މެންޗެސްޓާ (އޮގަސްޓް 1) - ސައުދީ ޕްރޯ ލީގުގެ ކުލަބަކުން ހުށަހެޅި ހަފްތާ އަކު، އެއް މިލިއަން ޑޮލަރުގެ މުސާރައެއް ލިބޭ ޑީލަކަށް ނޫނެކޭ ބުނެ މެންޗެސްޓާ ސިޓީގެ މިޑްފީލްޑަރު، ކެވިން ޑި ބްރޭނާ އެ ޓީމުގައި މަޑުކުރަން ނިންމާފައިވާ ކަމަށް ރިޕޯޓުތައް ބުނެފި އެވެ.
ކުރިން މި ޓްރާންސްފާ މާކެޓުގައި ޑި ބްރޭނާ ސިޓީ ދޫކޮށްލާނެ ކަމަށް ބެލެވުނެވެ. ޑި ބްރޭނާ ހޯދުމަށް ސައުދީގެ ކުލަބްތަކުން ވަނީ ބޮޑެތި ހުށަހެޅުންތަކެއް ވެސް ހުށަހަޅާފަ އެވެ. އެގޮތުން ގާތް ގަނޑަކަށް އެއް މިލިއަން ޑޮލަރު، ހަފުތާއަކަށް ލިބޭ ވަރުގެ ކޮންޓްރެކްޓްތައް ސައުދީގެ ކުލަބްތަކުން ޑި ބްރޭނާ އަށް ހުށަހެޅި އެވެ.
އެކަމަކު، ރިޕޯޓްތައް ބުނާ ގޮތުން މިހާރު ސިޓީން ހަފްތާ އަކަށް 420،000 ޑޮލަރު ލިބޭ، ޑި ބްރޭނާ އިތުރު ދެ އަހަރަށް ސިޓީގައި މަޑުކުރަން އެ ކުލަބުން ބޭނުންވާތީ އެ ކަމަށް އަންނަނީ މަޝްވަރާ ކުރަމުންނެވެ. މިހާތަނަށް ދެކެވުނު ވާހަކައިން ޑި ބްރޭނާ އެ ޑީލަށް ރުހޭ ކަމަށް ވެސް ރިޕޯޓްތައް ބުނެ އެވެ.
ޖަރުމަނުގެ ކުލަބް ވުލްފްސްބާގް އިން ސިޓީ އަށް ޑި ބްރޭނާ ބަދަލުވީ 63 މިލިއަން ޑޮލަރަށެވެ. ސިޓީއާ އެކު ޑި ބްރޭނާ ގިނަ ކާމިޔާބީތަކެއް ހޯދާފައިވެ އެވެ. އިންޑިވިޖުއަލް ގިނަ ޓްރޮފީތަކެއް ވެސް ސިޓީގައި ހުރެ ހޯދި، ޑި ބްރޭނާ ސިޓީއާ އެކު ހޯދި އެންމެ ބޮޑު ކާމިޔާބީ އަކީ ޗެމްޕިއަންސް ލީގެވެ.
މީގެ ކުރިން ޑި ބްރޭނާ ވަނީ އޭނާގެ ކެރިޔަރުގެ ފަހު ދުވަސްކޮޅު ސައުދީން ފެނިދާނެ ކަމުގެ އިޝާރާތެއް ވެސް ދީފަ އެވެ. އެ ގޮތުން ޑި ބްރޭނާ އޭރު ބުނީ، ކެރިއަރުގެ ފަހު ދުވަސްކޮޅު ފައިސާ ހޯދަން ގިނަ ކުޅުންތެރިން ބޭނުންވާނެ ކަމަށާއި، އެ ފައިސާ ލިބޭނެ މަގު ކުޅުންތެރިން ހޯދާނެ ކަމަށެވެ. އެހެންކަމުން، ސިޓީގެ ޑީލް ނިންމާލުމަށް ފަހު ވިޔަސް، ޑި ބްރޭނާ ސައުދީން ފެނުމުގެ ފުރުސަތު އެބައޮތެވެ.
ބެލްޖިއަމްގެ ކެޕްޓަން، ޑި ބްރޭނާ ހޯދަން ސައުދީ ޕްރޯ ލީގުން އެންމެ މަސައްކަތް ކުރަނީ، އަލް އިއްތިހާދާއި އަލް ހިލާލް އަދި އަލް ނަސްރް އިންނެވެ.
