ޕެރިސް (ޖުލައި 24) - ނިއު ޒީލެންޑް އަންހެން ފުޓްބޯޅަ ޓީމުގެ ޓްރެއިނިން ކުރިއަށްދަނިކޮށް، އެ ތަނުގެ މަތިން، ކެނަޑާ ޓީމުގެ އޮފިޝަލަކު ޑްރޯން ދުއްވި މައްސަލައިގައި ކެނަޑާ ޓީމަށް އިންޓަނޭޝަނަލް އޮލިމްޕިކް ކޮމިޓީ (އައިއޯސީ) އިން ފިޔަވަޅުތަކެއް އަޅައިފި އެވެ.
އޮލިމްޕިކްގެ ފުޓްބޯޅަ އިވެންޓް ކުރިން ފަށާއިރު، ކެނަޑާ އާއި ނިއު ޒީލެންޑް ބުރާސްފަތި ދުވަހު ބައްދަލުކުރާނެ އެވެ. މިދިޔަ ހޯމަ ދުވަހު، ސެއިން އެޓިއެންގައި ނިއު ޒީލެންޑުން ޕްރެކްޓިސް ކުރަމުން ދިޔަ ވަގުތެއްގައި ކެނަޑާ އޮފިޝަލަކު ވަނީ މަތިން ޑްރޯން ދުއްވައި، ވީޑިއޯ ކޮށްފަ އެވެ. ނިއު ޒީލެންޑް ޓީމުން މި މައްސަލަ، ޕޮލިހުންނަށް ރިޕޯޓްކުރުމާ އެކު، ޑްރޯން އެރުވި ފަރާތް، ފުލުހުން ހިފެހެއްޓިއިރު، އެއީ ކެނަޑާ ޓީމު އޮފިޝަލެކެވެ.
ކެނަޑާ އޮލިމްޕިކް ކޮމިޓީން ބުނީ، ފުލުހުން ހިފެހެއްޓި، ކެނަޑާގެ ޓީމު އޮފިޝަލަކީ މި ފަހަރުގެ މުބާރާތަށް އެކްރެޑިޓްކޮށްފައިވާ އޮފިޝަލެއް ނޫން ކަމަށެވެ. އެކަަމަކު، މި ފަދަ ކަމެއް ހިނގުމަކީ ދެރަ ކަމެއް ކަމަށާއި މި ކަމާ ނިއު ޒީލެންޑްގެ ކިބައިން މާފަށް އެދޭ ކަމަށެވެ.
ކަންތައްތައް ދިމާވި ގޮތުން، އިންޓަނޭޝަނަލް އޮލިމްޕިކް ކޮމިޓީގެ އެންގުމާ އެއްގޮތަށް، ކެނަޑާ އިން ވަނީ، އެ ޓީމުގެ އެސިސްޓަންޓް ކޯޗު، ޖާސްމީން މެންޑާ އާއި އެކްރެޑިޓްކޮށްފައިނުވާ، އެނަލިސްޓް، ޖޯސެޕް ލޮމްބާޑީ ގެއަށް ފޮނުވާލައފަ އެވެ.
އެންމެ ފަހުން ބޭއްވި އޮލިމްޕިކްސްގެ އަންހެން ފުޓްބޯޅައިން ރަން މެޑަލް ހޯދި ކެނަޑާ އަންހެން ޓީމުގެ ކޯޗަކީ، ބެވަލީ ޕްރީސްޓްމަން އެވެ. އޭނާ ވަނީ ޓީމު އޮފިޝަލުން ކުރި ކުށުގެ ޒިންމާ ނަގާ ކަމަށް ބުނެ، ފުރަތަމަ މެޗުގައި، ޓީމަށް އިރުޝާދުދިނުމުގައި ބައިވެރިނުވާން ނިންމައިފަ އެވެ.
ޕްރީސްްމަން ބުނީ، ނިިއު ޒީލެންޑް ޓީމުގެ ކިބައިން މާފަށް އެދޭ ކަމަށާއި އޭނާގެ ކޯޗިން ޓީމުގެ ބައެއް އޮފިޝަލުންގެ ފަރާތުން ފެނުނީ ރަނގަޅު ކަންތައްތަކެއް ނޫން ކަމަށެވެ.
ދުނިޔޭގެ މައި ފުޓްބޯޅަ އިދާރާ، ފީފާ އިން ވަނީ ޕްރީސްޓްމަން އާއި މެންޑާ އަދި ލޮމްބާޑީގެ މައްސަލަ ބަލަން ފަށައިފަ އެެވެ.
އެކްރެޑިޓްނުކޮށް، އޮލިމްޕިކްސްގެ ކަންކަމުގައި މަސައްކަތްކުރުމުގައި ބައިވެރިވެފައިވާތީ، ލޮމްބާޑީގެ މައްސަލަ ފްރާންސްގެ ފުލުހުން ވެސް އަންނަނީ ބަލަމުންނެވެ. އަދި އޭނާ ޑީޕޯޓްކޮށްލުމާ މެދު ފްރާންސްގެ ސަރުކާރުން ވަރަށް އަވަހަށް ގޮތެއް ނިންމާނެ އެވެ.
