން ވަން-ބިސާކާ އެވެ. ސަމާވިލް އާއި އާއި ބިސާކާ އަށް 50 މިލިއަން ޑޮލަރު ހަރަދުކުރާނެ ކަމަށް ރިޕޯޓްތައް ބުނެ އެވެ.
