ހުޅުމާލެ ދެވަނަ ފިޔަވަހީގައި އިއްޔެ ހިނގި ނުރައްކާތެރި އެކްސިޑެންޓުގައި އަނިޔާވި މީހާގެ ކަނދުރާ އާއި މައިބަދައިގައި ހުރީ ރެނދުލާފައި ކަމަށާއި އޭނާގެ ހާލު ސީރިއަސް ކަމަށް ކޯޓުގައި ފުލުހުން ބުނެފި އެވެ.
އަނިޔާވި މީހާގެ ގައިގައި ޖެހުނު ކާރުގައި ތިބި މީހުންގެ ބަންދު މުއްދަތާ މެދު ގޮތެއް ނިންމުމަށް މިއަދު ކްރިމިނަލް ކޯޓަށް ހާޒިރު ކުރުމުން ކޯޓުން ވަނީ ކާރުގައި ތިބި ދެމީހުން ޝަރީއަތް ނިމެންދެން ބަންދު ކުރަން އަމުރުކޮށްފަ އެވެ. އެ މައްސަލައިގައި ހައްޔަރު ކުރި ތިންވަނަ މީހާގެ ބަންދާ މެދު ނިންމި ގޮތެއް ނޭނގެ އެވެ.
އެކްސިޑެންޓުގެ މައްސަލައިގައި ޝަރީއަތް ނިމެންދެން ބަންދު ކުރަން އަމުރުކޮށްފައި ވަނީ އިބްރާހިމް އިކްރާމް، ގ. ލޭންޑްއޮފްގާޑަން، ކ. މާލެ، 33އ އާއި އިކްރާމުއްރަހްމާން، ހ. ނޫރަންމާގެއާގެ، ކ. މާލެ، 25އ، އެވެ.
އެކްސިޑެންޓު ހިނގީ އިއްޔެ މެންދުރެއްހާއިރު ހުޅުމާލެ ދެވަނަ ފިޔަވަހީގައި ހުންނަ ވިނަރެސް ފުލެޓުތައް ކައިރީގަ އެވެ.
އެކްސިޑެންޓްގެ ވީޑިއޯ ސޯޝަލް މީޑިއާގައި އާއްމުވެފައި ވާއިރު، އެ ވީޑިއޯއިން ފެންނަ ގޮތުގައި އެކްސިޑެންޓްވީ ކޮންޓްރޯލުން ނެއްޓިގެން އައި ކާރެއް، މަގުގެ އެއްފަރާތުގައި ސައިކަލެއްގައި މަޑުކޮށްގެން އިން މީހެއްގެ ގައިގައި ޖެހިގެންނެވެ. އެ މީހާ ވިއްސައިގެން ގޮސް، މަގުގެ ގަސް އިންދާ ބައިގެ މަތިން ގޮސް ދުވާރު މައްޗަށް ވެއްޓޭ މަންޒަރު ވެސް އެ ވީޑިއޯއިން ފެނެ އެވެ.
ގަސް އިންދާ ބައި ހުރަަސްކޮށް ގޮސް ދުވާރު މައްޗަށް ކާރު މަތަވި އިރު، އެތަނުގައި ހުރި ގަހެއް ވެސް ބިންދައިގެންދާ މަންޒަރު ވެސް ވީޑިއޯ އިން ފެނެ އެވެ.
ފުލުހުން ތައްޔާރުކޮށް ކޯޓަށް ހުށަހެޅި ހާދިސާ ހިނގި ގޮތުގެ ރިޕޯޓުގައި ވާގޮތުން އަނިޔާވި މީހާ ވިއްސައިގެން ގޮސް ފުރަތަމަ ޖެހުނީ ކަނދުރާ އެވެ. އޭގެ ސަބަބުން އޭނާގެ ކަނދުރާ އާއި މައިބަދައިގައި ރެނދުލާފައިވާ ކަމަށް ފުލުހުންގެ ރިޕޯޓުގައި ބުނެފައިވެ އެވެ.
އޭގެއިތުރުން އެ މައްސަލައިގައި ތުހުމަތު ކުރެވޭ، އިބްރާހިމް އިކްރާމްއަށް ވެސް އެކްސިޑެންޓުގައި އަނިޔާވެފައިވާ ކަމަށް ފުލުހުން ބުނެފައިވެ އެވެ. އެގޮތުން އޭނާގެ "މެޔަށް ވަރަށް ބޮޑަށް ތަދުވެފައިވާ ކަމަށާއި، އަދިވެސް ތަދުވާ،" ކަމަށް ފުލުހުންގެ ރިޕޯޓުގައި ބުންޏެވެ.
އެކްސިޑެންޓު ހިނގި ސަރަހައްދު ދޫކޮށް އިކްރާމް ދިޔަ ސަބަބަކީ އެއީ ކަމަށް ވެސް ފުލުހުން ތައްޔާރުކުރި ރިޕޯޓުގައި ބުނެފައިވެ އެވެ.
އެ މައްސަލައިގައި ބަންދު ކުރަން ދެން އަމުރު ކުރި އިކްރާމުއްއަހްމާން އާ ހަވާލާދީ ފުލުހުންގެ ރިޕޯޓުގައި ބުނެފައި ވަނީ އެކްސިޑެންޓުވި ސަރަހައްދު ދޫކޮށް އޭނާ ދިޔައީ އެތަނުގައި އެވަގުތު ތިބި ފުލުހުންގެ ހުއްދަ ލިބިގެން ކަމަށް އޭނާ ބުނި ނަމަވެސް އެއްވެސް ފުލުހަކު އޭނާއާ ވާހަކަދައްކާތަން އެ ސަރަހައްދުގެ ވީޑިއޯ ފުޓޭޖުން ނުފެންނަ ކަމަށާއި އެތަނުން ދިޔުމުގެ ހުއްދަ ފުލުހަކު ދިންކަން ފާހަގަ ކުރެވިފައި ނުވާ ކަމަށެވެ.
ބަންދުގެ މުއްދަތު ޖެހުމަށް މިއަދު ކޯޓަށް ގެންދިޔުމުން އިކްރާމުއްރަހްމާން އާއި އިބްރާހިމް އިކްރާމް ވެސް ބަންދަށް ލުޔެއް ދިނުމަށް އެދިފައިވެ އެވެ.
ނަމަވެސް ޝަރީއަތް ނިމެންދެން އެމީހުން ބަންދު ކުރަން ކޯޓުން ނިންމީ އެކްސިޑެންޓުވުމުން އެތަނުގައި މަޑުނުކޮށް، "ސީނުން ފިލައިގެން ގޮސްފައި ވާތީއާއި، އަމަލު ހިނގާފައިވާ ގޮތުން އާންމުންގެ ހިތްތަކުގައި ބިރުވެރިކަން އުފެދޭ ގޮތަށް އަމަލު ކޮށްފައި ވާތީ،" ބަންދުގައި އެމީހުން ބޭތިއްބުމަށް ފުލުހުން އެދުމުންނެވެ.
