ހުއްދަ ނެތި ގެއަކަށް މީހަކު ވަނުމުން ޖަލަށްލާން ހުކުމް ކޮށްފި

ހުއްދަ ނޫން ތަނަކަށް އެނގިހުރެ މީހަކު ވަނުމުން ހަތަރު މަހާއި 13 ދުވަހަށް ޖަލަށްލުމަށް ކްރިމިނަލް ކޯޓުން އިއްޔެ ހުކުމްކޮށްފި އެވެ.

މި މައްސަލައަކީ އޮގަސްޓް 20، 2023 ގައި ދައުލަތުން ކޯޓަށް ހުށައެޅި މައްސަލައެކެވެ. މި ދައުވާ ހުށައަޅާފައިވަނީ އޮގަސްޓް 6، 2022 ގެ 1:00 ހާއިރު މީހެއްގެ ގެޔަކަށް ހުއްދަ ނެތި ދައުވާ ލިބިފައިވާ މީހާ ވަދެފައިވާތީ އެވެ.

ދައުލަތުން އުފުލި މި ދައުވާއަށް އޭނާ ވަނީ އެއްވެސް މަޖުބޫރު ކަމެއް ނެތި، ނުރަނގަޅު ނުފޫޒެއް ނެތި އަދި ފުރިހަމަ އިހުތިޔާރުގައި އިއުތިރާފުވެފަ އެވެ.

މި އަޑުއެހުމުގައި ދައުވާ ލިބޭ ފަރާތް ވަނީ ސައްހަ އިއުތިރާފެއްވެފައި ކަމަށް ޝަރީއަތަށް ގަބޫލުކުރެވޭތީ ހުކުމް އިއްވީ އަވަސް ނިޔާގެ ދަށުންނެވެ.

މި މައްސަލާގައި ނިޔާ ކަނޑައެޅުއްވީ އެ ކޯޓުގެ އިސް ގާޒީ އަލްއުސްތާޒް އާދަމް މުހައްމަދު އެވެ.