އެމްޑީޕީގެ ގައުމީ މަޖިލީހުގެ ހުސްވެފައިވާ މަގާމުތަކުގެ ތެރެއިން އެންމެ ބޮޑު ވާދަވެރިކަމެއް އޮންނާނެ ކަމަށް ބެލެވުނު، މާލެ ދާއިރާގެ ރައީސް ކަން މާލޭގެ މޭޔަރު އާދަމް އާޒިމް ކާމިޔާބު ކުރައްވައިފި އެވެ.
މިހާތަނަށް "އަދަދު" ނޫހަށް ލިބުނު ނަތީޖާތަކުން ދައްކާ ގޮތުން އާޒިމަށް 617 ވޯޓު ލިބިވަޑައިގެންފައިވެ އެވެ. އޭނާއާ ވާދަކުރެއްވި، ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ ކުރީގެ މެންބަރު މުހައްމަދު ފަލާހަށް ލިބިވަޑައިގެންފައިވަނީ 255 ވޯޓެވެ.
އެމްޑީޕީގެ މާލެ ދާއިރާގެ ރައީސް ކަމުގައި ހުންނެވީ މާލޭގެ ކުރީގެ މޭޔަރު ޝިފާ އެވެ. އެ ގޮނޑި ހުސްވީ ޝިފާ އެމްޑީޕީން ވަކިވުމުންނެވެ.
އާޒިމް އެމްޑީޕީއާ ގުޅިވަޑައިގަތީ ވެސް ރިޔާސީ އިންތިހާބަށް ފަހުގަ އެވެ. މީގެ ކުރިން ޖުމްހޫރީ ޕާޓީގައި ހުންނެވި އާޒިމަކީ އެމްޑީޕީގެ މި ނިމުނު ސަރުކާރުގައި އެމްޓީސީސީގެ މެނޭޖިން ޑިރެކްޓަރެވެ. އަދި ރިޔާސީ އިންތިހާބުގައި އާޒިމް ތާއީދު ކުރެއްވީ ވެސް ކުރީގެ ރައީސް އިބްރާހީމް މުހައްމަދު ސޯލިހަށެވެ.
ރައީސް ޑރ. މުހައްމަދު މުއިއްޒު ރިޔާސީ އިންތިހާބު ކާމިޔާބު ކުރައްވައި ވެރިކަމާ ހަވާލުވެވަޑައިގަތުމުން މާލޭގެ މޭޔަރުގެ ގޮނޑި ހުސްވުމުން ބޭއްވި ބައި-އިލެކްޝަން އާޒިމް ކާމިޔާބު ކުރެއްވި އިރު އެއީ މި ފަހުގެ ތާރީހެއްގައި އެމްޑީޕީއަށް ކާމިޔާބުވި އިންތިހާބެވެ.
އެންމެ ފަހުން ބޭއްވި ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބުގެ އިތުރުން ލޯކަލް ކައުންސިލްތަކުގެ ބައެއް ބައި-އިލެކްޝަންތަކުގައި، އިދިކޮޅު އެމްޑީޕީއަށް ވަނީ ބޮޑެތި ނާކާމިޔާބީތަކާ ކުރިމަތިލާން ޖެހިފަ އެވެ.
