"އަޅުގަނޑުމެންގެ ވެރިކަމެއްގައި ސިނަމާލެ ބްރިޖު ބޭނުންކުރާ ރައްޔިތުން އަތުން ފީ ނަގަން ނިންމާފައިވާ ކަމަށް ފަތުރަމުންދަނީ ކަނޑައެޅިގެން ދޮގު ހަބަރެއް. ދޮގު ބުހުތާނު ވާހަކަތައް ފެތުރުމަކީ ޒިންމާދާރުކަން ކުޑަ، ނާތަހުޒީބު އަމަލެއް,"
މިދިޔަ އަހަރު ރިޔާސީ އިންތިހާބުގެ ފުރަތަމަ ބުރުގެ ވޯޓުލުމަށް ގާތްވެފައި ވަނިކޮށް، އޯގަސްޓު 29، 2023 ވަނަ ދުވަހު، ޕީއެންސީގެ ރިޔާސީ ކެންޑިޑޭޓު، މިހާރުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެކްސްގައި މި ޕޯސްޓު ކުރެއްވީ އެ މަނިކުފާނުގެ ވެރިކަމެއްގައި ބްރިޖުން ދަތުރުކުރާ ފަރާތްތަކުން ފީ ނެގުމަށް ނިންމާފައިވާ ވާހަކަ ފެތުރުމާއެކު އެވެ.
އެ ވާހަކަތައް ދޮގު ކުރައްވައި ކުރެއްވި ޕޯސްޓު މިހާތަނަށް 369 މީހުން ރީޕޯސްޓުކޮށްފައި ވާއިރު، 45،000 އަށް ވުރެ ގިނަ މީހުން އެ ޕޯސްޓު ކިޔާފައިވެ އެވެ.
ނަމަވެސް ބުރިޖާއި ހައިވޭ ފަދަ ތަންތަނަށް "ޓޯލް ފީއެއް" ތައާރަފު ކުރަން، ސަރުކާރުން ރޭ އިފުތިތާހު ކުރި މާލެފަހި ޕްރޮގުރާމުގައި ހިމަނައި އިއުލާނުކުރި އެވެ. އެޕްރޮގްރާމް އިފްތިތާހުކޮށްދެއްވީ ވެސް އެމަނިކުފާނެވެ.
އެގޮތުން ބުރިޖާއި ހައިވޭ ފަދަ ތަންތަން ދެމެހެއްޓެނިވި ގޮތެއްގައި ބެލެހެއްޓުމަށް ކަމާ ގުޅުންހުރި ދައުލަތުގެ ހުރިހާ އިދާރާތަކާއި މަޝްވަރާ ކުރުމަށްފަހު ޓޯލް ފީއެއް ކަނޑައަޅައި ތަންފީޒު ކުރުމުގެ ނިޒާމެއް ގާއިމު ކުރުމާ ގުޅޭގޮތުން ހަދަންޖެހޭ ދިރާސާތައް ހެދުމުގެ މަސައްކަތް ކުރިއަށް އޮތް އޯގަސްޓު މަހުގެ ތެރޭގައި ފެށޭނެ ކަމަށް ރޭގެ ރަސްމިއްޔާތުގައި އިއުލާނު ކުރި އެވެ.
ކުރީގެ ރައީސް ޔާމީނުގެ ވެރިކަމުގައި ހައުސިން މިނިސްޓަރަކަށް ރައީސް މުއިއްޒު ހުންނެވިއިރު، ނިންމައި ބޭނުން ކުރަން ފެށި ސިނަމާލެ ބުރިޖުން ފީއެއް ނެގުމުގެ ވާހަތައް އޭރު ވެސް ދެކެވުނެވެ.
ނަމަވެސް ވެރިކަން ބަދަލުވުމުން އެމްޑީޕީގެ ސަރުކާރަށް އެކަން އޭރު ދޫކޮށްލީ އެވެ. އެމްޑީޕީގެ ސަރުކާރުން ވެރިކަމާ ހަވާލުވުމަށްފަހު ނިންމީ ސިނަމާލެ ބުރިޖުން ދަތުރު ކުރުމަކީ އަސާސީ ކަމެއް ކަމަށް ބަލައި އެތަނުން ފީއެއް ނުނެގުމަށެވެ.
