ލަންޑަން (އޮގަސްޓް 2) - އިނގިރޭސި ގައުމީ ޓީމުގެ އެސިސްޓަންޓް ކޯޗުކަމާއި ގިނަ ކްލަބްތަކެއްގައި ކޯޗިން މަސައްކަތްތަކެއް ކުރިި، ކްރެއިގް ޝޭކްސްޕެއާ، އުމުރުން 60 އަަހަރުގައި މަރުވެއްޖެ އެވެ.
ޝޭކްސްޕެއާ، މަރުވެފައިވަނީ ކެންސަރު ބައްޔަށް ފަަރުވާ ހޯދަމުން އަންނަނިކޮށެވެ. ޝޭކްސްޕެއާ އަށް ކެންސަރު ޖެހިފައިވާކަން އިއުލާނުކުރީ، މިދިޔަ އަހަރުގެ އޮކްޓޫބަރު މަހުގަ އެވެ.
ލެސްޓާ ސިޓީން 2015-2016 ވަނަ އަހަރު ކްލައުޑިއޯ ރަނިއޭރީގެ ކޯޗުކަމުގައި، އިނގިރޭސި ޕްރިމިއާ ލީގު ކާމިޔާބުކުރިއިރު، އެ ޓީމުގެ އެސިސްޓަންޓް ކޯޗަކީ ޝޭކްސްޕެއާ އެެވެ.
ރަނިއޭރީ ވަކިވުމުން، 2017 ވަނަ އަހަރުގެ ފެބްރުއަރީން ފެށިގެން، އެ ސީޒަން ނިމެންދެން ވަގުތީ ކޯޗެއްގެ ގޮތުގައި ޝޭކްސްޕެއާ ހުއްޓެވެ. އަދި ރަނގަޅު މަސައްކަތްތަކެއް ކުރުމުން، އެ ސީޒަނަށް ފަހު، ތިން އަހަރުގެ ކޮންޓްރެކްޓެއް ޝޭކްސްޕެއާ އަށް ދިން ނަމަވެސް އޮކްޓޫބަރު މަހު މަގާމުން ވަކިކުރި އެވެ.
އިންގްލެންޑް ޓީމުގެ އެސިސްޓަންޓް ކޯޗަކަށް 2016 ވަނަ އަހަރު މަސައްކަތްކުރި ޝޭކްސްޕެއާ ވަނީ، ކޯޗިންގެ އެކި ރޯލުތަކުގައި، ވެސްޓް ބްރޮމްވިޗް އަލްބިއަން، ހަލް ސިޓީ، އެވަޓަން، އެސްޓަން ވިލާ، ނޮރިޗް ސިޓީ އަދި ވަޓްފޯޑްގައި މަސައްކަތް ކޮށްފަ އެވެ.
ޝޭކްސްޕެއާ އެންމެ ފަހުން ވެސް ހުރީ ލެސްޓާގަ އެވެ. އެއީ، މިދިޔަ އަހަރުގެ އޭޕްރީލް މަހު، އެ ޓީމުގެ ކޯޗަކަށް ހުރި ޑީން ސްމިތުގެ އެސިސްޓަންޓް ކޯޗެއްގެ ގޮތުގަ އެވެ.
