ހަމައެކަނި ވަކި މުއްދަތެއް ހޭދަވުމުން ކޮލެޖެއް ނުވަތަ ތައުލީމީ މަރުކަޒަކަށް ޔުނިވާސިޓީއެއްގެ ދަރަޖަ ދިނުން ރަނގަޅު ނޫން ކަމަށް ހަޔާ އެޑިއުކޭޝަން މިނިސްޓަރު ޑރ. މަރިޔަމް މާރިޔާ މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ ގައުމީ ތަރައްގީ އާއި ތަރިކައިގެ ކޮމިޓީގައި މަތީ ތައުލީމާ ބެހޭ ބިލާ ގުޅޭގޮތުން މާރިޔާ ވިދާޅުވީ ސަރުކާރުގެ ސިޔާސަތަކީ މަތީ ތައުލީމާއި ތަމްރީންގެ ފުރުސަތުތައް ފަހިވާ ގޮތަށް އިންތިޒާމުތައް ހަމަޖައްސައި، މަތީ ތައުލީމުގެ ހިންގުން ހަރުދަނާ ކުރުމުގެ އިތުރުން މަތީ ތައުލީމު ފެންވަރު ރަނގަޅު ކުރުން ކަމަށެވެ.
އެގޮތުން ހަޔާ އެޑިއުކޭޝަންގެ ގާނޫނު އިސްލާހު ކުރާއިރު މިނިސްޓްރީއަށް ފެންނަނީ މަތީ ތައުލީމުގެ ފެންވަރާއި ދައުރު ހިފެހެއްޓޭނެ ނިޒާމުތައް ހަމަޖެހި، ބޭރު ގައުމުތަކުގައި ކިޔެވުމަށް ކުރަން ޖެހޭ ހޭދަ ކުޑަކުރުން ކަމަށް މާރިޔާ ވިދާޅުވި އެވެ.
"ކޮލެޖެއްގެ ގޮތުގައި ހަމައެކަނި ވަކި މުއްދަތެއް ހޭދަވުމުން އެތަނެއް ޔުނިވާސިޓީއަކަށް ބަދަލުކުރުމަކީ ގައުމަށާއި ރައްޔިތުންނަށް އެންމެ ފައިދާ ކުރާނެ ގޮތެއް ނޫން ކަމަށް އަޅުގަނޑު ދެކެނީ. މިހެންވެ ގާނޫނާއި އެ މުއްދަތު ކަނޑައެޅުމާއެކު ދެވޭ މަތީ ތައުލީމާއި ތަމްރީންގެ ކޮލިޓީ ހިފެހެއްޓޭނެ މިންގަނޑުތައް ކަނޑައެޅުމަކީ މުހިންމު ކަމެއް ކަމުގައި ދެކެން،" މާރިޔާ ވިދާޅުވި އެވެ.
މާރިޔާ ވިދާޅުވީ ކޮލެޖެއް ނުވަތަ އިންސްޓިއުޓެއް ވަކި މުއްދަތެއްގެ ތެރޭގައި ޔުނިވާސިޓީއަކަށް ބަދަލުވާއިރު އެތަނެއްގެ ފެންވަރު ކަށަވަރުކުރަން ޖެހޭނެ ކަމަށާއި އެކަން ބެލޭނެ ގޮތްތަކެއް ހަމަޖައްސަން ޖެހޭނެ ކަމަށެވެ.
ނަމަވެސް ކޮލެޖެއް 15 އަހަރުގެ މުއްދަތުގެ ތެރޭގައި ޔުނިވާސިޓީއަކަށް ބަދަލުވުމުގައި އިއުތިރާޒެއް ނެތްކަން ފާހަގަކުރައްވާ މާރިޔާ ވިދާޅުވީ އެ 15 އަހަރަކީ ފެންވަރު ރަނގަޅު ތައުލީމު ދޭ ތަނަކަށް ވާން ޖެހޭނެ ކަމަށެވެ.
އެގޮތުން ރަނގަޅު އިންސްޓިޓިއުޓެއް ކޮލެޖަކަށް ބަދަލުކުރުމަށް ކިޔަވައިދިނުމުގެ ފެންވަރުގެ އިތުރުން ވަރުގަދަ ރިސާޗު ޕްރޮގްރާމުތަކުގެ އިތުރުން ޕީއެޗްޑީ ހާސިލްކޮށްފައި ތިބި ބޭފުޅުން ތިބެން ޖެހޭނެ ކަމަށް މިނިސްޓަރު ވިދާޅުވި އެވެ.
"ޔުނިވާސިޓީއެއްގައި ކޮލިފައިޑް ޕީއެޗްޑީ ޑޮކްޓަރުން، ފިލޯސަވީ ޑޮކްޓާ އިން އެޑިއުކޭޝަން، އެކިއެކި ދާއިރާތަކުން ތިއްބަވައިގެން އަޅުގަނޑުމެންނަށް މަތީ ތައުލީމު ހާސިލުކުރުމުގެ މަގު ފަހިކޮށްދިނުން،" މާރިޔާ ވިދާޅުވި އެވެ.
ގާނޫނު އިސްލާހު ކުރުމަށް ޔުނިވާސިޓީއާއި ކޮލެޖުތަކާއެކު އިށީދެގެން މަސައްކަތް ކުރުން މުހިންމު ކަމަށާއި ބިލަށް އިތުރު ހިޔާލުތައް ހުށަހަޅަން ވަގުތު ބޭނުންވާ ކަމަށް މިނިސްޓަރު ވިދާޅުވި އެވެ. އެގޮތުން ކޮމިޓީން ވަނީ އެ ވަގުތު މިނިސްޓަރަށް ދެއްވާނެ ކަމުގެ ޔަގީންކަން ދީފަ އެވެ.
