ޕެރިސް (ޖުލައި 24) - ނިއު ޒީލެންޑް އަންހެން ފުޓްބޯޅަ ޓީމުގެ ޓްރެއިނިން ކުރިއަށްދަނިކޮށް، އެ ތަނުގެ މަތިން، ކެނަޑާ ޓީމުގެ އޮފިޝަލަކު ޑްރޯން ދުއްވި މައްސަލައިގައި ކެނަޑާގެ އޮލިމްޕިކް ކޮމިޓީން މާފަށް އެދިއްޖެ އެވެ.
އޮލިމްޕިކްގެ ފުޓްބޯޅަ އިވެންޓް ކުރިން ފަށާއިރު، ކެނަޑާ އާއި ނިއު ޒީލެންޑް ބުރާސްފަތި ދުވަހު ބައްދަލުކުރާނެ އެވެ. މިދިޔަ ހޯމަ ދުވަހު، ސެއިން އެޓިއެންގައި ނިއު ޒީލެންޑުން ޕްރެކްޓިސް ކުރަމުން ދިޔަ ވަގުތެއްގައި ކެނަޑާ އޮފިޝަލަކު ވަނީ މަތިން ޑްރޯން ދުއްވައި، ވީޑިއޯ ކޮށްފަ އެވެ.
ނިއު ޒީލެންޑް ޓީމުން މި މައްސަލަ، ޕޮލިހުންނަށް ރިޕޯޓްކުރުމާ އެކު، ޑްރޯން އެރުވި ފަރާތް، ފުލުހުން ހިފެހެއްޓިއިރު، އެއީ ކެނަޑާ ޓީމު އޮފިޝަލެކެވެ.
ކެނަޑާ އޮލިމްޕިކް ކޮމިޓީން ބުނީ، ފުލުހުން ހިފެހެއްޓި، ކެނަޑާގެ ޓީމު އޮފިޝަލަކީ މި ފަހަރުގެ މުބާރާތަށް އެކްރެޑިޓްކޮށްފައިވާ އޮފިޝަލެއް ނޫން ކަމަށެވެ. އެކަަމަކު، މި ފަދަ ކަމެއް ހިނގުމަކީ ދެރަ ކަމެއް ކަމަށާއި މި ކަމާ ނިއު ޒީލެންޑްގެ ކިބައިން މާފަށް އެދޭ ކަމަށެވެ.
ނިއު ޒީލެންޑް އޮލިމްޕިކް ކޮމިޓީން ވަނީ މި މައްސަލަ އިންޓަނޭޝަނަލް އޮލިމްޕިކް ކޮމިޓީ (އައިއޯސީ)ގެ އިންޓަގްރިޓީ ޔުނިޓަށް ހުށަހަޅައިފަ އެވެ. އަދި މި މައްސަލައިގައި ކެނަޑާ އިން ފުރިހަމަ އަށް ޖަވާބުދާރީވެ، ކަންތައްތައް ހިނގައިދިޔަ ރިވިއުއެއް ދިނުމަށް ވަނީ އެދިފަ އެވެ.
ކެނަޑާ އަކީ އެންމެ ފަހުން، ޓޯކިޔޯގައި ބޭއްވި އޮލިމްޕިކްސްގެ އަންހެން ފުޓްބޯޅަ އިވެންޓުން ރަން މެޑަލް ގެނައި ޓީމެވެ. އެހެންކަމުން، ނިއު ޒީލެންޑުން ވަނީ އެ ފަދަ ޓީމެއް މި ފަދަ ކަމެއް ކުރުމުން، އެކަން ފީފާގެ ސަމާލުކަމަށް ވެސް ގެނެސްފަ އެވެ.
