އިންޑިއާގެ ކެރެލާގެ ދެކުނު ސަރަހައްދެއްގައި ބިންގަނޑު ކަނޑައިގެން ގޮސް 19 މީހުން މަރުވެއްޖެ އެވެ.
އިންޑިއަން އެކްސްޕްރެސްއިން ބުނީ މަރުވި މީހުންގެ ތެރޭގައި ދެ ކުޑަކުދިން ހިމެނޭ ކަމަށާއި އެތައް ސަތޭކަ މީހުން ތާށިވެފައިވާ ކަމަށެވެ.
ތާށިވެފައިވާ މީހުންގެ ސަލާމަތް ކުރުމަށް ހިންގާ ރެސްކިއު އޮޕަރޭޝަންގައި 200 ސިފައިންނާއެކު ދެ ހެލިކަޕްޓަރު ވަނީ ފޮނުވާފަ އެވެ.
ނަމަވެސް އެ ސަރަހައްދަށް ބޯކޮށް ވާރޭވެހޭތީ މީހުން ސަލާމަތް ކުރުމަށް ދަތިތައް ދިމާވަމުން އަންނަ ކަމަށް ކަމާބެހޭ ފަރާތްތަކުން ވަނީ ބުނެފަ އެވެ.
"އެތައް ސަތޭކަ މީހުން ތާށިވެފައިވާ ކަމަށް ބެލެވޭ. މީހުން ސަލާމަތް ކުރުމުގެ މަސައްކަތް ކެނޑިނޭޅި އަންނަނީ ކުރަމުން،" އިންޑިއާގެ ސިފައިން ބުންޏެވެ.
ބިންގަނޑު ކަނޑައިގެން ދިޔަ ހާދިސާގައި އެ ސަރަހައްދަށް ބޮޑެތި ގެއްލުންތަކެއް ވަނީ ވެފަ އެވެ. އެގޮތުން ފިހާރަތަކާއި، ވެހިކަލްތަކާއި، ގެތައް ވަނީ ސުންނާފަތިވެފަ އެވެ.
ހާދިސާގައި މަރުވި މީހުންގެ އާއިލާއަށް އެ ގައުމުގެ ސަރުކާރުން އަދި އިދިކޮޅު ޕާޓީތަކުން އަންނަނީ ތައުޒިޔާ ކިޔަމުންނެވެ. އަދި ހާލުގައި ޖެހިފައިވާ ތިބި މީހުންނަށް އެހީވާނެ ކަމަށް ސަރުކާރުން ވަނީ ބުނެފަ އެވެ.
