ރިޔާސީ ކެމްޕޭނުގައި ރައީސް ޑރ. މުހައްމަދު މުއިއްޒު ދެއްކެވި ވާހަކަ އާ ހިލާފަށް، ސިނަމާލެ ބްރިޖުން ދަތުރު ކުރާ ފަރާތްތަކުގެ އަތުން ފީއެއް ނަގަން ސަރުކާރުން ނިންމާފައިވާ ނިންމުމަކީ އެމަނިކުފާނުގެ ސިޔާސަތެއް ނޫން ކަމަށް ރައީސް މިއަދު ވިދާޅުވެއްޖެ އެވެ.
ސިނަމާލެ ބުރިޖުން ދަތުރު ކުރާ ފަރާތްތަކުގެ އަތުން ފީއެއް ނަގަން ނިންމާފައިވާކަން އިއުލާނު ކުރީ މާލޭގެ މަގުތަކަކީ އަމާން ތަނަކަށް ހެދުމަށް ރޭ އިފުތިތާހު ކުރި "މާލެފަހި" ޕްރޮގުރާމުގެ ތެރެއިންނެވެ. އެ ޕްރޮގްރާމް އިފްތިތާހު ކޮށްދެއްވީ ރައީސް އެވެ.
"ބްރިޖް އިން ޓޯލް ނެގުމަކީ އަޅުގަނޑު ގެ ސިޔާސަތެއް ނޫން. ރޭގައި އިޢުލާން ކުރެވުނު "މާލެފަހި" ޕްލޭންގައި ޓޯލް ނެގުމާމެދު ދިރާސާއެއްކުރުމަށް ހިމަނާފައިވަނީ ފަންނީ ލެވެލްގައި އެކަމުގެ ލަފާ އަޅުގަނޑަށް އެރުވުމުގެ ނިޔަތުގައި," ރައީސް އެކްސްގައި ވިދާޅުވި އެވެ.
އެ ލަފާގައި ފީ ނަގަން ހުށަހެޅުން އަޔަސް ވަކި ކަންކަމެއް ފުރިހަމަ ނުވަނީސް ފީ ނުނަގާނެ ކަމަށް ރައީސް ވިދާޅުވި އެވެ. އެއްވެސް ވަރަކަށް ފީ ނުނަގާނެ ކަމަށް ރައީސް ވިދާޅެއް ނުވެ އެވެ.
"މާލެ ސިޓީގެ މަގުތައް އެއްކޮށް ރަނގަޅު ފެންވަރަކަށް ހަދާ ނިމުމުގެ ކުރިން އަދި އެކަށީގެންވާ މިންވަރަކަށް ޕާކިންގެ މައްސަލަ ހައްލު ވުމުގެ ކުރިން، އަދި ގައުމާއި ރައްޔިތުންގެ ޢިގުތިސޯދީ ހާލަތު އެކަށީގެންވާ ފެންވަރަކަށް މަތިވުމުގެ ކުރިން ޓޯލް ނަގަން ނުފަށާނެ ކަމުގެ ޔަގީންކަން އަރުވަން," ރައީސް ވިދާޅުވެފައިވެ އެވެ.
"މާލެފަހި" ޕްރޮގްރާމާ ގުޅޭ ކަރުދާސް ރައީސް ޗެއާކުރައްވާ ވަޒީރުންގެ މަޖިލީހަށް ހުށަހެޅީ ޓްރާންސްޕޯޓް މިނިސްޓްރީންނެވެ. އެކަމާ ގުޅިގެން ޖޫން 23, ގައި ބޭއްވި ކެބިނެޓް ބައްދަލުވުމުގައި މަޝްވަރާ ކުރުމަށް ފަހު ލިބިވަޑައިގެންނެވި ލަފައާ އެއްގޮތަށް ޕްރޮގްރާމް ކުރިއަށްގެންދަވަން ނިންމެވީ ރައީސް މުއިއްޒު އެވެ.
"ބްރިޖާއި ހައިވޭ ފަދަ ތަންތަނުން ޓޯލް ފީއެއް ތައާރަފު ކުރުމަކީ ވެސް މި ޕްލޭންގެ ދަށުން ކުރަން ނިންމާފައިވާ ވަރަށް މުހިންމު މަސައްކަތެއް," ރޭ އެ ޕްރޮގްރާމް ލޯންޗު ކުރުމަށް ބޭއްވި ޖަލްސާގައި ދެއްކި ވީޑިއޯ ޕްރެޒެންޓޭޝަންގައި ބުނެފައިވެ އެވެ.
ބުރިޖާއި ހައިވޭ ފަދަ ތަންތަން ދެމެހެއްޓެނިވި ގޮތެއްގައި ބެލެހެއްޓުމަށް ކަމާ ގުޅުންހުރި ދައުލަތުގެ ހުރިހާ އިދާރާތަކާއި މަޝްވަރާ ކުރުމަށްފަހު ޓޯލް ފީއެއް ކަނޑައަޅައި ތަންފީޒު ކުރުމުގެ ނިޒާމެއް ގާއިމު ކުރުމާ ގުޅޭގޮތުން ހަދަންޖެހޭ ދިރާސާތައް ހެދުމުގެ މަސައްކަތް ކުރިއަށް އޮތް އޯގަސްޓު މަހުގެ ތެރޭގައި ފެށޭނެ ކަމަށް ރޭގެ ރަސްމިއްޔާތުގައި އިއުލާނު ކުރި އެވެ.
މިދިޔަ އަހަރު ރިޔާސީ އިންތިހާބުގެ ފުރަތަމަ ބުރުގެ ވޯޓުލުމަށް ގާތްވެފައި ވަނިކޮށް، އޯގަސްޓު 29، 2023 ވަނަ ދުވަހު، ޕީއެންސީގެ ރިޔާސީ ކެންޑިޑޭޓު، މިހާރުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެކްސްގައި މި ޕޯސްޓު ކުރެއްވީ އެ މަނިކުފާނުގެ ވެރިކަމެއްގައި ބްރިޖުން ދަތުރުކުރާ ފަރާތްތަކުން ފީ ނެގުމަށް ނިންމާފައިވާ ވާހަކަ ފެތުރުމާއެކު އެވެ.
އެ ވާހަކަތައް ދޮގު ކުރައްވައި ކުރެއްވި ޕޯސްޓު މިހާތަނަށް 369 މީހުން ރީޕޯސްޓުކޮށްފައި ވާއިރު، 45،000 އަށް ވުރެ ގިނަ މީހުން އެ ޕޯސްޓު ކިޔާފައިވެ އެވެ.
ކުރީގެ ރައީސް ޔާމީނުގެ ވެރިކަމުގައި ހައުސިން މިނިސްޓަރަކަށް ރައީސް މުއިއްޒު ހުންނެވިއިރު، ނިންމައި ބޭނުން ކުރަން ފެށި ސިނަމާލެ ބުރިޖުން ފީއެއް ނެގުމުގެ ވާހަތައް އޭރު ވެސް ދެކެވުނެވެ.
ނަމަވެސް ވެރިކަން ބަދަލުވުމުން އެމްޑީޕީގެ ސަރުކާރަށް އެކަން އޭރު ދޫކޮށްލީ އެވެ. އެމްޑީޕީގެ ސަރުކާރުން ވެރިކަމާ ހަވާލުވުމަށްފަހު ނިންމީ ސިނަމާލެ ބުރިޖުން ދަތުރު ކުރުމަކީ އަސާސީ ކަމެއް ކަމަށް ބަލައި އެތަނުން ފީއެއް ނުނެގުމަށެވެ.
