އޯގަނައިޒޭޝަން އޮފް އެފްރިކަން، ކެރީބިއަން އެންޑް ޕެސިފިކް ސްޓޭޓްސް (އޯއޭސީޕީއެސް) އާއި ޔޫރަޕިއަން ޔޫނިއަން (އީޔޫ) އާ ދެމެދު ގާއިމުކޮށްފައިވާ "ސަމޯއާ އެގްރީމަންޓް" ގައި ރާއްޖެއިން ސޮއިކޮށްފައިވިޔަސް ރާއްޖޭން އެކްސްޕޯޓުކުރާ ދަޅުމަށް ލުއި ލިބޭ ކަމަށް ގަބޫލު ނުކުރައްވާ ކަމަށް ކުރީގެ ރައީސް އަބްދުﷲ ޔާމީން މިރޭ ވިދާޅުވެއްޖެ އެވެ.
ސަމޯއާ އެގްރީމަންޓުގައި ސޮއިކުރީ އިސްލާމްދީނާ އުސޫލުތަކާއި ގާނޫނުއަސާސީއާ ފުށުއަރާ މާއްދާތަކަށް ރިޒަވޭޝަން ހުށަހެޅުމަށްފަހު ކަމަށް ރައީސް ޑރ. މުހައްމަދު މުއިއްޒުގެ ސަރުކާރުން ބުނެފައިވެ އެވެ.
އެފަދަ ރިޒަވޭޝަންތަކެއް ލައިފި ނަމަ، ރާއްޖޭން އެކްސްޕޯޓުކުރާ މަހަށް ލުއި ނުލިބޭނެ ކަމަށް، ޕީއެންއެފްގެ ޖަލްސާގައި ޔާމީން ވިދާޅުވި އެވެ. މިފަދަ އެއްބަސްވުމުގެ ދަށުން ލުއި ލިބެނީ ދީނީ މިނިވަން ކަމާއި ފަންޑަމެންޓަލް ހިއުމަން ރައިޓްސް އަށް އެއްބަސްވާ ގައުމުތަކަށް ކަމަށް ޔާމީން ވިދާޅުވި އެވެ.
ސަމޯއާ އެއްބަސްވުމުގައި އިސްލާމްދީނާ ފުށުއަރާ ކަންތައްތަކެއް ހުރި ކަމަށް ދީނީ އިލްމުވެރިން ވެސް ގަބޫލު ކުރައްވާ ކަމަށް ޔާމީން ވިދާޅުވި އެވެ.
އެ މަނިކުފާނުގެ ވެރިކަމުގައި ވެސް ކުރީގެ ރައީސް މައުމޫނު އަބްދުލް ގައްޔޫމުގެ ވެރިކަމުގައި ވެސް ދަޅުމަހަށް ޓެކްސްގެ ލުއި ހޯދަން ޔޫރަޕަށް ވަޑައިގެންނެވި ކަމަށާއި ނަމަވެސް ލުއި ނުދިނީ ރާއްޖޭއި ލިބަރަލް ވެލިއުސް ނެތުމާއި، އިންސާނީ ހައްގުތައް ދަށްވުމުން ކަމަށް ޔާމީން ވިދާޅުވި އެވެ.
ސަމޯއާ އެގްރީމެންޓުގެ ހަގީގަތް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު އަދި ބަންޑާރަ ނައިބު އަހުމަދު މުއިއްޒު ކިޔައި ދެއްވުމަށް ވެސް ޔާމީން ގޮވައިލެއްވި އެވެ.
ސަމޯއާ އެއްބަސްވުމުގައި އޯއޭސީޕީއެސް ގެ 79 ގައުމު އަދި ޔޫރަޕިއަން ޔޫނިއަންގެ 27 ގައުމު ސޮއިކޮށްފައިވެ އެވެ. ރާއްޖެ އޯއޭސީޕީއެސްގެ ފުރިހަމަ މެމްބަރު ގައުމަކަށްވެފައިވަނީ ޑިސެމްބަރު 9, 2022 ގަ އެވެ.
