މިއުނިކް (ޖުލައި 31) - ގަރެތު ސައުތުގޭޓް އިސްތިއުފާ ދިނުމުން، ހުސްވެފައިވާ އިންގްލެންޑް ގައުމީ ޓީމުގެ ކޯޗުކަމުގެ ވަޒީފާ ހުށަހެޅިޔަސް، މި ވަގުތު އެކަމަށް އެއްވެސް ޝައުގުވެރިކަމެއް ނެތް ކަމަށް ނުވަ އަހަރަށް ފަހު، ލިވަޕޫލް ދޫކޮށްލި ޖަރުމަނުގެ ކޯޗު ޔާގަން ކްލޮޕް ބުނެފި އެވެ.
ލިވަޕޫލްގެ ކޯޗުކަމާ 2015 ވަނަ އަހަރު ހަވާލުވެ، ކްލޮޕް، 57، ވަނީ ޔޫރަޕްގެ ގަދަ ޓީމަކަށް އެ ޓީމުން އަލުން ހަދައިފަ އެވެ. އެ ޓީމަށް 491 މެޗުގައި އިރުޝާދުދިން، ކްލޮޕް މިދިޔަ ސީޒަނަށް ފަހު، އެ ޓީމު ދޫކޮށްލީ ކޯޗިންގައި ކުރިއަށްދާން "ހަކަތަ" ނެތް ކަމަށް ބުނެ، ބްރޭކެއް ނެގުން މުހިންމު ކަމަށް ފެންނާތީ އެވެ. ދާދި ފަހުން، އެމެރިކާ ގައުމީ ކޯޗުކަން ކްލޮޕަށް ހުށަހެޅުމުން ވެސް އޭނާ ވަނީ ފުރަގަސްދީފަ އެވެ.
ޖަރުމަނުގައި ކުރިއަށްދާ އިންޓަނޭޝަނަލް ކޯޗަސް ކޮންފަރެންސްގައި ކްލޮޕަށް ވަނީ އިންގްލެންޑްގެ ކޯޗުކަމާ ގުޅޭ ސުވާލުތަކެއް އަމާޒުވެފަ އެވެ.
"މި ވަގުތު ނެތް އެއްވެސް ވަޒީފާއެއް، ގައުމީ ޓީމެއް ވެސް، ކްލަބެއް ވެސް،" ކްލޮޕް ބުންޏެވެ.
"އިންގްލެންޑް؟ އެ ވެގެންދާނީ ފުޓްބޯޅައިގެ ތާރީހުގައި ވެސް ބައެއްގެ ކުރިމަތީގައި ނޫނެކޭ ބުނަން ޖެހޭ އެންމެ ބޮޑު ފަހަރު ކަމަށް،"
ލިވަޕޫލް 30 އަހަރުގެ ތެރޭގައި ފުރަތަމަ ފަހަރަށް ޕްރިމިއާ ލީގުގެ ޗެމްޕިއަންކަން 2020 ވަނަ އަހަރު ހޯދީ ކްލޮޕްގެ އިރުޝާދުގެ ދަށުންނެވެ. އަދި 2019 ވަނަ އަހަރު ޗެމްޕިއަންސް ލީގު ވެސް ކާމިޔާބުކުރިއެވެ. މި ސީޒަންގައި ލިވަޕޫލް ލީގު ކަޕް ކާމިޔާބުކުރިއެވެ.
